मुरादाबादम्, 07 अगस्तमासः (हि.स.)।

गुरुजम्भेश्वरविश्वविद्यालयस्य प्रशासनिकभवनस्य शैक्षणिकभवनस्य च निर्माणकार्यं अगस्तमासस्य त्रिंशत्तमतिथेः पूर्वं सम्पूर्णं भविष्यति। अन्येषां भवनानां निर्माणार्थं लोकनिर्माणविभागेन मुख्यालयस्य मुख्याभियन्तुः समीपे सितम्बरमासस्य पञ्चदशतिथिपर्यन्तं समयः याचितः। निर्माणकार्यस्य अवधिविस्तारार्थं चतुर्थवारं पत्रं प्रेषितम्। तस्मिन् पत्रे कार्यदायिसंस्थया उक्तं यत् विश्वविद्यालयनिर्माणार्थं गुजरातहरियाणाराज्याभ्यां आयातितसामग्रीणाम् आगमने विलम्बः अभवत्। कावडयात्रायाः कारणेन बृहद्वाहनानि न आगच्छन्ति स्म। अपरञ्च मार्गनिर्माणार्थं डामरपदार्थस्य प्राप्तिः अपि विलम्बेन अभवत्।

रामगङ्गानद्याः तीरे हरदासपुरग्रामस्य पञ्चाशदेकडभूमौ मुख्यमन्त्रिणा २०२४ तमवर्षस्य मार्चमासस्य षोडशतिथौ गुरुजम्भेश्वरविश्वविद्यालयस्य शिलान्यासः कृतः। ततः परं २०२४ तमवर्षस्य अगस्तमासस्य चतुर्विंशतितिथौ विश्वविद्यालयभवनानां निर्माणकार्यं प्रारब्धम्। शासनद्वारा विश्वविद्यालयनिर्माणस्य समाप्त्यर्थं गतवर्षस्य फरवरीमासस्य त्रयोविंशतितिथिः निर्धारिता आसीत्। निर्माणकार्यस्य आरम्भानन्तरमेव बाढाप्रकोपस्य कारणेन परिसरं जलेन आवृतम्, येन निर्माणकार्यं द्विमासपर्यन्तं प्रभावितम् अभवत्। जिलाप्रशासनस्य अनुमत्या निर्माणकार्यस्य समाप्तितिथिः जुलैमासस्य एकत्रिंशत्तमदिनपर्यन्तं विस्तारिताभवत्।

निर्माणकार्यस्य दायित्वम् अधिशास्याभियन्तुः राजेन्द्रबहादुरस्य आसीत्, किन्तु द्वाभ्यां मासाभ्यां पूर्वं सः दुर्घटनायां आहतः अभवत्। तेन कारणेन निर्माणकार्ये बाधा अभवत्। अधिशास्याभियन्ता अवदत् यत् अगस्तमासपर्यन्तं प्रशासनिकभवनस्य शैक्षणिकभवनस्य च कार्यं सम्पूर्णं भविष्यति। ततः परं शिक्षणकार्यस्य आरम्भार्थं भवनद्वयं विश्वविद्यालयाय हस्तान्तरितं भविष्यति। अन्येषां भवनानां निर्माणकार्यस्य अवधिं सितम्बरमासस्य पञ्चदशतिथिपर्यन्तं वर्धयितुं लोकनिर्माणविभागस्य मुख्याभियन्तुः समीपे पत्रं प्रेषितम्।

कार्यदायिसंस्थायाः प्रबन्धकः अवदत् यत् प्रशासनिकभवनस्य, शैक्षणिकभवनस्य, कुलपतिभवनस्य, पुलिसचौक्याः, छात्रावासस्य च निर्माणकार्यं सम्पन्नम् अस्ति, किन्तु अन्यानि बहूनि कार्याणि अद्यापि अवशिष्टानि सन्ति।

----------------

Hindusthan Samachar / Dheeraj Maithani