डॉ. अरविन्द-शर्मा उक्तवान्— केवलं पादप-रोपणं न, अपितु वृक्षत्व-प्राप्तिपर्यन्तं तस्य परिचर्या अपि आवश्यकी

रोहतकम्, ०७ अगस्तमासः (हि.स.)। वन-महोत्सवस्य अवसरे जलेबी-चतुष्पथे आयोजिते कार्यक्रमे पर्यावरण-संरक्षणस्य हरितीकरणस्य च सन्देशः प्रदत्तः। कार्यक्रमे मन्त्रीमण्डलस्य सदस्यः डॉ. अरविन्द-शर्मा, भारतीय-जनता-पक्षस्य प्रदेशाध्यक्षाः अर्चना-गुप्ता तथा पूर्वमन्त्री मनीष-ग्रोवरः पादप-रोपणस्य महत्त्वे प्रकाशं क्षिप्त्वा जनान् पर्यावरण-संरक्षणं जीवनस्य अभिन्नं भागं कर्तुम् आहूतवन्तः। वन-महोत्सवस्य अन्तर्गतं सप्ततिसहस्र-पादपानां रोपणस्य लक्ष्यं निर्धारितम् अस्ति। जलेबी-चतुष्पथे प्रशासनस्य भारतीय-राष्ट्रीय-राजमार्ग-प्राधिकरणस्य च सहयोगेन मियावाकी-पद्धत्या चतुर्दशसहस्र-पादपाः रोपिताः।

डॉ. अरविन्द-शर्मणा उक्तं यत् वन-महोत्सवः केवलं पादप-रोपणस्य कार्यक्रमः न, अपितु अग्रिम-वंशानां सुरक्षितस्य स्वस्थस्य च भविष्यस्य सङ्कल्पः अस्ति। वृक्षाः अस्मभ्यं प्राणवायुम् प्रदातुं सह जल-संरक्षणे, तापमान-नियन्त्रणे पर्यावरण-सन्तुलने च महत्त्वपूर्णां भूमिकां निर्वहन्ति। तेन उक्तं यत् पादप-रोपणम् आरम्भमात्रम् अस्ति, वास्तविकं दायित्वं तस्य परिचर्या एव अस्ति। प्रत्येकं जनः न्यूनातिन्यूनम् एकं पादपं रोपयित्वा तत् वृक्षत्वं प्राप्तुं यावत् संरक्षितुं सङ्कल्पं कुर्यात्।

भाजपा-प्रदेशाध्यक्षया अर्चना-गुप्तया उक्तं यत् वृक्षाः पादपाश्च केवलं हरितीकरणस्य साधनानि न सन्ति, अपितु मानवजीवनस्य प्रकृतेश्च मध्ये सन्तुलनं स्थापयितुं आधारभूताः सन्ति। अधुना वर्धमानं तापमानं परिवर्तमानं च पर्यावरणं सर्वेषां कृते चिन्तायाः विषयः अस्ति। अतः अधिकाधिकानां पादपानां रोपणं तेषां परिचर्या च समयस्य आवश्यकता अस्ति। तया उक्तं यत् पादप-रोपणं केवलं सर्वकारीय-कार्यक्रमपर्यन्तं सीमितं न भवेत्। समाजस्य प्रत्येकं वर्गं, विशेषतः युवानः विद्यार्थिनश्च, अस्मिन् कार्ये संयोज्य तत् जनसहभागितायाः अभियानरूपेण परिणमयितव्यम्। तया जनानाम् आह्वानं कृतं यत् ते पादपं रोपयितुं सह तस्य संरक्षणस्य दायित्वम् अपि स्वीकुर्वन्तु।

पूर्व-मन्त्रिणा मनीष-ग्रोवरेण उक्तं यत् पर्यावरण-संरक्षणं न कस्यचित् एकस्य विभागस्य संस्थायाः वा दायित्वम्, अपितु प्रत्येकस्य नागरिकस्य कर्तव्यम् अस्ति। तेन उक्तं यत् प्रत्येकं जनः न्यूनातिन्यूनम् एकं पादपं रोपयितुं तस्य नियमित-परिचर्यां कर्तुं च सङ्कल्पं कुर्यात्। तेन उक्तं यत् पादप-रोपणेन सह जल-संरक्षणं प्लास्टिकस्य न्यूनतम-उपयोगश्च दैनिक-जीवनस्य भागौ कर्तव्यौ। बालकान् युवानश्च पर्यावरण-संरक्षणं प्रति जागरूकान् कृत्वा अग्रिम-वंशं प्रकृतेः समीपम् आनेतुं शक्यते। ग्रोवरेण उक्तं यत् वन-महोत्सवादयः कार्यक्रमाः तदैव सफलाः भविष्यन्ति, यदा रोपिताः पादपाः सुरक्षिताः भूत्वा विशाल-वृक्षाणां रूपं धारयिष्यन्ति।

Hindusthan Samachar / Divya Ranjan