मण्डी, ३१ अगस्तमासः (हि.स.)। राष्ट्रियक्रीडादिवसस्य ‘बैग्-फ्री-डे’ इत्यस्य च अवसरे राजकीय-वरिष्ठ-माध्यमिक-पाठशाला तल्याहडे छात्राणां कृते विभिन्नानां क्रीडानां सामाजिक-जागरूकताक्रियाकलापानां च उत्साहपूर्वकम् आयोजनं कृतम्। कार्यक्रमस्य उद्देश्यं छात्रेषु क्रीडाभावनायाः, शारीरिकस्वास्थ्यस्य, स्वच्छतायाः, नशामुक्तजीवनस्य च विषये जागरूकतां जनयितुम् आसीत्।

अस्मिन् अवसरे नशामुक्तभारत-अभियानस्य अन्तर्गतं १४ वर्षात् न्यूनस्य तथा १९ वर्षात् न्यूनस्य च आयुवर्गस्य बालकानां बालिकानां च कृते द्विकिलोमीटर-धावनप्रतियोगिता आयोजिता। छात्राणां कृते बैडमिण्टन-क्रीडायाः प्रतियोगितायाः अपि आयोजनं कृतम्, यस्मिन् प्रतिभागिभिः स्वकीयाः क्रीडाप्रतिभाः उत्कृष्टतया प्रदर्शिताः। विद्यालयपरिसरे तद्समीपस्थेषु क्षेत्रेषु च स्वच्छताभियानमपि सञ्चालितम्।

अस्मिन् अवसरे विद्यालयस्य प्रधानाचार्या मीनाक्षी जोशी छात्रान् सम्बोधयन्ती अवदत् यत् क्रीडा जीवनस्य महत्त्वपूर्णः भागः अस्ति। क्रीडा न केवलं शारीरिकरूपेण स्वस्थान् कुर्वन्ति, अपितु मानसिकविकासे व्यक्तित्वनिर्माणे च महत्त्वपूर्णां भूमिकां निर्वहन्ति। सा छात्रान् नशाभ्यः दूरं स्थातुं, नियमितरूपेण क्रीडाक्रियासु भागं ग्रहीतुं, स्वच्छतां च स्वस्य दैनिकजीवनस्य भागं कर्तुम् आह्वानं कृतवती।

Hindusthan Samachar / Divya Ranjan