देहरादूनम्, ०७ अगस्तमासः (हि.स.)। केन्द्रीय-सामाजिक-न्याय-अधिकारिता-राज्यमन्त्री रामदास-अठावलेः शुक्रवासरे उक्तवान् यत् केन्द्र-सर्वकारः अनुसूचित-जातीनां, अन्य-पृष्ठवर्गाणां, दिव्याङ्ग-जनानां, तृतीयलिङ्गीयानां, वरिष्ठ-नागरिकाणां तथा अन्येषां दुर्बल-वर्गाणां कल्याणाय प्रतिबद्धः अस्ति। तेन उक्तं यत् सर्वकारस्य जनकल्याणकारी-योजनाभिः कोटिशः नागरिकाः लाभान्विताः सन्ति।

द्विदिवसीय-उत्तराखण्ड-यात्रायै देहरादूनं प्राप्तेन केन्द्रीय-राज्यमन्त्रिणा बीजापुर-अतिथि-गृहे शुक्रवासरे सायं आयोजितायां पत्रकार-वार्तायां केन्द्र-सर्वकारस्य योजनानां सामाजिक-न्याय-सम्बद्धानां विषयाणां च विषये सूचना प्रदत्ता। तेन उक्तं यत् सामाजिक-न्याय-अधिकारिता-मन्त्रालयः समाजस्य वञ्चितानां दुर्बलानां च वर्गाणाम् उत्थानाय निरन्तरं कार्यं करोति।

रामदास-अठावले प्रधानमन्त्री-जन-धन-योजनायाः, मुद्रा-योजनायाः, आयुष्मान्-भारत-योजनायाः, प्रधानमन्त्री-आवास-योजनायाः उज्ज्वला-योजनायाः च उल्लेखं कुर्वन् उक्तवान् यत् एताभिः योजनाभिः सामान्य-नागरिकाणां जीवन-स्तरे सुधारः अभवत्। तेन सूचितं यत् जन-धन-योजनायाः अन्तर्गतं सम्पूर्णे देशे ५८.३० कोट्यधिकानि बैंक-खातानि उद्घाटितानि सन्ति, येषु उत्तराखण्डस्य ४०.९१ लक्षाधिकानि खातानि सन्ति। मुद्रा-योजनायाः अन्तर्गतं देशे ५८.३१ कोट्यधिकानि ऋणानि स्वीकृतानि सन्ति।

तेन उक्तं यत् आयुष्मान्-भारत-योजनायाः माध्यमेन कोटिशः जनानां कृते स्वास्थ्य-सुरक्षा प्रदत्ता अस्ति। तदनन्तरं सर्वकारः नशामुक्ति-केन्द्राणां, वृद्ध-जनानां कल्याणस्य, वित्तीय-समावेशनस्य तथा एमएसएमई-क्षेत्रस्य प्रोत्साहनाय अपि कार्यं करोति।

सामाजिक-न्यायस्य आरक्षणस्य च विषये केन्द्रीय-मन्त्रिणा उक्तं यत् आरक्षणं संविधानप्रदत्ता व्यवस्था अस्ति तथा तस्य विरोधः संविधानस्य मूलभावनायाः विरुद्धः अस्ति। तेन उक्तं यत् प्रस्तावितया जाति-जनगणनया सामाजिक-आर्थिक-स्थितेः मूल्याङ्कने सहायता भविष्यति तथा पात्रेभ्यः जनानां समीपं योजनानां लाभः अधिक-प्रभाविरूपेण प्रापयितुं शक्यते।

महिला-सशक्तीकरणस्य विषये तेन उक्तं यत् महिला-आरक्षणेन लोकतान्त्रिक-संस्थासु महिलानां सहभागिता अधिका सुदृढा भविष्यति। प्रश्नपत्र-प्रकाशनस्य प्रकरणेषु तेन उक्तं यत् सर्वकारेण तस्य विरुद्धं कठोरः विधिः निर्मितः अस्ति तथा दोषिषु कठोर-कार्यवाही करिष्यते। संसदीय-वर्षाकालीन-सत्रस्य विषये तेन सर्वेभ्यः राजनैतिक-दलेभ्यः सदनस्य कार्यवाही सुचारुरूपेण चालयितुं आह्वानं कृतम्। तेन उक्तं यत् जनहित-विषयेषु सार्थक-विमर्शः लोकतन्त्राय आवश्यकः अस्ति। अठावले उत्तराखण्डस्य मुख्यमन्त्री पुष्कर-सिंह-धामी इत्यस्य प्रशंसां कुर्वन् उक्तवान् यत् तस्य नेतृत्वे प्रदेशेन उल्लेखनीया प्रगतिः कृता अस्ति।

Hindusthan Samachar / Divya Ranjan