लखनऊ, ३१ अगस्तमासः। प्रदेशे महिलानां सहभागितायाः अधिकाराणां च विषये जागरूकतावर्धनस्य दिशि योगीसर्वकारस्य प्रयत्नः शैक्षणिकसंस्थानानां माध्यमेन अपि गतिं प्राप्नोति। अस्यैव क्रमस्य अन्तर्गतं उत्तरप्रदेशभाषासंस्थानस्य, लखनऊ तथा पण्डितदीनदयालोपाध्यायस्य राजकीयमहाविद्यालयस्य संयुक्ततत्त्वावधाने सोमवासरे “नार्याः राजनीतिकाः चुनौतयः तथा नारीवन्दनम् अधिनियमः” इति विषये निबन्धप्रतियोगिता आयोजिता।

प्रतियोगितायां महाविद्यालयस्य शताधिकाः छात्राः उत्साहपूर्वकं सहभागं कृतवत्यः। कार्यक्रमस्य उद्देश्यम् छात्राणां महिलासम्बद्धैः संवैधानिकैः अधिकारैः, राजनीतिकसहभागितया, नारीवन्दनम् अधिनियमस्य च विविधैः पक्षैः परिचितीकरणम् आसीत्। प्रतियोगितायाः समये छात्राभिः विषये स्वविचाराः निबन्धमाध्यमेन प्रभावीरीत्या प्रस्तुताः। छात्राणाम् उत्साहेन कार्यक्रमः विशेषरूपेण आकर्षकः अभवत्।

भाषाविभागस्य प्रयत्नेन विचाराणां जागरूकतायाश्च प्राप्तः मञ्चः

उत्तरप्रदेशभाषासंस्थानेन महाविद्यालयेन सह संयुक्तरूपेण आयोजितः अयं कार्यक्रमः भाषां, लेखनं, सामाजिकजागरूकतां च परस्परं संयोजयितुं महत्त्वपूर्णः प्रयासः मन्यते। निबन्धप्रतियोगितायाः माध्यमेन छात्राभ्यः स्वविचाराणां शब्देषु अभिव्यक्तेः अवसरः प्राप्तः। तेन सह महिलानां राजनीतिकसहभागितायाः सदृशे समसामयिके विषये चिन्तनस्य अवसरः अपि प्राप्तः।

विजेतृभ्यः पुरस्काराः, प्रतिभागिभ्यः प्रमाणपत्राणि च

भाषाविभागस्य निदेशकः सर्वेशकुमारसिंहः अवदत् यत् प्रतियोगितायाः विजेतृभ्यः पुरस्काराः सर्वेभ्यः प्रतिभागिभ्यः प्रमाणपत्राणि च सितम्बरमासस्य प्रथमदिने महाविद्यालयस्य सभागारे आयोज्यमाने कार्यक्रमे प्रदास्यन्ते। महाविद्यालयस्य प्राचार्या प्रो. शिवानी श्रीवास्तवा छात्राभ्यः लेखनपुस्तिकां लेखनीं च वितर्य प्रतियोगितायाः शुभारम्भम् अकरोत्। प्रतियोगितायां प्रथमं, द्वितीयं, तृतीयं च स्थानं प्राप्तवत्यः छात्राः पुरस्कृताः भविष्यन्ति।

Hindusthan Samachar / Dheeraj Maithani