सीहोरम्, ०५ अगस्तमासः (हि.स.)। मध्यप्रदेशस्य सीहोर-जनपदस्य कृषकेभ्यः आधुनिक-कृषि-प्रौद्योगिकीनाम्, उन्नत-कृषेः तथा सर्वकारस्य कृषक-हितैषी-योजनानां च सूचनां प्रदातुं ०७ अगस्तमासे मध्याह्ने १२ वादने स्थानीय-कृषि-उपज-मण्डी इत्यत्र बलराम-कृषि-महोत्सवस्य आयोजनं भविष्यति। कार्यक्रमे जनप्रतिनिधयः उपस्थिताः भविष्यन्ति, मुख्यमन्त्री डॉ. मोहन-यादवः तु आभासीय-माध्यमेन कृषकान् सम्बोधयिष्यति।

जनपद-प्रशासनेन बुधवासरे सूचितं यत् बलराम-कृषि-महोत्सवस्य आयोजनाय व्यापकाः सज्जताः क्रियन्ते। महोत्सवे सम्पूर्ण-जनपदात् कृषकाणां सहभागिता सुनिश्चिती क्रियते। कार्यक्रमे कृषि-कृषक-कल्याण-विभागेन सह विभिन्नैः विभागैः कृष्याधारिताः प्रदर्शिन्यः, विक्रय-स्थानानि च स्थापयिष्यन्ते। एतेषु कृषकेभ्यः आधुनिक-कृषि-यन्त्राणां, उन्नत-बीजानां, प्राकृतिक-जैविक-कृषेः, सस्य-विविधीकरणस्य, सिञ्चन-प्रौद्योगिकीनां, उद्यानिकी-कृषेः, पशुपालनस्य तथा सर्वकारस्य विभिन्नानां कृषक-कल्याणकारी-योजनानां विस्तृत-सूचना प्रदास्यते। सहैव कृषकेभ्यः योजनानां लाभं प्राप्तुं प्रक्रियायाः विषये अपि अवगतं कारयिष्यते।

महोत्सवस्य प्रमुखम् आकर्षणं कृषि-वैज्ञानिकैः कृषकाणां मार्गदर्शनं भविष्यति। कृषि-विशेषज्ञाः वैज्ञानिक-कृषेः, मृदा-स्वास्थ्य-प्रबन्धनस्य, जल-संरक्षणस्य, सस्य-सुरक्षायाः, उन्नत-उत्पादन-प्रौद्योगिकीनां तथा परिवर्तमान-जलवाय्वनुकूल-कृषि-प्रबन्धनस्य विषये कृषकेभ्यः व्यावहारिकं ज्ञानं प्रदास्यन्ति। कृषकाः विशेषज्ञैः सह प्रत्यक्षं संवादं कृत्वा स्वकीयाः कृषि-सम्बद्धाः समस्याः अपि समाधातुं शक्नुवन्ति।

कार्यक्रमे कृषकेभ्यः नवीन-कृषि-प्रौद्योगिकीनाम् अवलम्बनस्य, उत्पादन-व्ययस्य न्यूनीकरणस्य तथा आयस्य वर्धनस्य उपायानां विषये सूचना प्रदास्यते। सहैव कृषि-विभागस्य विभिन्नानां योजनानाम्, अनुदानस्य, कृषि-यान्त्रीकरणस्य तथा अन्यासां सुविधानां विषये अपि विस्तरेण सूचना उपलब्धा भविष्यति। जनपद-प्रशासनेन जनपदस्य कृषकेभ्यः आह्वानं कृतं यत् ते अधिकाधिक-सङ्ख्यया बलराम-कृषि-महोत्सवे सम्मिलिताः भूत्वा कृषि-विशेषज्ञानां मार्गदर्शनस्य तथा सर्वकारीय-योजनानां लाभं प्राप्नुयुः। अयं महोत्सवः कृषकान् आधुनिकाभिः लाभप्रदाभिः च कृषि-पद्धतिभिः संयोजयितुं तथा कृषि-क्षेत्रे नवाचारस्य प्रोत्साहनाय महत्त्वपूर्णः अवसरः भविष्यति।

Hindusthan Samachar / Divya Ranjan