Enter your Email Address to subscribe to our newsletters
बसंतः अपि ऊच्चकूर्दने अन्त्यक्रीडायाम्
यूजीनः (ओरेगनम्), 07 अगस्तमासः (हि.स.)।
विश्वकनीयककनीयसीनां क्रीडास्पर्धायाः (विश्व जूनियर एथलेटिक्स चैंपियनशिप २०२६) द्वितीये दिने गुरुवासरे भारतस्य मोहम्मद् अशफाक् इत्यनेन उत्कृष्टं प्रदर्शनं कृत्वा पुरुषाणां ४०० मीटर धावने नवीनम् अण्डर्-२० राष्ट्रियकीर्तिमानं स्थापितं तथा च अन्त्यस्पर्धायां स्थानं सुनिश्चितम्। अपरतः बसन्तः पुरुषाणां उच्चलङ्घनस्पर्धायाः अन्त्यस्पर्धायै अर्हतां प्राप्तवान्, येन भारतस्य पदकापेक्षा जीविता वर्तते।
एकोनविंशतिवर्षीयः अशफाक् पञ्चमहीटे ४५.८१ सेकेण्डकालेन द्वितीयस्थानं प्राप्तवान् तथा च उपान्त्यस्पर्धायां प्रविष्टः। अनेन सः एप्रिलमासे बेङ्गलूरुनगरे आयोजिते अण्डर्-२० फेडरेशन् कप् स्पर्धायां स्वयमेव स्थापितं ४६.०५ सेकेण्डकालस्य राष्ट्रियकीर्तिमानमपि अतिक्रान्तवान्।
ततः उपान्त्यस्पर्धायाः तृतीयहीटे अशफाक् ४६.०० सेकेण्डकालेन तृतीयस्थानं प्राप्तवान् तथा च अन्त्यस्पर्धायां स्थानं सुनिश्चितवान्। अमेरिकादेशस्य क्विन्सी विल्सन् ४५.०२ सेकेण्डकालेन तथा दक्षिणाफ्रिकादेशस्य किर्न् रोमिन् ४५.८७ सेकेण्डकालेन तस्मात् अग्रे स्थितवन्तौ। अपरतः भारतस्य पियूषराजः षष्ठहीटे ४७.७८ सेकेण्डकालेन पञ्चमस्थानं प्राप्तवान्, अतः सः अन्त्यस्पर्धायां स्थानं प्राप्तुं नाशकत्।
पुरुषाणां उच्चलङ्घनस्पर्धायां बसन्तः २.१४ मीटरपरिमितां लङ्घनं कृत्वा ‘ग्रुप्-ए’ इति वर्गे पञ्चमस्थानं प्राप्तवान् तथा च अन्त्यस्पर्धायै अर्हतां प्राप्तवान्। अपरतः के. अम्ब्रीशः ‘ग्रुप्-बी’ इति वर्गे २.०५ मीटरपरिमितां श्रेष्ठलङ्घनं कृत्वापि स्पर्धातः बहिः अभवत्। उभयवर्गयोः कोऽपि क्रीडकः २.२१ मीटरपरिमितं स्वतः अर्हतामानदण्डं नातिक्रामत्।
महिलानां चक्रक्षेपणस्पर्धायाः अन्त्यस्पर्धायाम् अमनत् कम्बोज् ५३.२४ मीटरपरिमितं स्वकीयं सर्वोत्तमं प्रदर्शनं कृत्वा षष्ठस्थानं प्राप्तवती। अस्याः स्पर्धायाः स्वर्णपदकं चीनदेशस्य सू यिक्सिन् ६१.०६ मीटरपरिमितेन अण्डर्-२० विश्ववर्षश्रेष्ठप्रदर्शनेन विजितवती।
महिलानां गोलक्षेपणस्पर्धायाम् अंशु अन्त्यस्पर्धायां स्थानं प्राप्तुं नाशकत्। तया अर्हताचरणे १५.२४ मीटरपरिमितः सर्वोत्तमः प्रयासः कृतः, येन सा ‘ग्रुप्-ए’ इति वर्गे नवमस्थानं तथा समग्रतया चतुर्दशस्थानं प्राप्तवती। सा अन्त्यस्पर्धायाः निर्धारितमानदण्डात् २१ सेण्टीमीटरपरिमितेन न्यूनतरा अभवत्।
महिलानां ४०० मीटर बाधाधावनस्पर्धायां तनु चौधरी १:००.०३ निमेषकालेन स्वहीटे पञ्चमस्थानं प्राप्तवती, अतः सा अन्त्यस्पर्धायां स्थानं न प्राप्तवती। अपरतः पुरुषाणां ४०० मीटर बाधाधावनस्पर्धायाम् अमितकुमारः ५४.०१ सेकेण्डकालेन स्वहीटे अन्तिमस्थानं प्राप्तवान्।
पुरुषाणां त्रिपदलङ्घनस्पर्धायाः अर्हताचरणे धनुषराजः १४.७१ मीटरपरिमितेन तथा पी. रॉयशन् १५.२० मीटरपरिमितेन प्रदर्शनं कृत्वापि अन्त्यस्पर्धायै अर्हतां प्राप्तुं नाशकताम्।
---------------
Hindusthan Samachar / Dheeraj Maithani