गुवाहाटी, ०५ अगस्तमासः (हि.स.)। भारत-रत्नेन लोकप्रिय-गोपीनाथ-बोरदोलोई-महोदयस्य ७६ तम्याः पुण्यतिथेः अवसरे बुधवासरे कामरूप-मेट्रो-जनपद-प्रशासनेन लोक-कल्याण-दिवसः आचरितः। अस्मिन् अवसरे लोकप्रिय-गोपीनाथ-बोरदोलोई-महोदयस्य समाधि-स्थले नवग्रह-श्मशाने आयोजिते श्रद्धाञ्जलि-कार्यक्रमे न्यू-गुवाहाटी-क्षेत्रस्य विधायकः दिप्लुरञ्जन-शर्मा मुख्यातिथिरूपेण उपस्थितः अभवत् तथा लोकप्रिय-गोपीनाथ-बोरदोलोई-महोदयस्य प्रतिमायां पुष्पाञ्जलिं समर्पितवान्।

विधायकः अवदत् यत् गोपीनाथ-बोरदोलोई-महोदयेन भारतवर्षस्य सार्वभौमत्वस्य अखण्डतायाश्च रक्षणाय आङ्ग्लानां विरुद्धं संघर्षः कृतः। तस्य सुदृढ-नेतृत्व-क्षमतायाः कारणेन असमः सुरक्षितः अभवत्। तादृशस्य अद्वितीयस्य व्यक्तित्वस्य आदर्शं युवावंशेन अवश्यमेव स्वीकरणीयम्।

श्रद्धाञ्जलि-कार्यक्रमेण सह आयोजितायां सर्वधर्म-प्रार्थना-सभायां कस्तूरबा-सेवा-आश्रमस्य सेविकाः सर्वधर्म-प्रार्थनायां सहभागितां कृतवत्यः। अस्मिन् कार्यक्रमे गुवाहाटी-नगर-निगमस्य महापौरः मृगेन-शरणिया, अपर-जनपदायुक्तः राजा-वैश्यः, भारत-रत्न-लोकप्रिय-गोपीनाथ-बोरदोलोई-महोदयस्य पुत्रः बलीन-बोरदोलोई तथा तस्य परिवारजनाः, गुवाहाटी-नगर-निगमस्य पार्षदाः, जनपद-प्रशासनस्य अधिकारी-कर्मचारिणश्च उपस्थिताः आसन्।

Hindusthan Samachar / Divya Ranjan