Enter your Email Address to subscribe to our newsletters
शिमला, 06 अगस्तमासः (हि.स.)।
मुख्यमन्त्री सुखविन्द्रसिंहसुक्खू जनान् प्रति प्रतिवर्षम् अवश्यमेकस्य वृक्षस्य रोपणं तस्य नियमितपालनं च कर्तुम् आह्वानम् अकरोत्। सः अवदत् यत् पर्यावरणसंरक्षणं केवलं वृक्षारोपणपर्यन्तं सीमितं न भवेत्, अपितु रोपितानां वृक्षाणां जीवितत्वसंरक्षणयोः अपि समरूपेण ध्यानं दातव्यम्। तस्य कथनम् आसीत् यत् यदि प्रदेशस्य प्रत्येकः जनः प्रतिवर्षम् एकं वृक्षं रोपयित्वा तस्य सम्यक् पालनं कुर्यात्, तर्हि एतत् प्रकृतेः भाविपीढीनां च कृते महान् योगदानं भविष्यति।
मुख्यमन्त्री एतद् गुरुवासरे शिमलानगरस्थिते स्वकीयाधिकारिकनिवासे ओक ओवर इत्यत्र नगरनिगम-शिमलायाः ‘ग्रीन शिमला, अवर शिमला’ अभियानेन सप्ताहव्यापिनः वृक्षारोपणसप्ताहस्य शुभारम्भावसरे उक्तवान्। सः स्वयम् वृक्षारोपणं कृत्वा अभियानस्य शुभारम्भम् अकरोत् तथा प्रदेशवासिनः अधिकाधिकसंख्यया वृक्षान् रोपयितुम् आह्वानम् अकरोत्। सः अवदत् यत् पर्यावरणस्य संरक्षणाय जनसहभागिता सर्वाधिकं महत्त्वपूर्णा अस्ति तथा अस्यां दिशि सामूहिकप्रयत्नानाम् आवश्यकता वर्तते।
मुख्यमन्त्री अवदत् यत् नगरनिगम-शिमलया अस्मिन् वर्षे अभियानस्य अन्तर्गतं पञ्चसहस्रात् दशसहस्रपर्यन्तं वृक्षाणां रोपणस्य लक्ष्यं निर्धारितम् अस्ति। सः अवदत् यत् अयं अभियानः निरन्तरं तृतीयवर्षे सञ्चाल्यते। गतवर्षे नगरनिगमेन चमियाना-पर्वतीयक्षेत्रम् आदाय तत्र प्रायः त्रिसहस्रं वृक्षाः रोपिताः आसन्। अस्मिन् वर्षेऽपि तस्मिन्नेव क्षेत्रे त्रिसहस्राधिकाः वृक्षाः रोपयिष्यन्ते। सः अवदत् यत् गतवर्षे रोपितानां वृक्षाणां जीवितत्वस्य दरः अत्यन्तम् उत्साहवर्धकः आसीत्, येन अस्य अभियानस्य शुभफलानि दृश्यन्ते।
अस्मिन् अवसरे मुख्यमन्त्री नगरनिगमस्य पार्षदेभ्यः बानवृक्षस्य देवदारुवृक्षस्य च पौधान् अपि वितरितवान्। सः अवदत् यत् सप्ताहव्यापिनि अस्मिन् अभियाने प्रदेशशासनस्य मन्त्रिणः अपि विभिन्नस्थानेषु वृक्षारोपणकार्यक्रमेषु सहभागं करिष्यन्ति। तस्य कथनम् आसीत् यत् जनसहभागितया एतादृशाः अभियानाः अधिकं प्रभावशालिनः भवन्ति तथा पर्यावरणसंरक्षणस्य सन्देशः समाजस्य प्रत्येकं वर्गं प्रति सम्यक् प्राप्नोति।
---------------
Hindusthan Samachar / Dheeraj Maithani