लखनऊ, ०१ सितम्बरमासः (हि.स.)। समाजकल्याण-विभागस्य राज्यमन्त्री (स्वतन्त्रप्रभारः) असीम अरुणः मङ्गलवासरे लखनऊस्थिते खुनखुनजी-कन्या-स्नातकोत्तर-महाविद्यालये आयोजिते राज्यस्तरीय-युवा-महोत्सवे ‘हौसलों की उड़ान २०२६’ इत्यत्र मुख्यातिथिरूपेण सहभागितां कृतवान्। अस्मिन् अवसरे तेन महाविद्यालयस्य छात्राभिः सह प्रत्यक्षं संवादं कृत्वा शिक्षायाः सह क्रीडासु सांस्कृतिक-कार्यक्रमेषु च तासां उत्कृष्ट-सहभागितायाः प्रशंसा कृता।

समारोहं सम्बोधयन् मन्त्री असीम अरुणः उक्तवान्, “अस्माकं पुत्रीषु अपारं कौशलम् आत्मविश्वासश्च वर्तते। अध्ययनस्य सह क्रीडासु सांस्कृतिक-कार्यक्रमेषु च तासां रुचिः एतत् प्रमाणयति यत् ताः सर्वेषु क्षेत्रेषु नूतनान् कीर्तिमान् स्थापयितुं सज्जाः सन्ति। पुत्रीणाम् एतं साहसं प्रतिभां च अहं प्रणमामि।” तेन पारम्परिक-क्रीडानां सांस्कृतिक-कार्यक्रमाणां च माध्यमेन छात्राणां मनोबलवर्धनाय महाविद्यालय-प्रशासनस्य प्रयत्नानां विशेषरूपेण धन्यवादः प्रदत्तः।

महाविद्यालये सञ्चाल्यमानायाः ‘मुख्यमन्त्री अभ्युदय-योजनायाः’ लाभं प्राप्य ८० छात्राणां विभिन्नासु परीक्षासु चयनं जातम् अस्ति। मन्त्री असीम अरुणः उक्तवान् यत् अत्र प्रतियोगी-परीक्षाणां सिद्धतां कुर्वतीनां छात्राणां अधिकं सशक्तीकरणाय तथा डिजिटल-संसाधनैः सह तासां संयोजनाय शीघ्रमेव आधुनिक-सङ्गणक-प्रयोगशालायाः स्थापना करिष्यते। अस्याः प्रयोगशालायाः निर्माणेन अभ्युदय-कोचिङ्ग्-केन्द्रस्य विद्यार्थिभ्यः ऑनलाइन-अध्ययन-सामग्री, मॉक-परीक्षणं तथा डिजिटल-अनुसन्धानकार्ये प्रत्यक्षं साहाय्यं प्राप्स्यते।

Hindusthan Samachar / Dheeraj Maithani