हरिद्वारम्, ३० अगस्तमासः (हि.स.)। डिस्ट्रिक्ट-वुशु-एसोसिएशन, डायनेमिक-स्पोर्ट्स-एकेडमी-मिस्सरपुरस्य तथा जन-अधिकार-अभियानस्य संयुक्ततत्त्वावधाने आयोजितः त्रिदिवसीयः राष्ट्रीयक्रीडा-दिवससमारोहः सम्पन्नः। समारोहस्य अवसरे हॉकीक्रीडायाः जादूगराय मेजरध्यानचन्दाय श्रद्धाञ्जलिः समर्पिता। अस्मिन् अवसरे विविधक्रीडानां क्रीडकाः प्रशिक्षकाश्च सम्मानिताः।

मुख्यातिथिः रानीपुरस्य विधायकः आदेशचौहानः अवदत् यत् प्रधानमन्त्री नरेन्द्रमोदिनः नेतृत्वे सञ्चाल्यमानेन ‘खेलो इण्डिया’ अभियाननेन क्रीडकानां प्रोत्साहनं प्राप्तम् तथा तेषां प्रतिभां परिष्कर्तुं अवसराः प्राप्ताः। उत्तराखण्ड-राज्यस्य गठनानन्तरं हरिद्वारेण सह प्रदेशस्य क्रीडकाणां राष्ट्रियस्तरे स्वप्रतिभां प्रदर्शयितुं उत्तमाः अवसराः प्राप्ताः।

सः अवदत् यत् मुख्यमन्त्रिणः पुष्करसिंहधामिनः नेतृत्वे आयोजितासु राष्ट्रीयक्रीडासु उत्तराखण्डस्य क्रीडकैः उत्कृष्टं प्रदर्शनं कृतम्। सः क्रीडकेभ्यः हॉकीक्रीडकायाः वन्दनाकटारियायाः इव क्रीडायै समर्पिताः भवितुं तथा स्वामीविवेकानन्दस्य जीवनात् प्रेरणां ग्रहीतुं च आह्वानं कृतवान्। सः अवदत् यत् क्रीडाभिः आत्मविश्वासस्य वर्धनेन सह मानसिकविकासः स्वास्थ्यं च अपि उत्तमं भवति।

डिस्ट्रिक्ट-वुशु-एसोसिएशन इत्यस्य सचिवा तथा राष्ट्रियप्रशिक्षिका आरतीसैनी अवदत् यत् परिश्रमस्य कोऽपि विकल्पः नास्ति। उत्तमक्रीडकः भवितुं निरन्तराभ्यासः, अनुशासनं समर्पणं च आवश्यकम् अस्ति।

पूर्वक्रिकेटप्रशिक्षकः प्रकाशजोशी अवदत् यत् हरिद्वारे क्रीडाप्रतिभानां विपुलाः सम्भावनाः सन्ति। सः अवदत् यत् नवनिर्मितक्रीडाङ्गणे बालकेभ्यः प्रवेशः निःशुल्कः क्रियेत चेत् तेभ्यः उत्तमप्रशिक्षणस्य अवसरः प्राप्तुं शक्येत।

डॉ. विशालगर्गः अवदत् यत् सफलतां प्राप्तुं अर्जुनम् इव लक्ष्ये पूर्णं ध्यानं केन्द्रितं कर्तुं आवश्यकम् अस्ति।

समारोहे राष्ट्रीयक्रिकेटप्रशिक्षकः प्रकाश-जोशी, राष्ट्रिय-एथलीट्-प्रशिक्षकः भारत-भूषणः, राज्य-कबड्डीप्रशिक्षकः धर्मेन्द्र-चौहानः, बैडमिण्टनक्रीडकः मनोजखन्ना, योगप्रशिक्षिका ईशासैनी, वुशुप्रशिक्षकौ लवकुशः शिवांशश्च, वुशुक्रीडके वंशिका वर्षा च, एथलीट् अन्तिमा, वॉली-बॉलक्रीडकः हिमांशुः थपलियालः तथा क्रिकेटक्रीडकौ दिव्यांशः कृष्णश्च प्रशस्तिपत्रैः, स्मृतिचिह्नैः अङ्गवस्त्रैश्च प्रदाय सम्मानिताः।

कार्यक्रमे समाजसेवी जगदीशलालपाहवा, गगनवीरसिंहः, लक्ष्मीकान्तसैनी, लाल-चन्दसैनी, सञ्जीवचौहानः, डॉ. राधिकानागरथः, सुनीलदत्तपाण्डेयः, सुशीलकुमारशर्मा इत्यादयः अनेकाः गणमान्याः जनाः उपस्थिताः आसन्।

Hindusthan Samachar / Divya Ranjan