- आश्रयस्थलं गीत्वा जलप्लावन प्रभावितेभ्यः दत्तवस्त्राणि, स्वदेशीसामग्री खाद्यान्नं च

भोपालम्, 30 अगस्तमासः (हि.स.)।

चित्रकूटे मुख्यमन्त्री डॉ. मोहनयादवेन बाढापदया उत्पन्नपरिस्थितीनां निरीक्षणं कृतम्, प्रभावितपरिवारैः सह मिलित्वा कुशलक्षेमं ज्ञातम्।चित्रकूटम्। मध्यप्रदेशस्य मुख्यमन्त्री डॉ. मोहनयादवः रविवासरे चित्रकूटे बाढापदया उत्पन्नपरिस्थितीनां निरीक्षणं कृतवान्। तेन प्राचीनमुखारविन्दस्य समीपे निर्मिते आश्रयस्थले राहतिशिबिरे च गत्वा जलप्लावनेन प्रभावितैः सर्वैः परिवारैः सह मिलित्वा तेषां कुशलक्षेमस्य जानकारी प्राप्ता।

मध्यप्रदेशस्य सतनाजनपदे निरन्तरवृष्टेः कारणेन चित्रकूटे बाढस्य परिस्थितिः उत्पन्ना। मन्दाकिन्याः जलं घाटेभ्यः निर्गत्य बस्तिषु, विपणिषु गृहेषु च प्रविष्टम्। अनेकेषु क्षेत्रेषु द्वितलानि गृहाणि अपि जलेन निमग्नानि अभवन्। सर्वत्र जलमेव दृश्यते स्म तथा च जनाः स्वकीयानि गृहाणि, वस्तूनि जीवनभरस्य सञ्चितधनं च जले निमज्जमानं पश्यन्तः आसन्। मुख्यमन्त्री डॉ. यादवः रविवासरे रीवातः प्रत्यक्षं चित्रकूटं प्राप्तवान् तथा बाढाप्रभावितक्षेत्राणां निरीक्षणं कृतवान्। अस्मिन् अवसरे तेन बाढापीडितेभ्यः राहतिसामग्री वितरिता। सः अवदत् यत् सङ्कटस्य अस्यां घोरवेलायां सम्पूर्णं शासनं भवद्भिः सह अस्ति।

मुख्यमन्त्री अवदत् यत् मन्दाकिनीनद्याः बाढ्या नदीजलं गृहेषु प्रविष्टत्वात् महती क्षतिः अभवत्। तदतिरिक्तं चित्रकूटस्य आधारभूतसंरचनानाम् अपि क्षतिः अभवत्। तेन सर्वेभ्यः प्रभावितेभ्यः कथितं यत् आपदः अस्यां वेलायां शासनं प्रशासनं च पीडितजनैः सह अस्ति। सर्वेषां प्रभावितानां जनानां कृते तेषां क्षतेः प्रतिपूर्तिः करिष्यते।

मुख्यमन्त्री अवदत् यत् चित्रकूटे जनजीवनं सामान्यं यावत् न भवति तावत् सर्वे वरिष्ठप्रशासनिकाधिकारिणः अत्रैव स्थित्वा प्रभावितजनानां कृते राहतकार्यं करिष्यन्ति। तेन आश्रयस्थले बाँदाजनपदस्य बबेरूतः आगतेन श्रद्धालुना राजूसिंहेन सह वार्ता कृता। राजूसिंहः अवदत् यत् ते विंशतिजनैः सह कामतानाथस्वामिनः दर्शनार्थम् आगतवन्तः। बाढ्याः जलस्य कारणेन ते सर्वे स्वगृहं प्रत्यागन्तुं न शक्नुवन्ति। तेन कथितं यत् आश्रयस्थले प्रशासनस्य पक्षतः तेषां सर्वेषां कृते भोजनस्य, जलस्य, अल्पाहारस्य च समुचिता व्यवस्था कृता अस्ति। मुख्यमन्त्रिणा आश्रयस्थले बाढाप्रभावितेभ्यः जनेभ्यः वस्त्राणि, गृहोपयोगिसामग्री, खाद्यान्नानि अन्याः राहतिसहायतासामग्रीश्च वितरिताः।

उल्लेखनीयं यत् सतनाजनपदे शुक्रवासरस्य रात्रितः शनिवासरस्य प्रातःकालपर्यन्तं चतुर्दशघण्टासु निरन्तरवृष्टेः कारणेन चित्रकूटे मन्दाकिनी नदी रौद्ररूपं प्रदर्शितवती। अस्याः बाढ्या प्रायः द्विचत्वारिंशद्वर्षपुरातनः पञ्चविंशतिफुट्-उन्नतः त्रिशतमीटर्-विस्तृतश्च नदीसेतुः अपि तीव्रप्रवाहेन प्रवाहितः। तेन नदीजलं घाटेभ्यः निर्गत्य बस्तिषु, विपणिषु गृहेषु च प्रविष्टम्। अनेकासु क्षेत्रेषु द्वितलानि गृहाणि अपि जलेन निमग्नानि अभवन्। रामघाटः, राघवप्रयागघाटः, कामता, नयाग्राम्, आरोग्यधाम, पुराणीलङ्काचत्वरम्, विपणिक्षेत्रम्, खटकानामोहल्ला, क्योतरा, रामायणी कुटी जानकीकुण्डं च सर्वाधिकं प्रभावितानि क्षेत्राणि आसन्। मन्दाकिन्याः जलं गृहेषु प्रविष्टे सति जनाः आवश्यकवस्तूनि गृहीत्वा गृहच्छदेषु आश्रयं प्राप्तवन्तः।

जलप्लावितक्षेत्रेषु मुख्यमन्त्रिणा डॉ. यादवेन पद्भ्यां भ्रमणं कृतम्

मुख्यमन्त्रिणा डॉ. यादवेन चित्रकूटनगरस्य रामधाममोहल्ले जलप्लावनेन प्रभावितक्षेत्रेषु पद्भ्यां भ्रमणं कृतम्। सः पङ्केन मलिनेषु मार्गेषु पद्भ्यां गत्वा प्रभावितानां गृहाणि प्राप्तवान् तथा जलप्लावनेन उत्पन्नक्षतेः निरीक्षणं कृतवान्। मुख्यमन्त्रिणा रामफल्गर्गस्य किस्मतकुमार्गर्गस्य च गृहं गत्वा जलप्लावनेन उत्पन्नक्षतेः विषये जानकारी प्राप्ता तथा प्रभावितपरिवारैः सह आत्मीयतया चर्चां कृत्वा तेभ्यः आश्वासनं प्रदत्तम्।

मुख्यमन्त्रिणा सतनातः चित्रकूटं प्रति मार्गे सियारामकुटीरस्य समीपे माधवधर्मशालायाः निकटे अग्रहरिकिराणाभण्डारे गत्वा दुकानदारस्य कामताप्रसादगुप्तस्य सह मिलित्वा तस्य आपणे जलप्रवेशेन उत्पन्नक्षतेः निरीक्षणं कृतम्। तेन प्रभावितेभ्यः विश्वासः प्रदत्तः यत् अस्मिन् कठिनसमये शासनं तेषां सह अस्ति तथा सर्वेभ्यः प्रभावितेभ्यः नियमानुसारं यथासम्भवं राहतिः सहायता च प्रदास्यते।

मुख्यमन्त्रिणा जिलाधिकारिभ्यः बाढाप्रभावितक्षेत्रेषु प्रचलितानां राहतिरक्षाकार्याणां विषये जानकारी प्राप्ता तथा सर्वेषां प्रभावितपरिवाराणां कृते आवश्यकसुविधानां व्यवस्थां कर्तुं निर्देशाः प्रदत्ताः। तेन उक्तं यत् जिलाप्रशासनं पूर्णतत्परतया, समर्पणेन संवेदनशीलतया च सर्वेभ्यः प्रभावितेभ्यः राहतिसहायतां प्रदद्यात्। मुख्यमन्त्री डॉ. यादवः अवदत् यत् राहत्कार्येषु कस्यापि प्रकारस्य न्यूनता न भवेत्।

मुख्यमन्त्री डॉ. मोहनयादवः प्रभावितेभ्यः राहतिसहायतायाः वितरणस्य नगरस्य पद्भ्यां निरीक्षणस्य च अनन्तरं सञ्चारमाध्यमप्रतिनिधिभिः सह वार्तालापं कुर्वन् अवदत् यत् चित्रकूटे गतदिनेषु निरन्तरं भवद्भिः अतिवृष्टिभिः सेमरावलमन्दाकिनी-नद्योः जलस्तरः वर्धितः, येन बाढस्य परिस्थितिः उत्पन्ना। नगरस्य बहुषु क्षेत्रेषु जनानां गृहेषु जलं प्रविष्टम् अस्ति तथा तेषां गृहोपयोगिवस्तूनाम् अपि क्षतिः अभवत्। जिलाप्रशासनस्य तत्परतया अद्यावधि कस्यापि प्रकारस्य जनहानिः न अभवत्। अत्र राहतिरक्षाकार्याणि निरन्तरं प्रचलन्ति। प्रभावितजनानां समीपम् आवश्यकराहतिसामग्री अपि प्राप्यते।

सः अवदत् यत् बाढ्या क्षतिः अभवत्, यस्य आकलनं क्रियते। जिलाप्रशासनस्य सर्वे सम्बन्धिताधिकारिणः अस्मिन् समये स्थले एव उपस्थिताः सन्ति। प्रशासनस्य पक्षतः बाढस्थितेः निरन्तरं निरीक्षणं क्रियते। मुख्यमन्त्रिणा उक्तं यत् जनपदस्य सर्वेभ्यः अधिकारिभ्यः निर्देशाः प्रदत्ताः सन्ति यत् सर्वेषां बाढाप्रभावितानां जनानां कृते भोजनस्य, वस्त्रस्य, पेयजलस्य, चिकित्सायाः च सर्वाः आवश्यकव्यवस्थाः तत्कालं सुनिश्चिताः क्रियन्ताम्।

मुख्यमन्त्री डॉ. यादवः अवदत् यत् सः स्वयं शनिवासरस्य रात्रौ रीवायामेव स्थित्वा सतनाजनपदे रीवाजनपदे च बाढस्थितेः विस्तरेण समीक्षां कृतवान्। सः अवदत् यत् चित्रकूटे सतनायां च अतिवृष्टेः कारणेन सेमरावल-मन्दाकिनीनद्योः बाढस्य भयावहं रूपं दृष्टम्। आश्वासकः विषयः यत् घटना दिवसे अभवत् तथा मौसमस्य पूर्वानुमानस्य कारणेन जिलाप्रशासनम् अपि पूर्णतया सज्जम् आसीत्। शासनस्य सजगतया सतर्कतया च जिलाप्रशासनस्य तत्परतया च अद्यावधि कस्यापि प्रकारस्य जनहानिः न अभवत्।

मुख्यमन्त्री अवदत् यत् सम्प्रति सम्पूर्णं ध्यानं राहतिरक्षाकार्येषु अधिकवेगेन प्रवर्तनं प्रति अस्ति, येन जलस्तरे न्यूनीभूते सति सर्वे प्रभावितजनाः सुरक्षितरूपेण स्वगृहाणि प्रत्यागन्तुं शक्नुयुः। तेन उक्तं यत् अस्यां बाढ्यां जातस्य क्षतेः सम्यक् आकलनं कृत्वा प्रशासनस्य माध्यमेन सर्वेभ्यः प्रभावितपरिवारेभ्यः आवश्यकसहायता प्रदास्यते।

मुख्यमन्त्री अवदत् यत् तेन स्वयं बाढाप्रभावितनागरिकैः सह मिलित्वा जिलाधिकारिभ्यः सर्वेभ्यः प्रभावितेभ्यः शुष्कखाद्यान्नम् अन्यानि आवश्यकराहतिसामग्रीणि च प्रापयितुं निर्देशाः प्रदत्ताः। तेन उक्तं यत् येषां जनानां पशुहानिः अभवत् अथवा अन्यः कश्चित् प्रकारस्य नाशः अभवत्, तस्य विधिवत् सर्वेक्षणं कारयित्वा तेभ्यः अपि नियमानुसारं राहतिराशिः आर्थिकसहायता च प्रदास्यते।

अस्मिन् अवसरे चित्रकूटस्य विधायकः सुरेन्द्रसिंहगहरवारः, नगरपरिषदः अध्यक्षा साधनापटेलः, प्रबलश्रीवास्तवः, रीवासम्भागस्य आयुक्तः शीलेन्द्रसिंहः, जिलाधिकारी डॉ. सतीशकुमारः एस् इत्यादयः अन्ये जनप्रतिनिधयः जिलाधिकारिणश्च उपस्थिताः आसन्।

---------------

Hindusthan Samachar / Dheeraj Maithani