नवसारी, ३० अगस्तमासः (हि.स.)। प्रधानमन्त्रीनरेन्द्रमोदिनः अग्रिम-नवसारी-यात्रां तस्य स्वच्छतायाः आह्वानं च दृष्ट्वा सम्पूर्णं नवसारीजनपदं स्वच्छं सुन्दरं च कर्तुम् उद्दिश्य विशेषं ‘सूक्ष्मस्वच्छता-भियानम्’ आरब्धम् अस्ति।

केन्द्रीयजलशक्तिमन्त्रिणः सी.आर. पाटीलस्य मार्गदर्शने चिखली-शिला-उत्खनन-सङ्घस्य विभिन्नसामाजिक-संस्थानां च संयुक्तप्रयासेन सप्त-दिवसीयस्य सघनस्वच्छताभियानस्य शुभारम्भः कृतः। सः सूचितवान् यत् स्वच्छताभियानाय चिखली-ट्रक-शिला-उत्खनन-सङ्घेन ५० जेसीबी-यन्त्राणि, ८ भारवाहकयन्त्राणि, २२ हाइवा-यानानि, २० ट्रैक्टरयानानि इत्येवं प्रायः शतं यानानि व्यवस्थापितानि सन्ति।

अभियानस्य अन्तर्गतं जनपदस्य षट्सु सम्बन्धेषु स्थितेषु ३८९ ग्रामेषु स्वच्छताकार्यं क्रियते। अस्य कृते जेसीबी-यन्त्राणां, ट्रैक्टरयानानां, टेम्पोयानानां, टिप्परयानानां, हाइवायानानां च उपयोगः क्रियते। ग्रामवासिनः स्वच्छताकर्मचारिणश्च अभियाने संयोजिताः सन्ति। ग्रामाणां सम्पर्कमार्गेषु सार्वजनिकक्षेत्रेषु च सूक्ष्मस्तरेण स्वच्छतां कृत्वा सङ्गृहीतस्य कचरस्य उचितं निस्तारणं महानगर-पालिकायां, नगरपालिकायां तथा निर्धारितेषु कचरानिस्तारणस्थलेषु करिष्यते।

पाटीलः अवदत् यत् प्रधानमन्त्री स्वच्छतायाः प्रबलसमर्थकः अस्ति। नवसारीजनपदस्य प्रत्येकस्मिन् ग्रामे व्यापकं स्वच्छताभियानं सञ्चाल्य तं स्वच्छसुन्दर-नवसारीरूपेण स्वागतं कर्तुं जनपदस्य जनाः विभिन्नसंस्थाश्च उत्साहेन प्रवृत्ताः सन्ति। प्रधानमन्त्रिणः स्वागतं प्रति नवसारीजनपदे महान् उत्साहः दृश्यते। विभिन्नसंस्थानां कार्यकर्तारः कर्म-चारिणश्च अहोरात्रं अभियाने संलग्नाः सन्ति। अभियानेन सम्पूर्णजनपदे स्वच्छतायाः विषये जागरूकता वर्धते तथा स्थानीयजनाः अपि अस्मिन् सक्रियतया सहयोगं कुर्वन्ति।

स्वच्छताभियानस्य शुभारम्भावसरे वित्त-मन्त्री कनुभाईदेसाई, मन्त्री नरेशभाई-पटेलः, सांसदः धवलपटेलः, नवसारीजन-पदाध्यक्षः भूराभाईशाहः, जनपदपञ्चायता-ध्यक्षः निरालीबेनः, विधायकः राकेशदेसाई इत्यादयः अन्ये च जनप्रतिनिधयः पदाधिकारिणश्च उपस्थिताः आसन्। सर्वैः स्वच्छताकर्मचारिणां अभियानसम्बद्धानां दलानां च उत्साहवर्धनं कृतम्।

Hindusthan Samachar / Divya Ranjan