Enter your Email Address to subscribe to our newsletters
भीलवाड़ा, 06 अगस्तमासः (हि.स.)।भीलवाडा। राजस्थानगुर्जरमहासभया केन्द्रसर्वकारस्य प्रकाशनविभागेन प्रकाशितायां भारत के नारी रत्न इति पुस्तिकायां वीराङ्गनापन्नाधायाः जातीयपरिचयस्य विषये गम्भीरः आक्षेपः प्रकटितः। महासभायाः प्रदेशाध्यक्षस्य पूर्वमन्त्रिणः कालूलालगुर्जरस्य नेतृत्वे गुरुवासरे संस्थायाः पदाधिकारीणः प्रधानमन्त्री नरेन्द्रमोदिनः नाम्ना जिलाधिकारिणे ज्ञापनं समर्प्य पुस्तिकायां प्रकाशितस्य विवरणस्य ऐतिहासिकतथ्यानुसारं संशोधनस्य आग्रहम् अकुर्वन्।
ज्ञापने उक्तं यत् प्रकाशनविभागेन वर्षे २०२२ अष्टमे पुनर्मुद्रणे प्रकाशितायाः भारत के नारी रत्न (सम्पादिका ऋतुश्री, ISBN: 978-93-5409-692-1) इति पुस्तिकायाः अष्टमे पृष्ठे प्रकाशिते पन्नाधायाः जीवनपरिचये तस्याः मूलाम् ऐतिहासिकीं परिचितिं जातीयपरिचयं च परिवर्त्य खींची राजपूत वंश की क्षत्राणी इति उल्लिखितम् अस्ति। महासभायाः आरोपः अस्ति यत् एतादृशं प्रस्तुतीकरणम् ऐतिहासिकतथ्यविरुद्धं भ्रमजनकं च अस्ति, येन गुर्जरसमाजस्य भावनाः आहताः अभवन्।
प्रदेशाध्यक्षः कालूलालगुर्जरः अवदत् यत् पन्नाधायाः बलिदानम् भारतीयइतिहासस्य अमरः अध्यायः अस्ति तथा तस्याः वास्तविकाम् ऐतिहासिकीं परिचितिं कस्यापि प्रकारेण परिवर्तयितुं न युक्तम्। तेन अभिहितं यत् राजपूतसमाजे धात्रीस्थापनस्य परम्परा गुर्जरसमाजेन सह सम्बद्धा आसीत् तथा इतिहासे उपलब्धप्रमाणानाम् आधारेण पन्नाधायाः परिचयः प्रतिष्ठितः अस्ति। अतः केन्द्रसर्वकारेण पुस्तिकायां प्रकाशिततथ्यानां पुनः परीक्षणं कृत्वा आवश्यकं संशोधनं विधातव्यम्।
महासभया ज्ञापने एषापि माग्धा कृता यत् भविष्ये इतिहाससम्बद्धानां महापुरुषाणां विभूतिनां च विषये केष्वपि शासकीयप्रकाशनेषु तथ्यदोषाः न भवेयुः तथा प्रकाशनात् पूर्वम् ऐतिहासिकप्रमाणानां गम्भीरं परीक्षणं कारयितव्यम्। संस्थायाः मतम् अस्ति यत् इतिहाससम्बद्धेषु विषयेषु कस्यापि प्रकारस्य तथ्यपरिवर्तनं सामाजिकविवादस्य भ्रमस्य च स्थितिं जनयितुं शक्नोति।
ज्ञापनसमर्पणसमये अखिलभारतीयगुर्जरमहासभायाः प्रदेशाध्यक्षः रामप्रसादधाबाई, पन्नाधायसेवासंस्थानस्य करेडाध्यक्षः लाखारामगुर्जरः, राजस्थानगुर्जरमहासभायाः प्रदेशोपाध्यक्षः शङ्करलालगुर्जरः, भीलवाडाजनपदाध्यक्षः मोहनलालसराधना, अखिलभारतीयगुर्जरमहासभायाः जनपदाध्यक्षः राधेश्यामभडाना, युवाजनपदाध्यक्षः नारायणलालकाकडा, जनपदमहामन्त्री गोपालगुर्जरः, जनपदोपाध्यक्षः भँवरलालहरलः, राधेश्यामगुढा, शान्तिलालजिन्दलः इत्यादयः संस्थायाः अनेके पदाधिकारी, तहसीलाध्यक्षाः तथा बहुसंख्यकाः समाजजनाः उपस्थिताः आसन्।
महासभायाः पदाधिकारीणः अवदन् यत् तेषां उद्देश्यं कस्यचित् समाजविशेषस्य विरोधः नास्ति, अपितु ऐतिहासिकतथ्यानां प्रामाणिकतायाः संरक्षणम् एव। तैः केन्द्रसर्वकारं प्रति आग्रहः कृतः यत् अस्य विषयस्य निष्पक्षसमीक्षां विधाय इतिहासप्रमाणानुरूपम् आवश्यकं संशोधनं क्रियताम्, येन भविष्ये एतादृशाः विवादाः न उत्पद्येरन्।
---------------
Hindusthan Samachar / Dheeraj Maithani