मुख्यमन्त्रिण्या रेखागुप्तया बसयाने किशोर्याः बलात्कारस्य घटनायै दुःखं प्रकटितम्, अन्यराज्येभ्यः आगच्छतां बसयानानां जीपीएस्-व्यवस्थां दिल्ली-सर्वकारस्य प्रणाल्या सह संयोजयितुं सज्जता

नवदिल्ली, ३१ अगस्तमासः (हि.स.)। मुख्यमन्त्रिणी रेखागुप्ता विद्यालयेषु विद्यालयीयेषु च बसयानेषु बालकैः सह दुर्व्यवहारस्य घटनासु गहनं रोषं प्रकटयन्ती दोषिषु विद्यालयेषु कठोरकार्यवाहीं कर्तुं निर्देशान् दत्तवती। सा स्पष्टं कृतवती यत् एतादृशीषु घटनासु केवलं प्रत्यक्षदोषिणां विरुद्धमेव न, अपितु प्रमादं कुर्वतां विद्यालयप्रबन्धनस्य सम्बद्धानां उत्तरदायिजनानां च उत्तरदायित्वं निश्चितं करिष्यते।

मुख्यमन्त्रिणी अवदत् यत् विद्यालयं गच्छद्भिः निर्दोषैः बालकैः सह क्रियमाणः अमानवीयः व्यवहारः कस्यापि सभ्यसमाजस्य कृते अत्यन्तं पीडादायकः अस्ति। सर्वकारः एतादृशेषु प्रकरणेषु मौनं न स्थास्यति। सा अधिकारिभ्यः निर्देशं दत्तवती यत् बालकानां सुरक्षासम्बद्धेषु प्रकरणेषु तत्कालं कार्यवाहीं सुनिश्चितां क्रियेत तथा दोषिभ्यः विरुद्धं विध्यनुसारं कठोराः उपायाः क्रियेरन्।

जाफराबादस्थिते निजीदिवासेवा-केन्द्रे क्रीडाविद्यालये च त्रिवर्षीयबालकेण सह कथितस्य शारीरिकस्य यौनदुर्व्यवहारस्य च घटनायै मुख्यमन्त्रिणी गहनं रोषं प्रकटितवती। सा सम्बद्धं विद्यालयं मुद्राङ्कितुं निर्देशान् दत्तवती। मुख्यमन्त्रिणी अवदत् यत् विधिः स्वकार्यं करोति, किन्तु सर्वकारः अपि एतादृशेषु गम्भीरेषु प्रकरणेषु मूकदर्शकः न भविष्यति। सा इदमपि अवदत् यत् यदि पीडितबालकस्य परिवारेण विधिसम्बद्ध-सहायतायाः आवश्यकता भविष्यति, तर्हि दिल्लीसर्वकारः तस्मै आवश्यकां सहायतां प्रदास्यति।

मुख्यमन्त्रिणी बवानाक्षेत्रे त्रिवर्षीयायाः नर्सरीछात्रायाः यौनशोषणस्य घटनायै अपि गहनं दुःखं प्रकटितवती। अस्मिन् प्रकरणे विद्यालयीयबसचालकस्य कथित-सङ्लग्नतायां सा कठोरं रोषं प्रकटयन्ती विद्यालयप्रबन्धनस्य उत्तरदायित्वे प्रश्नं उत्थापितवती। सा अवदत् यत् विद्यालयप्रबन्धनेन एतत् सुनिश्चितं करणीयं यत् बालकानां आनीयनयनं कुर्वतां बसकर्मचारिणां समुचितपरीक्षणं निरीक्षणं च भवेत्। सा स्पष्टं कृतवती यत् भविष्ये कस्यापि विद्यालयीयबसस्य कर्मचारी एतादृशे प्रकरणे संलिप्तः दृश्यते चेत् सम्बद्धस्य विद्यालयप्रबन्धनस्य उत्तरदायित्वमपि निश्चितं करिष्यते। सर्वकारः एतत् सुनिश्चितं करिष्यति यत् विद्यालयेषु, दिवासेवाकेन्द्रेषु विद्यालयीयपरिवहनव्यवस्थायां च बालकानां सुरक्षायै निर्धारितानां दायित्वानां पूर्णतया पालनं भवेत् तथा प्रमादे ज्ञाते सति उत्तरदायिजनानां विरुद्धं कठोरकार्यवाहीं क्रियेत।

मुख्यमन्त्रिणी दिल्ली-एनसीआर-क्षेत्रे उत्तरप्रदेशस्य षोडशवर्षीयायाः किशोर्याः चलद्बसयाने बलात्कारस्य घटनायै अपि गहनं दुःखं प्रकटितवती। घटनायां बसचालकस्य परिचालकस्य च भूमिकायां चिन्तां प्रकटयन्ती सा अवदत् यत् एतादृश्यः घटनाः सम्पूर्णं सभ्यसमाजं विचालयन्ति। दिल्लीसर्वकारः अस्मिन् विषये समीपस्थराज्यसर्वकारैः सह अपि संवादं करिष्यति, येन दिल्लीं प्रति आगच्छत्सु दिल्लीं त्यजत्सु च बसयानेषु महिलानां बालकानां च सुरक्षा अधिकं सुदृढां कर्तुं शक्येत।

सा अवदत् यत् एतादृशी व्यवस्था विकसितुं कार्यं करिष्यते, यस्याः अन्तर्गतं अन्यराज्येभ्यः दिल्लीं प्रविशन्तीनां बसयानानां जीपीएस-व्यवस्था दिल्ली-सम्बद्धविभागस्य प्रणाल्या सह संयोजिता भवेत्। अनेन बसयानस्य स्थानस्य आवश्यकसूचनानां च निरीक्षणं कर्तुं शक्यते तथा आपत्कालीनस्थितौ शीघ्रकार्यवाहीं कर्तुं सहायता भविष्यति।

Hindusthan Samachar / Divya Ranjan