मुरादाबादम्, 7 अगस्तमासः (हि.स.)। आर्यसमाजस्य महानगररेलवेहरथलाकॉलोनी मुरादाबादस्थिते संस्थाभवने शुक्रवासरे नगरवेदप्रचारकार्यक्रमस्य शुभारम्भः वैदिकयज्ञेन सह अभवत्। यज्ञस्य ब्रह्मा आर्यसमाजस्य राष्ट्रियप्रचारकः स्वामी मोक्षानन्दसरस्वती अवदत् यत् नशामुक्ताः युवानः एव विकसितभारतस्य निर्माणं करिष्यन्ति। मुख्ययजमानौ विभूतिसिंहः आदित्यसिंहश्च आस्ताम्।

यज्ञानन्तरं शाहजहाँपुरजनपदस्य खुटारप्रदेशात् समागतः आर्यभजनोपदेशकः सन्तकुमारार्यः ईश्वरभक्तिपरैः भजनैः मानवजीवनस्य उद्देश्यं कर्तव्यं च प्रकाशितवान्। सः अवदत् यत् मनुष्यजन्म सर्वेषु जीवेषु श्रेष्ठम् अस्ति। अतः मनुष्येण स्वकर्तव्यानि सम्यक् पालनानि कृत्वा सत्कर्ममार्गेण गन्तव्यम्।

सः आर्यसमाजस्य द्वितीयनियमस्य व्याख्यां कुर्वन् अवदत् यत् ईश्वरः सर्वव्यापी अजरः अमरः नित्यः पवित्रः सृष्टिकर्ता च अस्ति। ईश्वरः सर्वत्र विद्यमानः अस्ति तथा च मनुष्यः स्वकर्मानुसारमेव फलं प्राप्नोति।

कार्यक्रमस्य समये नशामुक्तिः युवसंकल्पः विकसितभारतम् इति विषयेषु दुष्यन्तकुमारसिंहः आदित्यसिंहश्च स्वविचारान् प्रस्तुतवन्तौ। तदनन्तरम् आर्यसमाजस्य राष्ट्रियप्रचारकः स्वामी मोक्षानन्दसरस्वती नशामुक्तियुवसंकल्पाभियानविषये विस्तरेण सम्बोधनम् अकरोत्। सः अवदत् यत् मनुष्यजीवनस्य उद्देश्यं स्वस्य वर्तमानजीवनं सम्यग्दिशि नीत्वा भविष्यं श्रेष्ठतरं निर्मातुम् अस्ति। सः युवभ्यः नशादिव्यसनदोषेभ्यः दूरं स्थित्वा राष्ट्रनिर्माणे सकारात्मकभूमिकां निर्वोढुम् आहूतवान्।

कार्यक्रमस्य अध्यक्षतां संस्थायाः प्रधानः आर्यरामलच्छीयादवः अकरोत् तथा च सञ्चालनं संस्थायाः मन्त्री सञ्जयकुमारार्यः अकरोत्।

Hindusthan Samachar / Dheeraj Maithani