वित्तवर्षे २०२६ २०२७ राज्यस्य कुलायः त्रिलक्षपञ्चाशत्सहस्रसप्तविंशतिः कोटिरूप्यकाणि। राजस्वघाटः पञ्चपञ्चाशत्सहस्रसप्तशतपञ्चसप्ततिः कोटिरूप्यकाणि। राज्यस्य कुलऋणं दशलक्षाष्टानवतिसहस्रसप्तशतपञ्चषष्टिः कोटिरूप्यकाणि भविष्यति इति अनुमानम्।

चेन्नई ०५ अगस्तमासः।तमिलगवेत्रिकडगम् टीवीके सर्वकारेण बुधवासरे विधानसभायां वित्तवर्षस्य २०२६ २०२७ प्रथमं पूर्णबजटम् उपस्थापितम्। वित्तविभागस्य दायित्वं वहन् मन्त्री मरियाविल्सन प्रातः दशवादने राजस्वभाषणम् आरब्धवान् यत् मध्याह्ने द्वादशवादनत्रयस्त्रिंशन्मिनिटपर्यन्तम् अभवत्। प्रायः द्विघण्टात्रयस्त्रिंशन्मिनिटात्मकस्य स्वस्य प्रथमराजस्वभाषणे तेन शिक्षा महिलाकल्याणं जीविका आधारसंरचना पर्यटनं कृषि सामाजिकन्यायः सुशासनं चेति सर्वकारस्य प्रमुखप्राथमिकताः इति प्रतिपादितम्।

राजस्भाषणे वित्तमन्त्री अवदत् यत् वित्तवर्षे २०२६ २०२७ राज्यस्य कुलायः त्रिलक्षपञ्चाशत्सहस्रसप्तविंशतिः कोटिरूप्यकाणि भविष्यति इति अनुमानम्। राजस्वघाटः पञ्चपञ्चाशत्सहस्रसप्तशतपञ्चसप्ततिः कोटिरूप्यकाणि भविष्यति इति अनुमानितम्। राज्यस्य कुलऋणं दशलक्षाष्टानवतिसहस्रसप्तशतपञ्चषष्टिः कोटिरूप्यकाणि भविष्यति इति अपि अनुमानितम्। तेन उक्तं यत् तमिलनाडुराज्यस्य वित्तीयस्थितेः पूर्णतया सम्यग्व्यवस्थापनाय न्यूनातिन्यूनं द्विवर्षकालः अपेक्षितः।राजस्वे महिलाकल्याणाय अनेकाः महत्त्वपूर्णाः घोषणाः कृताः। सर्वकारेण सर्वाः महिलाः परिवारस्य सदस्याः इति स्वीकृत्य ताभ्यः अष्टग्रामपरिमितं सुवर्णमुद्रिकां कौशेयवस्त्रं च प्रदातुं योजना उद्घोषिता यस्य कृते अष्टशतद्वादशकोटिरूप्यकाणां प्रावधानं कृतम्। महिलानाम् आर्थिकसशक्तीकरणाय सिङ्गप्पेणसशक्तीकरणयोजना आरभ्यते तथा महिला स्वसहायतासमूहेभ्यः अस्मिन् वर्षे अष्टत्रिंशत्सहस्रकोटिरूप्यकाणां बैंकऋणं प्रदातुं लक्ष्यं निर्धारितम्।

शिक्षाक्षेत्राय सर्वकारेण अनेकाः नूतनाः योजनाः उद्घोषिताः। विद्यालयशिक्षाविभागाय चतुश्चत्वारिंशत्सहस्रपञ्चशतसप्तविंशतिः कोटिरूप्यकाणि विनियोजितानि। वेत्रिमणिक्कणिनीयोजनाय अष्टसहस्रत्रिशतत्रिनवतिः कोटिरूप्यकाणि व्ययीकृतानि भविष्यन्ति। तन्त्रज्ञानदक्षतावृद्ध्यर्थं द्विसहस्रकोटिरूप्यकाणां व्ययेन विद्यार्थिभ्यः सङ्गणकयन्त्राणि वितरिष्यन्ते। राज्यस्य दशसहस्रसर्वकारीयविद्यालयेषु सुपरक्लीन सुपरकैम्पस् योजना प्रवर्तिष्यते। बालानां प्रारम्भिकपालनपोषणार्थं पञ्चशतानि नूतनानि आङ्गनवाडीकेन्द्राणि स्थापयिष्यन्ते।

तमिलनाडुसर्वकारेण कृत्रिमबुद्धिमत्तायाः संवर्धनार्थं विश्वस्तरीयपाठ्यक्रमनिर्माणाय विशेषज्ञसमितेः गठनस्य घोषणा कृता। अभियान्त्रिकी पॉलिटेक्निक संस्थासु पञ्चलक्षयुवभ्यः कृत्रिमबुद्धिमत्तादक्षताप्रशिक्षणं प्रदास्यते। अपरं नवतिः कोटिरूप्यकाणां व्ययेन पञ्च नूतनाः औद्योगिकप्रशिक्षणसंस्थाः आईटीआई तथा नूतनाः राजकीयविधिमहाविद्यालयाः अपि स्थापयिष्यन्ते।

युवकल्याणक्रीडाविकासविभागाय एकसहस्रैकपञ्चाशत्कोटिरूप्यकाणां प्रावधानं कृतम्। राज्ये पञ्चाशत्कोटिरूप्यकाणां व्ययेन दश ओलम्पिकविशेषकेन्द्राणि स्थापयिष्यन्ते। ग्रामीणक्रीडास्पर्धानां संवर्धनाय द्विचत्वारिंशत्कोटिरूप्यकाणि क्रीडकानां वित्तीयसहायतायै द्वाविंशत्कोटिरूप्यकाणि च विनियोजितानि।

सामाजिकन्यायविभागाय त्रिसहस्रनवशतसप्तत्रिंशत्कोटिरूप्यकाणि अयोथीदासपण्डितरआवासविकासयोजनाय त्रिशतकोटिरूप्यकाणि च विनियोजितानि। कच्चगृहाणां पक्कगृहेषु परिवर्तनयोजनायां राजकीयानुदानं त्रिलक्षरूप्यकेभ्यः वर्धयित्वा पञ्चलक्षरूप्यकाणि कृतम्। प्रथमचरणे सप्ततिसहस्रगृहाणां निर्माणाय अनुमतिः प्रदास्यते।

पर्यटनक्षेत्रस्य संवर्धनाय अस्मिन् राजस्वे मामल्लपुरं अन्ताराष्ट्रियपर्यटनकेन्द्ररूपेण विकसितुं घोषणा कृता। अस्य कृते केन्द्रसर्वकारात् द्विशतकोटिरूप्यकाणां सहायतां प्राप्तुं प्रयत्नः भविष्यति। कावेरी वैगई तामिरपरणी नदीषु नदीजलपर्यटनविकासाय त्रिपञ्चाशत्कोटिरूप्यकाणि खाद्यपर्यटनकला क्षेत्रयोः कृते विंशत्कोटिरूप्यकाणि च विनियोजितानि। पर्यावरणपर्यटनस्य स्थानीयजनजातीयसमुदायानां जीविकासुधारस्य च कृते पञ्चविंशत्कोटिरूप्यकाणि विनियोजितानि। पर्यटनकलासंस्कृतिविभागाय कुलं सप्तशतसप्तसप्ततिः कोटिरूप्यकाणि प्रदास्यन्ते।

आधारसंरचनाक्षेत्रे चेन्नईनगरस्य ब्रॉडव क्षेत्रे एकसहस्रत्रिशतसप्तसप्तत्कोटिरूप्यकाणां व्ययेन एकीकृतन्यायालयपरिसरनिर्माणस्य घोषणा कृता। अस्य व्यवहार्यताअध्ययनाय दशकोटिरूप्यकाणां प्रावधानं कृतम्। न्यायविभागाय द्विसहस्रचतुःशतषडशीतिकोटिरूप्यकाणि विनियोजितानि।

आपदाप्रबन्धनपर्यावरणसंरक्षणयोः अन्तर्गतं सुपरएलनीनो प्रभावस्य निवारणाय त्रिशतचत्वारिंशत्कोटिरूप्यकाणां प्रावधानं कृतम्। सामाजिकसुरक्षायोजनाभ्यः पञ्चसहस्रचतुःशतद्विषष्टिकोटिरूप्यकाणि राजस्वआपदाप्रबन्धनविभागाय एकादशसहस्रपञ्चशतद्वात्रिंशत्कोटिरूप्यकाणि च विनियोजितानि।

गृहविभागाय मद्यनिषेधआबकारीविभागाय च सप्तदशसहस्रद्विशतनवतिः कोटिरूप्यकाणां प्रावधानं कृतम्। सिङ्गप्पेणविशेषबलाय त्रिशतचतुःपञ्चाशत्कोटिरूप्यकाणि मादकद्रव्यनिवारणाय सप्तत्कोटिरूप्यकाणि पुलिसकर्मिणां आवासनिर्माणाय चतुश्शतैकत्रिंशत्कोटिरूप्यकाणि च विनियोजितानि।

ग्रामीणविकासविकाससंवर्धनार्थं नूतनविकासयोजनाय द्वादशसहस्रषट्शतषट्चत्वारिंशत्कोटिरूप्यकाणि व्ययीकृतानि भविष्यन्ति। नगरीयप्रदेशानां समीपवर्तिनां ग्रामीणक्षेत्राणां विकासाय सहस्रकोटिरूप्यकाणि नेइथलपुनरुद्धारअभियानाय चत्वारिंशत्कोटिरूप्यकाणि च विनियोजितानि। ग्रामीणविकासविभागाय कुलं नवत्रिंशत्सहस्रषट्शतनवकोटिरूप्यकाणि विनियोजितानि।

राजस्वस्य प्रमुखबिन्दवः

तमिलनाडुराज्यस्य त्रिलक्षपञ्चाशत्सहस्रकोटिरूप्यकाणाम् आयानुमानेन बजटम् उपस्थापितम्। राजस्वघाटः पञ्चपञ्चाशत्सहस्रसप्तशतपञ्चसप्ततिः कोटिरूप्यकाणि।

महिलाभ्यः अष्टग्रामपरिमितसुवर्णमुद्रिका कौशेयवस्त्रं च प्रदातुं योजना। अस्य कृते अष्टशतद्वादशकोटिरूप्यकाणां प्रावधानम्।

महिला स्वसहायतासमूहेभ्यः अष्टत्रिंशत्सहस्रकोटिरूप्यकाणां बैंकऋणप्रदानस्य लक्ष्यम्।

विद्यालयशिक्षायै चतुश्चत्वारिंशत्सहस्रपञ्चशतसप्तविंशतिः कोटिरूप्यकाणि। विद्यार्थिभ्यः सङ्गणकयन्त्रवितरणम्।

पञ्चलक्षयुवभ्यः कृत्रिमबुद्धिमत्तादक्षताप्रशिक्षणम्। विशेषज्ञसमितेः गठनम्।

दशसहस्रसरकारीयविद्यालयेषु सुपरक्लीन सुपरकैम्पस् योजना प्रवर्तिष्यते।

मामल्लपुरम् अन्ताराष्ट्रियपर्यटनकेन्द्ररूपेण विकसितं भविष्यति। नदीपर्यटनस्य अपि संवर्धनम्।

ग्रामीणविकासाय नवत्रिंशत्सहस्रषट्शतनवकोटिरूप्यकाणि। नूतनजीविकायोजनाय द्वादशसहस्रषट्शतषट्चत्वारिंशत्कोटिरूप्यकाणां व्ययः।

चेन्नईनगरे एकसहस्रत्रिशतसप्तसप्तत्कोटिरूप्यकाणां व्ययेन एकीकृतन्यायालयपरिसरनिर्माणम्।

अदृढगृहाणां अदृढगृहेषु परिवर्तनाय राजकीयानुदानं पञ्चलक्षरूप्यकाणि कृतम्।

तमिलनाडुसर्वकारेण दश ओलम्पिकविशेषकेन्द्राणि स्थापयिष्यन्ते।

सुपरएलनीनो प्रभावनिवारणाय त्रिशतचत्वारिंशत्कोटिरूप्यकाणां विशेषप्रावधानम्।

वित्तमन्त्री अवदत् यत् तमिलनाडुराज्यस्य वित्तीयस्थितेः सम्यग्व्यवस्थापनाय द्विवर्षकालः अपेक्षितः।

गृहविभागाय सप्तदशसहस्रद्विशतनवतिः कोटिरूप्यकाणि। पुलिसआवासनिर्माणे मादकद्रव्यनिवारणे च विशेषप्राधान्यम्।

टीवीके सर्वकारस्य प्रथमे पूर्णराजस्वे शिक्षा सामाजिकन्यायः सुशासनं च प्रमुखप्राथमिकतारूपेण स्वीकृतम्।

राज्यस्य कुलऋणं दशलक्षाष्टानवतिसहस्रसप्तशतपञ्चषष्टिः कोटिरूप्यकाणि भविष्यति इति अनुमानम्। वित्तीयसुधाराय सर्वकारस्य विशेषेण बलम्।

Hindusthan Samachar / Dheeraj Maithani