५५.१७ लक्षाः महिलाः अकुर्वन् निःशुल्कं यात्राम्, ३३.७६ लक्षाधिकेभ्यः सहयात्रिभ्यः अपि प्राप्ता सुविधा

२०२५ वर्षस्य कीर्तिमानं भग्नम्, अस्मिन् वर्षे १०.६८ लक्षाधिकाः यात्रिणः निःशुल्कबसयात्रायाः लाभं प्राप्तवन्तः

योगीसर्वकारेण १०६.९८ कोटिरूप्यकाणां व्ययः वहितः, अगस्तमासस्य २८ दिनाङ्के ४९.९६ लक्षाः यात्रिणः अकुर्वन् निःशुल्कं यात्राम्।

लखनऊ, ३० अगस्तमासः (हि.स.)। रक्षाबन्धनपर्वणि योगीसर्वकारस्य पक्षतः महिलाभ्यः तेषां सहयात्रिभ्यश्च प्रदत्ता त्रिदिवसीया निःशुल्कबसयात्रा अस्मिन् वर्षे सम्पूर्णप्रदेशे व्यापकप्रयोजनं दत्तवती। योगीसर्वकारेण गतवर्षस्य स्वकीयः कीर्तिमानः भङ्गीकृत्य पूर्वापेक्षया अधिकेभ्यः यात्रिभ्यः निःशुल्कयात्रायाः लाभः प्रदत्तः। उत्तरप्रदेशराज्यसड़कपरिवहननिगमस्य अनुसारं २०२६ तमस्य वर्षस्य अगस्तमासस्य २७ दिनाङ्कतः २९ दिनाङ्कपर्यन्तं कुलं ८८,९४,७३० यात्रिणः निःशुल्कबसयात्रां कृतवन्तः। एतेषु ५५.१७ लक्षाः महिलाः ३३.७६ लक्षाः सहयात्रिणश्च सम्मिलिताः आसन्। अस्याः निःशुल्कयात्रायाः कृते प्रदेशसर्वकारेण १०६.९८ कोटिरूप्यकाणां व्ययः वहितः।

परिवहनविभागस्य अपरमुख्यसचिवा अर्चना अग्रवालः अवदत् यत् रक्षाबन्धनपर्वणि मुख्यमन्त्रिणा योगी आदित्यनाथेन महिलाभ्यः तेषां सहयात्रिभ्यश्च निःशुल्कबसयात्रायाः घोषणा कृता आसीत्। अस्याः सुविधायाः सफलतापूर्वकं कार्यान्वयने परिवहननिगमस्य अधिकारिभिः कर्मचारिभिः चालक-परिचालकैश्च पूर्णसमर्पणेन योगदानं दत्तम्। विभागीयमन्त्रिणः मार्गदर्शनेन सहयोगेन च व्यवस्थाः उत्तमरूपेण सञ्चालिताः।

२०२५ वर्षस्य तुलनायां १०.६८ लक्षाधिकाः यात्रिणः अकुर्वन् यात्राम्

अस्मिन् वर्षे निःशुल्कयात्रायाः लाभं प्राप्तवतां यात्रिणां संख्या गतवर्षस्य कीर्तिमानमपि अतिक्रान्तवती। २०२५ तमे वर्षे रक्षाबन्धनपर्वणि त्रिषु दिवसेषु ७८.२६ लक्षाः यात्रिणः निःशुल्कयात्रां कृतवन्तः। अस्मिन् वर्षे एषा संख्या वर्धित्वा ८८.९४ लक्षपर्यन्तं प्राप्ता। अर्थात् गतवर्षस्य तुलनायां प्रायः १०.६८ लक्षाधिकाः यात्रिणः निःशुल्कयात्रायाः लाभं प्राप्तवन्तः।

योगीसर्वकारेण १०६.९८ कोटिरूप्यकाणां व्ययः वहितः

त्रिषु दिवसेषु निःशुल्कबसयात्रया यात्रिभ्यः प्राप्तस्य आर्थिकलाभस्य मूल्यं गतवर्षस्य तुलनायाम् अपि अधिकम् अभवत्। २०२५ तमे वर्षे सर्वकारेण निःशुल्कयात्रायै ८६.९८ कोटिरूप्यकेभ्यः अधिकः व्ययः वहितः आसीत्। अस्मिन् वर्षे सः व्ययः वर्धित्वा १०६.९८ कोटिरूप्यकाणि अभवत्। अर्थात् सर्वकारेण गतवर्षस्य तुलनायां प्रायः २० कोटिरूप्यकाणां अतिरिक्तभारः वहितः।

अगस्तमासस्य २८ दिनाङ्के सर्वाधिकाः ४९.९६ लक्षाः यात्रिणः अकुर्वन् यात्राम्

आङ्किकविवरणानुसारं रक्षाबन्धनदिने अगस्तमासस्य २८ दिनाङ्के सर्वाधिकाः यात्रिणः निःशुल्कयात्रां कृतवन्तः। अस्मिन् दिने ४९.९६ लक्षाः यात्रिणः बसयानेषु यात्रां कृतवन्तः। एतेषु ३२.४७ लक्षाः महिलाः १७.४८ लक्षाः सहयात्रिणश्च आसन्। अगस्तमासस्य २७ दिनाङ्के ९.२६ लक्षाः, २८ दिनाङ्के ४९.९६ लक्षाः तथा २९ दिनाङ्के २९.७१ लक्षाः यात्रिणः निःशुल्कबसयात्रां कृतवन्तः। एतेषु महिलानां संख्या क्रमशः ६.०३ लक्षाः, ३२.४७ लक्षाः तथा १६.६६ लक्षाः आसीत्।

परिवहननिगमस्य सज्जताभिः महत्त्वपूर्णं योगदानम्

रक्षाबन्धनपर्वणः पूर्वं परिवहननिगमेन अधिकाधिकानां बसयानानां सञ्चालनं सुनिश्चितुं प्रमुखबसस्थानकेषु व्यवस्थाः सुदृढीकर्तुं च सज्जता कृता आसीत्। अगस्तमासस्य २७ दिनाङ्कतः २९ दिनाङ्कपर्यन्तं प्रातः षड्वादनतः रात्रौ द्वादशवादनपर्यन्तं निःशुल्कयात्रायाः सुविधा प्रदत्ता। उत्तमसज्जतायाः कारणेन यात्राकाले कस्यापि यात्रिणः समस्यायाः सम्मुखीकरणं न कर्तव्यम् अभवत्।

२०१७ तमवर्षात् योगीसर्वकारः प्रददाति निःशुल्कयात्रायाः उपहारम्

मुख्यमन्त्री योगी आदित्यनाथः सर्वकारस्य गठनस्य प्रथमवर्षादेव महिलानां सुरक्षायै उत्थानाय च कार्यं कृतवान्। तेन सह प्रथमवर्षादेव रक्षाबन्धनपर्वणि महिलाभ्यः निःशुल्कबसयात्रायाः अपि आरम्भः कृतः, या अद्यापि प्रवर्तते।

२०१७ तमे वर्षे ११.१६ लक्षाः महिला-यात्रिणः अस्याः सुविधायाः लाभं प्राप्तवन्तः। २०१८ तमे वर्षे एषा संख्या ११.६९ लक्षम्, २०१९ तमे वर्षे १२.०४ लक्षम् तथा २०२० तमे वर्षे ७.३६ लक्षम् आसीत्। २०२१ तमे वर्षे ९.६३ लक्षाः, २०२२ तमे वर्षे २२.३२ लक्षाः, २०२३ तमे वर्षे २९.२९ लक्षाः तथा २०२४ तमे वर्षे १९.७८ लक्षाः महिला-यात्रिणः निःशुल्कयात्रां कृतवन्तः। २०२५ तमे वर्षे महिलाभिः सह सहयात्रिणां समावेशानन्तरं कुलनिःशुल्कटिकटानां संख्या ७८.२६ लक्षम् आसीत्।

Hindusthan Samachar / Dheeraj Maithani