देहरादूनम्, 07 अगस्तमासः (हि. स.)।मुख्यसचिवेन कौशलविकासरोजगारयोजनानां समीक्षा कृता, उत्तरप्रदेशं ‘कौशलकेन्द्रम्’ निर्मातुं समन्वितकार्यस्य निर्देशाः प्रदत्ताः।मुख्यसचिवः आनन्दवर्द्धनः शुक्रवासरे सचिवालये कौशलविकासरोजगारसम्बद्धयोजनानां समीक्षां कृत्वा उत्तरप्रदेशं “कौशलकेन्द्रम्” निर्मातुं सर्वेभ्यः सम्बन्धितविभागेभ्यः समन्वितरूपेण कार्यं कर्तुं निर्देशान् प्रदत्तवान्। तेन उक्तं यत् कौशलविकासकार्यक्रमाः उद्योगानां वर्तमानभविष्यदपेक्षानुरूपं निर्मीयेरन्, येन प्रशिक्षितयुवभ्यः उत्तमाः रोजगारस्वरोजगारावसराः सुलभाः भवेयुः।

मुख्यसचिवः अधिकारिभ्यः निर्देशितवान् यत् युवानां रुचीनाम् स्थानीयरोजगारावश्यकतानां च अनुरूपं गुणवत्तायुक्तं प्रशिक्षणं प्रदीयताम्। कौशलविकाससम्बद्धाः सर्वे विभागाः एकस्मिन् साझा-मञ्चे समन्वितरूपेण कार्यं कुर्वन्तु, येन युवानः विविधयोजनानां रोजगारावसराणां च लाभं सुकरतया प्राप्नुयुः।

तेन कौशलविकाससचिवाय निर्देशः प्रदत्तः यत् सेतुआयोगस्य परामर्शानुसारेण सर्वान् हितधारकान् सम्मिल्य एकीकृतं डैशबोर्डं निर्मीयताम्, येन कौशलविकासरोजगारयोजनानां प्रभाविनिगराणी समन्वयश्च सुनिश्चितौ भवेताम्।

बैठके कौशलविकाससेवायोजनसचिवः सी. रविशङ्करः अवदत् यत् समग्रकौशलविकासस्य उद्देश्येन विद्यालयशिक्षाविभागेन, उच्चशिक्षाविभागेन, प्राविधिकशिक्षाविभागेन, चिकित्साशिक्षाविभागेन च सहकार्येण उद्योगमानकानुरूपम् औद्योगिकप्रशिक्षणसंस्थानानाम् आधुनिकीकरणं क्रियमाणम् अस्ति। सम्प्रति प्रदेशे ११९ औद्योगिकप्रशिक्षणसंस्थानानि सञ्चालितानि सन्ति, तेषु ९० संस्थानानि पोर्टले अभिलेखितानि सन्ति। एतदतिरिक्तं टाटाटेक्नोलॉजीज् संस्थायाः सहयोगेन औद्योगिकप्रशिक्षणसंस्थानेषु लघुकालीनप्रशिक्षणपाठ्यक्रमाः अपि प्रारब्धाः सन्ति।

तेन उक्तं यत् युवभ्यः विदेशेषु रोजगारावसरान् उपलब्धान् कर्तुं स्किल् इण्डिया इण्टरनेशनल् सेन्टर् इत्यस्य माध्यमेन वैश्विकमानकानुरूपं प्रशिक्षणं, भाषादक्षता तथा अन्यावश्यककौशलविकासः क्रियते। अस्य कृते त्रिभिः संस्थाभिः सह विचारविमर्शः प्रवर्तमानः अस्ति।

सचिवेन अपि सूचितं यत् “रोजगारप्रयाग” इति पोर्टले निजीनियोजकानाम् अपि पञ्जीकरणं क्रियते। अद्यावधि १६२ निजीनियोजकानां पञ्जीकरणं सम्पन्नम् अस्ति, येन युवभ्यः निजीक्षेत्रे अधिकाः रोजगारावसराः उपलब्धाः भविष्यन्ति।--------------

Hindusthan Samachar / Dheeraj Maithani