दंतेवाड़ा, 07 अगस्तमासः (हि.स.)।

दन्तेवाडाजनपदस्य यातायातपुलिसेन एनएमडीसी डीएवी पॉलिटेक्निकमहाविद्यालये मार्गसुरक्षाविषये जागरूकताकार्यशालायाः आयोजनम्

दन्तेवाडाजनपदस्य यातायातपुलिसविभागेन एनएमडीसी डीएवी पॉलिटेक्निकमहाविद्यालये छात्रछात्राणां कृते यातायातनियमाः मार्गसुरक्षा च इति विषये शुक्रवासरे जागरूकताकार्यशाला आयोजिता। अस्याः कार्यशालायाः प्रमुखोद्देश्यः युवासु मार्गसुरक्षायाः प्रति जागरूकतां वर्धयितुं सुरक्षितयातायातस्य च सदभ्यासं विकसितुं आसीत्। अस्मिन् कार्यक्रमे महाविद्यालयस्य छात्रछात्राः अध्यापकाः च सहभागिनः अभवन्।

कार्यशालां सम्बोधयन् यातायातविभागस्य उपपुलिसाधीक्षकः नसरुल्लाहसिद्दीकी मार्गदुर्घटनानां निवारणार्थं शिरस्त्राणस्य आसनरक्षकपट्टस्य च अनिवार्यप्रयोगस्य महत्त्वम् अवोचत्। तेन उक्तं यत् शिरस्त्राणम् आसनरक्षकपट्टश्च केवलं दण्डपरिहारस्य साधनं न, अपितु जीवनरक्षणस्य अत्यन्तप्रभाविकौ उपायौ स्तः। तेन द्विचक्रवाहनचालकेभ्यः भारतीयमानकसंस्थायाः प्रमाणचिह्नयुक्तं शिरस्त्राणं धारयितुं चतुश्चक्रवाहनचालनसमये च आसनरक्षकपट्टस्य अनिवार्यरूपेण उपयोगं कर्तुम् आह्वानं कृतम्।

अस्मिन्नवसरे सहायकोपनिरीक्षकः जितेन्द्रत्रिपाठी मोटरयानाधिनियमस्य प्रमुखप्रावधानानां विषये विद्यार्थिनः अवगतवान्। तेन विद्यार्थिभ्यः निर्धारितवेगसीमायाः पालनम्, वाहनचालनसमये चलदूरवाण्याः अनुपयोगः, मद्यपानानन्तरं वाहनचालनस्य निषेधः, वैधचालनानुज्ञापत्रस्य आवश्यकदस्तावेजानां च धारणम्, अल्पवयस्कैः वाहनचालनस्य निषेधश्च इत्यादयः नियमाः सम्यक् प्रतिपादिताः।

कार्यक्रमस्य समापनसमये सर्वे छात्रछात्राः अध्यापकाः च मार्गसुरक्षानियमानां पालनं स्वयम् आचरितुं अन्यांश्च तेषां प्रति जागरूकान् कर्तुं शपथं स्वीकृतवन्तः।

अस्मिन्नवसरे सहायकोपनिरीक्षकः जितेन्द्रत्रिपाठी, आरक्षकः आदित्यकन्दोई, कन्हैयासिन्हा, ललितबारला तथा यातायातपुलिसविभागस्य अन्ये अधिकारिणः कर्मचारिणश्च उपस्थिताः आसन्।

---------------

Hindusthan Samachar / Dheeraj Maithani