भोपालम्, ०९ अगस्तमासः (हि.स.)। मध्यप्रदेशाय अद्य चतस्रः नवीनाः विमानसेवाः प्रारभ्यन्ते। प्रदेशस्य मुख्यमन्त्री डॉ. मोहनयादवः भोपालस्य राजा भोज-विमानपत्तने आयोजिते कार्यक्रमे एतासां प्रत्यक्ष-विमानसेवानां शुभारम्भं करिष्यति। एतासु भोपाल-रीवा, भोपाल-पाटना, रीवा-कोलकाता तथा जबलपुर-कोलकाता विमानमार्गाः अन्तर्भवन्ति।

अस्मिन् अवसरे मुख्यमन्त्री डॉ. यादवः भोपालात् रीवां प्रति प्रथमविमानस्य ध्वजप्रदर्शनं करिष्यति। कार्यक्रमे केन्द्रीयनागरिकविमाननमन्त्री किन्जारापु राममोहननायडुः, उपमुख्यमन्त्री राजेन्द्र-शुक्लः, केन्द्रीयनागरिक-विमानन-मन्त्रालयस्य सचिवः समीर-कुमारसिन्हा, भारतीय-विमान-पत्तन-प्राधिकरणस्य अध्यक्षः विपिनकुमारः, अलायन्स-एयर-संस्थायाः अध्यक्षः अमितकुमारः, विमानन-विभागस्य अपरमुख्यसचिवः सञ्जय-कुमारशुक्लः, विमाननायुक्तः चन्द्रमौली-शुक्लः, भोपाल-विमानपत्तनस्य निदेशकः आलोकत्रिपाठी इत्यादयः अन्ये च गणमान्याः अतिथयः उपस्थिताः भविष्यन्ति।

जनसम्पर्काधिकारिणी जूही श्रीवास्तव: अवदत् यत् एतासां नवीनसेवानां प्रारम्भेन प्रदेशस्य आन्तरिक-अन्तर्राज्यीय-विमानसम्पर्कः अधिकं सुदृढः भविष्यति। एतासां सेवासञ्चालनं अलायन्स-एयर-संस्थया क्रियते। एतेषां सर्वेषां घरेलुविमानमार्गाणां कृते मध्यप्रदेशस्य नागरिकविमानननीतेः अन्तर्गतं वित्तीय-सहायता प्रदीयते। प्रत्येकस्मिन् आवागमनचक्रे राज्यशासनेन दश-मिलियनरूप्यकाणि अर्थात् एककोटि-रूप्यकपर्यन्तं व्यवहार्यता-अन्तर-निधिः प्रदास्यते।

सा अवदत् यत् राज्यशासनेन विमानसम्पर्कस्य विस्तारः निरन्तरं प्राथमिकतां प्रदीयते। शासनस्य नीत्यनुसारम् अद्यावधि अष्ट नवीन-विमानमार्गाः अनुमोदिताः सन्ति। तेषु चतुर्षु मार्गेषु विमानसेवाः प्रारब्धाः सन्ति, अपरं च चतुर्षु नवीनमार्गेषु सेवाः प्रारभ्यन्ते।

नीत्यन्तर्गतं पूर्वं प्रारब्धेषु विमानमार्गेषु रीवा-दिल्ली, रीवा-इन्दौर, रीवा-रायपुर तथा इन्दौर-अबुधाबी इत्येते मार्गाः सम्मिलिताः सन्ति।

जनसम्पर्काधिकारिण्याः अनुसारं भोपाल-रीवा प्रत्यक्षविमानसेवया प्रदेशस्य अन्तर्गतः विमानसम्पर्कः सुदृढः भविष्यति। अनया सेवया राजधानी भोपालः विन्ध्यक्षेत्रेण सह प्रत्यक्षविमानसम्पर्केन अधिकं सुदृढतया सम्बद्धः भविष्यति।

तथैव भोपाल-पाटना प्रत्यक्षविमानसेवया मध्यप्रदेशस्य राजधानी भोपालः बिहारस्य राजधान्या पटना-नगरेण सह प्रत्यक्षतया सम्बद्धः भविष्यति। अनेन उभयोः राज्ययोः मध्ये आवागमनं सुकरं भविष्यति। मध्यप्रदेशे निवसतां बिहारस्य बहुसंख्यक-जनानां, यात्रिकाणां, व्यापारिणां तथा व्यवसायिनां च कृते एषा सेवा सुविधाजनिका भविष्यति।

रीवा-कोलकाता तथा जबलपुर-कोलकाता इत्येतयोः मध्ये प्रत्यक्षविमान-सेवानां प्रारम्भेन प्रदेशस्य एतयोः महत्त्वपूर्णनगरयोः कोलकातानगरेण तथा पूर्वभारतस्य विभिन्नैः क्षेत्रैः सह विमानसम्पर्कः अधिकं सुदृढः भविष्यति।

Hindusthan Samachar / Divya Ranjan