वर्षायामपि न शमितम् उत्साहः, देशभक्त्या सह नशामुक्तेः सन्देशः

भोपालम्, ०९ अगस्तमासः (हि.स.)। मध्यप्रदेशस्य राजधान्यां भोपालनगरे रविवासरे तीव्रवर्षायाः मध्ये भाजपादलेन त्रिरङ्गायात्रा आयोजिता। टीटी-नगर-क्रीडाङ्गणात् प्रारब्धायां यात्रायां मुख्यमन्त्री डॉ. मोहन यादवः बुलेट-द्विचक्रिकया समागतवान् तथा हस्ते त्रिरङ्गं गृहीत्वा यात्रायां सम्मिलितवान्।

भाजपायाः प्रदेशाध्यक्षः हेमन्त-खण्डेलवालः, प्रदेशप्रभारी डॉ. महेन्द्रसिंहः इत्यादयः बहवः नेतारः, कार्यकर्तारः नगरवासिनश्च यात्रायां सम्मिलिताः। वर्षाधाराणां मध्ये “भारत-माता की जय” इति घोषैः वातावरणं देशभक्तिभावनया परिपूर्णम् अभवत्। तीव्रवृष्ट्याः पश्चादपि बालकानां यूनां च उत्साहः विशेषरूपेण दृष्टः। नगरस्य विभिन्नेभ्यः क्षेत्रेभ्यः आगताः बालकाः हस्तेषु त्रिरङ्गं गृहीत्वा यात्रायां सम्मिलिताः। अनेकाः बालकाः देशभक्तिसम्बद्धेषु वेशभूषासु दृष्टाः। डोरेमोन-मोटू-पतलू-रूपवेषं धृत्वा आगतवन्तः बालकाश्च जनानां विशेषं ध्यानम् आकर्षितवन्तः।

वर्षाकारणात् लघुकृतः यात्रामार्गः

तीव्रवृष्टेः बालकानां सुरक्षां च दृष्ट्वा यात्रायाः पूर्वनिर्धारितः मार्गः लघुकृतः। पूर्वं यात्रा टीटी-नगर-क्रीडाङ्गणात् न्यू-मार्केट्-क्षेत्रं रोशनपुरा-चतुष्पथं च अतिक्रम्य पुनः टीटी-नगरं प्रति आगन्तुं निर्धारिता आसीत्। किन्तु न्यू-मार्केट्-क्षेत्रस्य नानके-पेट्रोल-पम्प-चतुष्पथात् पूर्वमेव यात्रा पुनः टीटी-नगरस्य दिशि परिवर्तिता।

‘वर्षया यात्रायाः आनन्दः द्विगुणितः अभवत्’

मुख्यमन्त्री डॉ. मोहन यादवः अवदत् यत् ‘भारत-त्याग’ आन्दोलनेन देशस्य स्वातन्त्र्यप्राप्तेः निर्णायकसंघर्षाय नूतना दिशा प्रदत्ता आसीत्। क्रान्तिकारिणां, हुतात्मनां, स्वातन्त्र्यसेनानीनां च बलिदानं स्मर्तुं प्रत्येकस्य राष्ट्रभक्तनागरिकस्य कर्तव्यम् अस्ति। सः अवदत् यत् प्रधानमन्त्री नरेन्द्रमोदिनः नेतृत्वे देशस्य सर्वेषु भागेषु जनसहभागितया त्रिरङ्गाभियानं प्रचलति। मध्यप्रदेशेऽपि अगस्तमासस्य ९ दिनाङ्कात् १७ दिनाङ्कपर्यन्तं ‘हर घर तिरंगा’ अभियानस्य अन्तर्गतं त्रिरङ्गायात्राभिः, सांस्कृतिककार्यक्रमैः, विविधाभिश्च गतिविधिभिः राष्ट्रप्रेम्णः सन्देशः प्रदीयते।

मुख्यमन्त्री अवदत् यत् भारतः स्वसंस्कृत्या, ‘वसुधैव कुटुम्बकम्’ तथा ‘जियो और जीने दो’ इति विचाराभ्यां सह अग्रे गच्छन् विश्वे स्वस्य सुदृढां परिचितिं निर्माति। सः अवदत् यत् वर्षायाः पश्चादपि बालकानां, यूनां, वृद्धानां सर्वेषां वर्गाणां जनानां च उत्साहः प्रशंसनीयः अस्ति।

‘इन्द्रदेवोऽपि देशभक्तानां स्वागतं कुर्वन्ति इव’

मुख्यमन्त्री अवदत् यत् वर्षायाः मध्ये इदं प्रतीतं भवति यथा इन्द्रदेवोऽपि देशस्य वीराणां देशभक्तानां च स्वागतं कुर्वन्ति। सः अवदत् यत् वर्षया आर्द्रिताः सन्तोऽपि जनाः उत्साहेन तिरङ्गस्य प्रति सम्मानं प्रदर्शयन्ति, यत् तेषां देशभक्तिभावनां प्रकटयति।

त्रिरङ्गं साहसस्य बलिदानस्य च प्रतीकम्

मुख्यमन्त्री डॉ. यादवः अवदत् यत् त्रिरङ्गस्य त्रयः वर्णाः देशस्य साहसस्य, वीरतायाः, बलिदानभावनायाश्च प्रतीकाः सन्ति। देशस्य यशःकीर्तिः निरन्तरं वर्धताम् इति कामनां कुर्वन् सः त्रिरङ्गायात्रायां सम्मिलितेभ्यः भोपालवासिभ्यः शुभकामनाः अयच्छत्।

नशामुक्तेः अपि प्रदत्तः सन्देशः

तिरङ्गायात्रायां राष्ट्रभक्त्या सह नशामुक्तेः सन्देशोऽपि प्रदत्तः। युवानः नशात् दूरे तिष्ठन्तु, समाजे नशाविरुद्धं जागरणं प्रसारयन्तु इति आह्वानं कृतम्। आयोजकैः युवावंशं स्वस्थं नशामुक्तं च कर्तुं संकल्पोऽपि कारितः। वर्षायाः मध्ये आयोजितायां अस्यां यात्रायां त्रिरङ्गं, देशभक्तेः घोषाः, बालकानाम् उत्साहश्च विशेषाकर्षणस्य केन्द्रम् अभवत्। यात्रायाः समापनेन सह टीटी-नगरं तदनुपरिसरं च देशभक्तेः घोषैः पुनः पुनः प्रतिध्वनितम् अभवत्।

Hindusthan Samachar / Divya Ranjan