भागलपुरम्, 30 अगस्तमासः (हि.स.)।अखिलभारतीयमारवाडीयुवामञ्चस्य भागलपुरशाखायाः तत्वावधाने रविवासरे नगरे ‘वॉकथॉन २.०’ इत्यस्य सफलम् आयोजनं कृतम्। “वॉक टुगेदर, थ्राइव टुगेदर” अर्थात् “सह चलामः, सह वर्धामहे” इति मूलमन्त्रेण आयोजितायाः अस्याः पदयात्रायाः मुख्योद्देश्यं नगरवासिनः स्वास्थ्यविषये, स्वस्थजीवनशैल्यां पर्यावरणसंरक्षणे च जागरूकान् कर्तुम् आसीत्।

पदयात्रायाः प्रारम्भः कोतवालीचतुष्पथस्य समीपे स्थितात् ऐतिहासिकात् कुपेश्वरनाथमन्दिरात् अभवत्। अस्यां पदयात्रायां बहुसंख्याकाः युवानः स्थानीयनागरिकाश्च उत्साहपूर्वकं भागं गृहीतवन्तः। हस्तेषु पर्यावरणस्य स्वास्थ्यस्य च जागरूकतासम्बद्धानि घोषवाक्यानि लिखितानि फलकानि धृत्वा युवानः नगरस्य प्रमुखविपणीमार्गेषु अगच्छन्।

सम्पूर्णायाः यात्रायाः अवधौ जनान् दैनिकजीवने स्वास्थ्यवर्धकव्यायामादीनां समावेशाय तथा प्रकृतेः संरक्षणाय प्रेरितवन्तः। पदयात्रा नगरस्य प्रमुखमार्गेषु भ्रमणं कृत्वा घण्टाघरचतुष्पथे समाप्तिम् अगच्छत्।

समापनस्थले युवभिः पर्यावरणसंरक्षणस्य सामूहिकः सङ्कल्पः स्वीकृतः। कार्यक्रमं स्मरणीयं सार्थकं च कर्तुं मञ्चस्य सदस्यैः घण्टाघरचतुष्परितः वृक्षारोपणमपि कृतम् तथा जनान् वृक्षाणां संरक्षणाय पालनाय च आह्वानं कृतम्।

कार्यक्रमस्य सफलतायै स्थानीयजनप्रतिनिधिभिः मञ्चस्य पदाधिकारिभिश्च सक्रियभूमिका निर्व्यूढा।

अस्मिन् अवसरे वार्ड-सङ्ख्या ३८ इत्यस्य पार्षदः पूर्वाध्यक्षश्च अश्विनी जोशी ‘मोंटी’, शाखाध्यक्षः अङ्कितकुमारबाजोरिया, सचिवः अभिषेककुमारबुबना तथा कोषाध्यक्षः ओमगोयंका च प्रमुखतया उपस्थिताः आसन्।

तदतिरिक्तं उपाध्यक्षः अभिषेकसफरः, सहसचिवः सन्दीपसराफः, सहसचिवः प्रशान्तटेकरिवालः, सहकोषाध्यक्षः मुकेशभाटोलिया तथा मञ्चसंरक्षकः अरुणबाजोरिया इत्यादयः मारवाडीयुवामञ्चस्य दशाधिकाः कार्यकर्तारः कार्यक्रमे सम्मिलिताः भूत्वा स्वकीयां सहभागितां प्रदर्शितवन्तः।

Hindusthan Samachar / Dheeraj Maithani