Enter your Email Address to subscribe to our newsletters
भोपालम्, ०९ अगस्तमासः (हि.स.)। केन्द्रीयनागरिकविमाननमन्त्री किंजारापु राममोहन नायडूः रविवासरे मध्यप्रदेशस्य एकदिवसीयप्रवासाय भोपालं प्राप्तवान्। सः अत्र मुख्यमन्त्रिनिवासं गत्वा ‘समत्व-भवने’ मुख्यमन्त्रिणा डॉ. मोहन यादवेन सह साक्षात्कारं कृतवान्।
अस्मिन् अवसरे मुख्यसचिवः अशोक-बर्णवालः, केन्द्रीयनागरिक-विमानन-मन्त्रालयस्य सचिवः समीर-कुमार-सिन्हा, केन्द्रीयनागरिकविमाननमन्त्रालयस्य योजनासदस्यः अनिल-गुप्तः तथा मध्यप्रदेशविमाननविभागस्य अपरमुख्य-सचिवः सञ्जय-शुक्लः अपि उपस्थिताः आसन्।
मुख्यमन्त्री डॉ. यादवः केन्द्रीयमन्त्री नायडोः मुख्यमन्त्रिनिवासे आगमने आत्मीयं स्वागतं कृत्वा प्रतीकचिह्नं प्रदाय तस्य अभिनन्दनं कृतवान्। मुख्यमन्त्री केन्द्रीयमन्त्रिणे नायडु इत्यस्मै भोपाल-तालस्य निर्माणस्य इतिहासस्य विषये सूचनां प्रदत्तवान्। सः अवदत् यत् अयं तालः प्राकृतिकशिलाः छित्त्वा निर्मितः अस्ति।
केन्द्रीयमन्त्री नायडू मध्यप्रदेशाय अद्य चतस्रः नूतनाः प्रत्यक्षविमानसेवाः प्रदातुं भोपालम् आगतवान् अस्ति। सः अत्र राजाभोज-विमानतले आयोजिते कार्यक्रमे मुख्यमन्त्रिणा डॉ. मोहन यादवेन सह प्रदेशस्य चतसृणां नूतनानां प्रत्यक्षविमान-सेवानां शुभारम्भं करिष्यति। एतासु भोपाल-रीवा, भोपाल-पाटना, रीवा-कोलकाता तथा जबलपुर-कोलकाता इति विमानमार्गाः अन्तर्भवन्ति। कार्यक्रमे सः भोपालात् रीवां प्रति गन्तुं प्रथमविमानस्य ध्वजप्रदर्शनं करिष्यति।
Hindusthan Samachar / अंशु गुप्ता