शासकीययोजनानां कार्यक्रमाणां च कार्यान्वयनस्य क्षेत्रीयस्तरे समीक्षां करिष्यन्ति

मुख्यमन्त्री डा. मोहनयादवेन छिन्दवाडे अभिनन्दनसमारोहे सम्बोधनं कृतम्।

भोपालः, ०७ अगस्तमासः (हिस.)।

मध्यप्रदेशस्य मुख्यमन्त्री डा. मोहनयादवः अवदत् यत् विकासाय जनकल्याणाय च राज्यसर्वकारः दूरदर्शिना दृष्टिकोणेन कार्यं करोति। अद्य छिन्दवाडतः नवीनस्य आरम्भस्य शुभारम्भः क्रियते। सामान्यतया दृश्यते यत् कार्यालयेषु अत्यधिकाः उपवेशनाः भवन्ति। अस्याः स्थितेः परिवर्तनार्थं निर्णयः कृतः यत् अधुना जनविश्वासाभियानस्य अन्तर्गतं प्रत्येकस्मिन् शुक्रवासरे कस्मिन्नपि कार्यालये किमपि उपवेशनं न भविष्यति। सर्वे अधिकारिणः जनानां मध्ये उपस्थिताः भूत्वा क्षेत्रीयस्तरे शासकीययोजनानां कार्यक्रमाणां च कार्यान्वयनस्य समीक्षां करिष्यन्ति।

मुख्यमन्त्री डा. यादवः शुक्रवासरे छिन्दवाडस्य एफडीडीआई सभागारे आयोजिते अभिनन्दनसमारोहे सम्बोधनं कुर्वन् आसीत्। तेन उक्तं यत् जनविश्वासाभियाने सामान्यनागरिकाणां हिताय तेषां सुविधावर्धनाय च क्षेत्रीयस्तरे समुत्पद्यमानानां कठिनताः समाधास्यन्ते। एतदभियानं आगामिनः ७ जनवरी २०२७ पर्यन्तं प्रत्येकस्मिन् शुक्रवासरे प्रवर्तिष्यते। प्रदेशस्य प्रत्येकस्य जनस्य लाभाय सुशासनस्य स्थापनाय च जनविश्वासाभियानम् एकं मीलशिलासदृशं सिद्धं भविष्यति। मुख्यमन्त्री डा. यादवः अधिकारिणः कर्मचारिणश्च जनसेवायै समर्पितभावेन कार्यं कर्तुम् आह्वानं कृतवान्।

मुख्यमन्त्री डा. यादवः अवदत् यत् प्रधानमन्त्रिणः नरेन्द्रमोदिनः कार्यकाले सर्वेषां वर्गाणां जनानां जनकल्याणकारीयोजनानां लाभः प्राप्यते। तस्य नेतृत्वे विश्वे भारतस्य प्रतिष्ठा सुदृढा अभवत्। प्रधानमन्त्रिणा मोदीना अन्त्योदयाय जनकल्याणाय च अनेके महत्त्वपूर्णाः निर्णयाः गृहीताः। मध्यप्रदेशसर्वकारोऽपि दरिद्राणां कृषकाणां युवानां नारीणां च सर्वेषां वर्गाणां कल्याणाय प्रतिबद्धः अस्ति। प्रदेशे शासकीयाधिकारिणां कर्मचारिणां च पदोन्नतिः बहुवर्षेभ्यः अवरुद्धा आसीत्। अस्माकं सर्वकारेण कर्मचारिभ्यः स्वाधिकारप्रदानार्थं आवश्यकप्रयत्नः कृतः। पदोन्नत्यर्थं सर्वाः आवश्यकप्रक्रियाः समये सम्पन्नाः कृत्वा अस्मिन् वर्षे अवशिष्टानामपि अधिकारिणां कर्मचारिणां च पदोन्नतिः सेप्टेम्बर अक्टोबर मासयोः करिष्यते। सर्वकारस्य कार्याणि भूमिस्तरे सफलतया कार्यान्वितुं सुशासनस्य स्थापनाय च राज्यस्य सर्वेषामधिकारिणां कर्मचारिणां च महत्त्वपूर्णं योगदानम् अस्ति।

१७ सहस्रपदेषु नवीनभर्त्यर्थं सूचना प्रेषिता

मुख्यमन्त्री डा. यादवः अवदत् यत् राज्यसर्वकारेण सर्वेषु विभागेषु शासकीयपदेषु नवीनभर्तीनाम् आरम्भः कृतः। केवलं पुलिसविभागे एव अष्टादशसहस्राधिकेषु पदेषु भर्ती क्रियते। तेषु सहस्रं पदानि वाहनचालकानामपि सन्ति। विद्यालयशिक्षकाणां दशसहस्राधिकेषु पदेषु भर्तीप्रक्रिया सम्पन्ना जाता। तथैव उच्चशिक्षाक्षेत्रे सप्तसहस्राधिकानां व्याख्यातॄणां भर्ती कृता। मध्यप्रदेशव्यावसायिकशिक्षामण्डलेन विविधविभागेषु सप्तदशसहस्रपदेषु नवीनभर्त्यर्थं सूचना प्रेषिता। अतीतेषु सार्धद्विवर्षेषु एकलक्षपदेषु भर्ती सम्पन्ना। अधुना द्विलक्षनवीननियुक्तीनां प्रक्रिया प्रवर्तते।

---

Hindusthan Samachar / Dheeraj Maithani