बीजापुरम्, 29 अगस्तमासः (हि.स.)।

छत्तीसगढशासनेन क्रीडा-युवा-कल्याणविभागस्य माध्यमेन राष्ट्रियक्रीडादिवसस्य अवसरे घोषितेषु राज्यक्रीडापुरस्कारेषु बस्तरेण इतिहासः रचितः अस्ति। वर्ष २०२३-२४ तमस्य शहीदकौशलयादवपुरस्कारस्य कृते बीजापुरजनपदस्य प्रतिभावान् सॉफ्टबॉल-क्रीडकः राकेशकड़ती चयनितः अस्ति। राकेशकड़त्याः एषा उपलब्धिः सम्पूर्णस्य बस्तर-अञ्चलस्य कृते गौरवस्य विषयः अस्ति।

ज्ञातं यत् अविभाजितमध्यप्रदेश-छत्तीसगढयोः इतिहासे एषः प्रथमः अवसरः अस्ति, यदा बस्तरसम्भागस्य कश्चन क्रीडकः राज्यक्रीडापुरस्कारेण सम्मानितः भविष्यति। एषः सम्मानः सॉफ्टबॉल-क्रीडायै नवीनां परिचितिं प्रदास्यति, तत्सह बस्तरस्य क्रीडाप्रतिभाभ्यः प्रेरणायाः नवीनमध्यायम् अपि उद्घाटयिष्यति। राकेशकड़त्याः सफलतायाः कथा संघर्षस्य, संकल्पस्य साहसस्य च आदर्शः अस्ति।

बाल्यकाले नक्सलीहिंसायाः समये सः स्वपितरं स्वर्गीयं सोमैयाकड़तीं तथा मातरं स्वर्गीयां शान्तिकड़तीं च अहरत्। कठिनपरिस्थितिषु केन्द्रीय-रिजर्व-पुलिसबलस्य सहयोगेन तस्य टुमॉरो-फाउण्डेशने प्रवेशः कारितः, येन तस्मै शिक्षायाः उत्तमभविष्यस्य च मार्गः प्रदर्शितः। ततः बीजापुरजनपदप्रशासनेन स्थापितायां बीजापुर-क्रीडा-अकादम्यां राकेशः श्रमनिरीक्षकस्य, सॉफ्टबॉल-प्रशिक्षकस्य तथा उत्कृष्टक्रीडकस्य सोपानकर्णेवारस्य मार्गदर्शने सॉफ्टबॉल-क्रीडायाः प्रशिक्षणम् आरब्धवान्। अल्पायुषि एव सः स्वप्रतिभया परिश्रमेण च क्रीडाजगति विशिष्टां परिचितिं प्राप्तवान्।

राकेशः केवलं ११ वर्षस्य आयुषि एव राष्ट्रियप्रतियोगितासु छत्तीसगढस्य प्रतिनिधित्वं कुर्वन् उत्कृष्टं प्रदर्शनम् अकरोत्। तस्य प्रमुखासु उपलब्धिषु राकेशः अद्यावधि १२ राष्ट्रियासु तथा २ अन्तर्राष्ट्रीयासु स्पर्धासु भारतीयदलस्य प्रतिनिधित्वं कृतवान् अस्ति। राष्ट्रियस्तरे सः ६ पदकानि अपि प्राप्तवान् अस्ति।

सॉफ्टबॉल-राष्ट्रियचैम्पियनशिप् २०२१ तमस्यां प्रतियोगितायां सब-जूनियर-वर्गे रजतपदकम्, सॉफ्टबॉल-राष्ट्रियचैम्पियनशिप् २०२२ तमस्यां सब-जूनियर-जूनियर-वर्गयोः द्वे रजतपदके, तथा सॉफ्टबॉल-राष्ट्रियचैम्पियनशिप् २०२३ तमस्यां जूनियर-वर्गे सुवर्णपदकं तस्य प्रमुखेषु उपलब्धिषु अन्तर्भवति।

सम्माने केवलं राकेशः एव न, अपितु बीजापुरस्य जूनियर-सॉफ्टबॉल-बालिकादलमपि सम्मानितं भविष्यति। दलं शनिवासरे मुख्यमन्त्रिट्रॉफी-पुरस्कारेण अलङ्करिष्यते। अस्मिन् दले रेणुकातेलम्, चन्द्रकलातेलम्, विमलातेलम् तथा मीनूआरकी च सम्मिलिताः सन्ति। एतत् दलं ह्यः आयोजितायां राष्ट्रियप्रतियोगितायां रजतपदकं विजितवत्।

---------------

Hindusthan Samachar / Dheeraj Maithani