शिमला, 05 अगस्तमासः (हि.स.)। पूर्वमुख्यमन्त्री पूर्वकेन्द्रीयमन्त्री च शान्ताकुमारः संसदि वर्धमानकोलाहलस्य सार्थकचर्चायाः न्यूनतायाश्च विषये चिन्तां प्रकटितवान्। तेन उक्तं यत् संसदि सार्थकचर्चा अल्पा दृश्यते कोलाहलः तु अधिकः दृश्यते। तेन आग्रहः कृतः यत् संसदि कर्म नास्ति चेत् वेतनमपि नास्ति इति सिद्धान्तः प्रवर्तनीयः।

शान्ताकुमारः बुधवासरे प्रदत्ते वक्तव्ये अवदत् यत् अनेकवारं संसदीयसत्रं कस्यापि चर्चाविनैव समाप्तिं गच्छति यदा च अनेकानि महत्त्वपूर्णानि विधेयकानि अपि पर्याप्तचर्चां विना पारितानि भवन्ति।

तेन उक्तं यत् देशभक्तानां त्यागेन प्राप्तं लोकतन्त्रम् अद्य दुर्बलम् इव दृश्यते।

पूर्वकेन्द्रीयमन्त्री अवदत् यत् संसदः सञ्चालनाय कोटिशः रूप्यकाणि व्ययीकृतानि भवन्ति। यदा संसदि कार्यव्यवहारः स्थगितः भवति केवलं घोषवाक्यानि कोलाहलः उच्चशब्दः च भवति तदापि सांसदेभ्यः वेतनं भत्तं च प्रदीयते। तेन आग्रहः कृतः यत् येषां सांसदानां कारणात् सदनस्य कार्यवाही बाध्यते कार्यं च न सम्पद्यते तेभ्यः तस्य अवधेः वेतनं भत्तं च न प्रदेयम्।

शान्ताकुमारः व्यङ्ग्यात्मकां टिप्पणीं कुर्वन् अवदत् यत् विश्वस्य बृहत्तमस्य लोकतन्त्रस्य संसद् केवलं द्वयोः अवसरोः पूर्णतया शान्ता दृश्यते। प्रथमः कस्यचित् महानेतुः निधनानन्तरं शोकप्रस्तावस्य समये द्वितीयः च यदा सांसदानां वेतनभत्तवृद्धिसम्बद्धं विधेयकं सदने उपस्थाप्यते। तेन उक्तं यत् एतौ द्वौ अवसरौ विहाय संसद् अनेकवारं शब्दसभा इव भवति।

तेन देशस्य सर्वान् राजनैतिकपक्षान् नेतॄन् च लोकतन्त्रस्य वर्धमानम् अवमूल्यनं निरोद्धुं संसदः गरिमाणं लोकतान्त्रिकपरम्पराणां संरक्षणं च सुनिश्चितं कर्तुं गम्भीरप्रयत्नान् कर्तुम् आह्वानम् अकरोत्।

---------------

Hindusthan Samachar / Dheeraj Maithani