Enter your Email Address to subscribe to our newsletters
नवदिल्ली, ०९ अगस्तमासः (हि.स.)। केन्द्रीयविज्ञान-प्रौद्योगिकीमन्त्री डॉ. जितेन्द्र-सिंहः रविवासरे अवदत् यत् भारतस्य अन्तरिक्ष-अर्थव्यवस्था अग्रिमे ८-९ वर्षेषु ४०-४५ अरब-अमेरिकी-डॉलर्-पर्यन्तं प्राप्स्यति इति अनुमानम् अस्ति।
डॉ. जितेन्द्र-सिंहः अद्य अत्र ललित-होटल इत्यत्र आयोजिते डिजिटल-उपकरण-पुरस्कार-कार्यक्रमे माध्यमप्रतिनिधिभिः सह वार्तालापे अवदत् यत् भारतस्य अन्तरिक्ष-अर्थव्यवस्था पूर्वं प्रायः शून्यवत् आसीत्, किन्तु अधुना सा प्रायः ९ अरब-अमेरिकी-डॉलर-पर्यन्तं वर्धिता अस्ति तथा च तीव्रगत्या विस्तारं प्राप्नोति। आगामीषु अष्टसु नवसु वर्षेषु अस्याः अर्थव्यवस्थायाः ४०-४५ अरब-अमेरिकी-डॉलर्-पर्यन्तं वर्धनस्य अनुमानम् अस्ति।
सः पुरस्कारविजेतृभ्यः शुभकामनाः प्रदाय अवदत् यत् वर्ष २०४७ पर्यन्तं भारतस्य स्थितिं तादृशस्य देशस्य रूपेण सुदृढां कर्तव्या, यस्य क्षमताः नवाचाराश्च अन्यैः देशैः स्वीकरणीयाः भवेयुः।
मन्त्री अवदत् यत् अग्रिम औद्योगिकक्रान्तिः जैवप्रौद्योगिक्याः कृत्रिमबुद्धिमत्तायाश्च आधारेण भविष्यति। भारतदेश: अधुना विश्वस्य तेषु चयनितदेशेषु अन्तर्भवति, येषां समीपे जैवप्रौद्योगिक्यै समर्पिता नीतिः अस्ति। अस्माकं समीपे राष्ट्रिय-क्वाण्टम-अभियिनम्, भारतीय-कृत्रिमबुद्धिमत्ता-अभियानम् च स्तः तथा च वयं अन्तरिक्षक्षेत्रे अन्येषु च अग्रणीक्षेत्रेषु तीव्रगत्या प्रगतिं कृतवन्तः।
परमाणुक्षेत्रं निजनिर्माणीभ्यः उद्घाटितस्य उल्लेखं कुर्वन् सः अवदत् यत् अनेन पदक्षेपेण नूतनाः अवसराः उत्पद्यन्ते, किन्तु उद्योगजगतः उदयमानक्षेत्राणां कृते स्वयम् सज्जीकर्तुं आवश्यकं तथा आवश्यक-क्षमतानां विकासः अपि करणीयः। भारतस्य नवोद्यम-पारिस्थितिकीतन्त्रस्य विकासः दर्शयति यत् नवाचारः अधुना केवलं बृहन्नगरेषु सीमितः नास्ति, अपितु बहवः युवानः उद्यमिनः लघुनगरेभ्यः अपि उद्भवन्ति।
डॉ. सिंहः अप्रचलितानां विधानानां प्रक्रियाणां च निराकरणाय सर्वकारेण क्रियमाणानां प्रयासानां विषये सूचयन् अवदत् यत् प्रायः २,००० अप्रचलित-विधानानि निराकृतानि सन्ति। एतेषु समाजे शासने च परिवर्तनस्य अभावेऽपि पूर्वयुगात् प्रचलितानि प्रावधानानि अपि अन्तर्भवन्ति।
Hindusthan Samachar / अंशु गुप्ता