Enter your Email Address to subscribe to our newsletters
सोनीपतम्, ०८ अगस्तमासः (हि.स.)। सोनीपतस्य ठरु-उल्देपुर-ग्रामस्य मूलनिवासी तथा सम्प्रति सेक्टर-१४-निवासी कर्मयोद्धा ब्रिगेडियर ओ.पी. चौधरिणः निधनस्य सूचना प्राप्तमात्रेण शिक्षाक्षेत्रे, सामाजिकक्षेत्रे जनसेवायां च सम्बद्धेषु जनसामान्येषु शोकस्य तरंग: व्याप्त:। तस्य अन्त्येष्टिः शनिवासरे अपराह्णे त्रिवादने सेक्टर-१५-स्थिते शिव-मुक्ति-धामे भविष्यति।
ब्रिगेडियर ओ.पी. चौधरिणा स्वजीवनं शिक्षायाः उत्थानाय, अनुशासनाय युवा-वंशस्य मार्गदर्शनाय च समर्पितम् आसीत्। सः हरियाणा-विद्यालय-शिक्षा-मण्डलस्य अध्यक्षत्वेन, महर्षि-विश्वविद्यालय-रोहत-कस्य कुलपतित्वेन तथा राई-क्रीडा-विद्यालयस्य प्राचार्यत्वेन च महत्त्वपूर्णानि दायित्वानि निर्वाहितवान्। अतिरिक्तं सः सोनीपतस्य ब्राइट्-स्कॉलर्-वरिष्ठ-माध्यमिक-विद्यालयस्य संरक्षकः अपि आसीत्।
शिक्षाक्षेत्रे विभिन्नेषु पदेषु कार्यं कुर्वन् सः विद्यार्थिभ्यः पुस्तकीय-ज्ञानस्य साथमेव अनुशासनस्य, उत्तरदायित्वस्य राष्ट्रसेवाभावनायाश्च सम्बन्धे विशेषं बलं दत्तवान्। तस्य मार्गदर्शनेन शिक्षां प्राप्तवन्तः अनेके विद्यार्थिनः अधुना विभिन्नेषु क्षेत्रेषु स्वसेवां प्रददति। शिक्षायाः प्रति समर्पणेन विद्यार्थिषु मार्गदर्शकभावेन च तस्य विशिष्ट: परिचय: निर्मित:।
परिचितानां शिक्षाजगतः च सम्बद्धानां जनानां अनुसारं ब्रिगेडियर चौधरिणः व्यक्तित्वं सरलतया, अनुशासनेन, राष्ट्रभक्त्या सेवाभावेन च सम्बद्धम् आसीत्। सः युवानः परिश्रमेण, अनुशासनेन सकारात्मक-चिन्तनेन च सह अग्रे गन्तुं प्रेरयति स्म। विभिन्नेषु संस्थानेषु दायित्वं निर्वहन् सः गुणवत्तापूर्ण-शिक्षायै अनुशासनाय च प्राथमिकतां दत्तवान्। सोनीपतस्य पूर्व-विधायकः सुरेन्द्रः पंवारः तस्य निधनस्य विषये गहनं शोकं व्यक्तवान्। सः अवदत् यत् ब्रिगेडियर ओ.पी. चौधरिणः निधनं शिक्षाजगतः कृते अपूरणीया क्षतिः अस्ति। सः दिवंगतात्मने श्रद्धाञ्जलिं समर्प्य शोकसन्तप्तं परिवारं प्रति संवेदनां व्यक्तवान्।
ब्रिगेडियर चौधरी स्वपश्चात् पत्नी दमयन्ती चौधरी, पुत्रः डॉ. इन्द्रजीतसिंह: चौधरी, सरोज: चौधरी, पुत्री वीना राठी, जामाता कर्नल् सुरेश: राठी, विक्रम: राठी, शालिनी राठी, अमरदीप चौधरी, विनयः, गौतमः इत्यादीन् पौत्रान् दौहित्रान् च परिपूर्णं परिवारं त्यक्त्वा गतवान्। इनेलो-दलस्य जिलाध्यक्षः कुनालः गेहलोतः अवदत् यत् सेनाक्षेत्रे शिक्षाक्षेत्रे च अनुकरणीयं कार्यं कृतवतः कर्मयोद्धानः निधनं शिक्षायाः सामाजिकक्षेत्रस्य च सम्बद्धस्य इनेलो-परिवारस्य, समाजस्य सम्पूर्णस्य राष्ट्रस्य च कृते अपूरणीया क्षतिः अस्ति। तस्य पूर्तिः कदापि कर्तुं न शक्यते। तस्य निधनात् गहनः शोकः अस्ति। शिक्षां प्रति तस्य योगदानं समाजसेवा च दीर्घकालं यावत् स्मरिष्यते।
Hindusthan Samachar / Divya Ranjan