सङ्घे मातृशक्तेः सम्मानं सर्वोच्चं, परिवारं समाजं च संयोजयितुं शक्तिः : सतीशमहाना

लखनऊम्, ३१ अगस्तमासः (हि.स.)। गोमतीनगरस्थे इन्दिरागान्धीप्रतिष्ठाने लखनऊनगरे सोमवासरे दिल्ली इत्यस्या: प्रख्यातया लेखिकया समाजसेविकया च डॉ. शोभा-विजेन्द्रया रचिता ‘शतायुः सङ्घः महिला-सहभागिता च’ इति पुस्तके आधारितः संवादकार्यक्रमः आयोजितः। कार्यक्रमस्य शुभारम्भः दीपप्रज्वलनेन सामूहिक-वन्देमातरम्-गानेन च अभवत्।

अस्मिन् अवसरे उत्तरप्रदेशस्य राज्यपालः आनन्दीबेनपटेलः अवदत् यत् महिलासशक्तीकरणस्य वास्तविकः आरम्भः गृहात् शिक्षायाश्च भवति। अद्य पुत्र्यः शिक्षायां, स्टार्टअप-व्यवसाये, व्यापारक्षेत्रे विभिन्नेषु च क्षेत्रेषु उल्लेखनीयां सफलतां प्राप्नुवन्ति, किन्तु तासां अग्रे गमनाय सम्यक् चिन्तनम्, अवसरः परिवारस्य सहयोगश्च अनिवार्यः अस्ति। सा विश्वासं प्रकटितवती यत् आगामिषु वर्षेषु महिलाः शिक्षायाः, प्रशासनस्य, उद्यमितायाः नेतृत्वस्य च प्रत्येकस्मिन् क्षेत्रे अधिकां प्रभावशालिनीं भूमिकां निर्वक्ष्यन्ति।

विधानसभाध्यक्षः सतीशमहाना अवदत् यत् सङ्घस्य कार्ये मातृशक्तेः योगदानं सदैव महत्त्वपूर्णं वर्तते। स्वबाल्यकालस्य अनुभवान् सहभागं कुर्वन् सः अवदत् यत् तस्य माता सङ्घस्य स्वयंसेवकेषु प्रचारकेषु च स्नेहं सम्मानम् आत्मीयतां च धारयति स्म। सः अवदत् यत् सङ्घे महिलानां सम्मानं सर्वोच्चम् अस्ति तथा तासां सहयोगः परिवारं, सेवां समाजं च सह नीतुं शक्तिं प्रददाति।

मन्त्री बेबीरानीमौर्या अवदत् यत् नारी केवलं परिवारस्य एव न, अपितु समाजस्य राष्ट्रस्य च शक्तिः अस्ति। सा अवदत् यत् अद्य महिलाः प्रत्येकस्मिन् क्षेत्रे अग्रे गच्छन्ति तथा ताभ्यः अवसरेण सह नेतृत्वस्य निर्णयग्रहणस्य च अधिकारः अपि प्राप्तव्यः। ग्रामीणमहिलानां योगदानं रेखाङ्कयन्ती सा अवदत् यत् महिलानां सहभागितैव सम्पूर्णसमाजस्य प्रगतेः आधारः अस्ति।

स्वकीयवक्तव्ये डॉ. शोभा-विजेन्द्रा अवदत् यत् सङ्घः समितिश्च ज्यामितिशास्त्रस्य समानान्तररेखयोः इव स्तः, यौ राष्ट्रनिर्माणस्य बिन्दौ परस्परं मिलतः। सा शताब्दीवर्षस्य अवधौ त्रिकोटि भगिनीभिः हिन्दूसम्मेलनेषु कृता सहभागिता तथा ३९ आनुषङ्गिकसङ्गठनैः कृतानां १,७०,००० अधिकानां सेवासंस्कारकार्याणां उल्लेखं कुर्वती विश्वासं प्रकटितवती यत् अस्यामेव आधारशिलायां २०४७ तमे वर्षे भारतं विश्वगुरुः भविष्यति। सा सङ्घं प्रति प्रसारितस्य तस्य भ्रमस्य सप्रमाणं खण्डनं कृतवती यत् अत्र महिलानां कश्चित् स्थानं नास्ति। गुरूजी-महोदयस्य वचनं — “स्त्री राष्ट्रनिर्माणस्य धुरी अस्ति” — स्मारयन्ती सा आह्वानं कृतवती यत् अद्य सत्याधारितं आख्यानं स्थापयितुमेव समयस्य सर्वाधिकं महत्त्वपूर्णा आवश्यकता अस्ति।

महिलायोगस्य उपाध्यक्षा अपर्णायादवः अवदत् यत् सङ्घस्य शताब्दीयात्रायां महिलाभिः सेवायां, संस्कारे राष्ट्रनिर्माणे च पुरुषैः सह स्कन्धेन स्कन्धं मिलयित्वा योगदानं प्रदत्तम्। सा अवदत् यत् इदं पुस्तकं महिलासहभागितां सम्बद्धानां भ्रान्तीनां निवारणं करोति तथा नूतनवंशाय समानतायाः, सेवायाः राष्ट्रनिर्माणस्य च सन्देशं ददाति। सा सर्वेभ्यः पुस्तकं पठितुं बालकेभ्यश्च पाठयितुं आग्रहं कृत्वा अवदत् यत् यदा नारीशक्तिः जागरिष्यति, तदैव भारतं विश्वगुरुत्वस्य दिशि अग्रे गमिष्यति।

राष्ट्रसेविकासमित्याः क्षेत्रप्रचारिका शशि-बघेला अवदत् यत् राष्ट्रनिर्माणे महिला-पुरुषयोः समानसहभागिता अनिवार्या अस्ति। सा अवदत् यत् सङ्घस्य प्रारम्भिककाले महिलानां प्रत्यक्षभूमिका सीमिता अवश्यं आसीत्, किन्तु मातृशक्तेः सहयोगः प्रेरणा च सदैव सह आसीत्। १९३६ तमे वर्षे राष्ट्रसेविकासमित्याः स्थापना महिलासहभागितायाः दिशि ऐतिहासिकं पदम् आसीत्।

Hindusthan Samachar / Divya Ranjan