Enter your Email Address to subscribe to our newsletters
पश्चिमी सिंहभूमः, 10 सितंबरमासः (हि.स.)।पश्चिमसिंहभूमिमण्डले डेंगूरोगस्य संक्रमणस्य निवारणं प्रति उपायुक्तः मनीषकुमारः स्वास्थ्यविभागाय सघननिरीक्षणस्य प्रभाविनियन्त्रणाभियानस्य च सञ्चालनस्य निर्देशं प्रदत्तवान्। गुरुवासरे जिलासमाहरणालयस्य सभागारे दृश्यश्रव्यसम्मेलनमाध्यमेन आयोजितायां समीक्षासभायां उपायुक्तः चिकित्साधिकारिभ्यः डेंगूरोगस्य निवारणं, संदिग्धरोगिणां समये एव अभिज्ञानं, परीक्षणं, उपचारं तथा जनानां मध्ये जागरूकतावर्धनं प्रति विशेषं बलं दत्तवान्।
उपायुक्तः मनीषकुमारः निर्देशं दत्तवान् यत् स्वास्थ्यकर्मचारिणः क्षेत्रे निरन्तरं निरीक्षणं कुर्वन्तु तथा गृहे गृहे गत्वा जनान् डेंगूरोगस्य निवारणोपायानां विषये सूचयन्तु। सः स्पष्टं कृतवान् यत् डेंगूरोगस्य प्रसारं निवारयितुं गृहेषु तेषां समीपे च जलस्य सञ्चयः न भवेत् तथा नियमितरूपेण स्वच्छता पालनीया। सः वातशीतकयन्त्राणां, पुष्पपात्राणां, जलटङ्कीनां, बाल्टीनां, पीपानां, पुरातनचक्राणां, भग्नपात्राणां तथा अन्येषां जलपात्राणां नियमितस्वच्छतां सुनिश्चितं कर्तुं निर्देशं दत्तवान्।
मनीषकुमारः संदिग्धरोगिणां अभिज्ञाने शीघ्रतां कर्तुं तान् च समये एव स्वास्थ्यकेन्द्रं प्रति प्रापयितुं निर्देशं दत्तवान्। सः अवदत् यत् तीव्रज्वरः, शिरोवेदना, नेत्रयोः पृष्ठभागे वेदना, मांसपेशीषु सन्धिषु च वेदना तथा त्वचि रक्तवर्णीयाः चिह्नाः इत्यादयः लक्षणाः दृश्यन्ते चेत् तत्कालं चिकित्सकीयपरामर्शः ग्रहीतव्यः। गम्भीरलक्षणयुक्तेभ्यः रोगिभ्यः विलम्बं विना उत्तमचिकित्सासुविधां प्रदातुमपि निर्देशः दत्तः।
सभायां ११ सितम्बरदिने आयोज्यमानस्य स्वैच्छिकरक्तदानशिबिरस्य सज्जतायाः अपि समीक्षा कृता। मण्डले सदरचिकित्सालये चाईबासायाम्, अनुमण्डलीयचिकित्सालये चक्रधरपुरे, सामुदायिकस्वास्थ्यकेन्द्रेषु बन्दग्रामे, गोईलकेरायां, झींकपान्याम्, तान्तनगरे च रक्तदानशिबिराणि आयोजयिष्यन्ते। उपायुक्तः सर्वेषु केन्द्रेषु रक्तदातॄणां पञ्जीकरणं, चिकित्सकीयपरीक्षणं, रक्तसङ्ग्रहणं तथा आवश्यकयन्त्राणां व्यवस्था समये एव पूर्णां कर्तुं निर्देशं दत्तवान्। सः स्वस्थानां योग्यतानां च नागरिकानां, युवजनानां, सामाजिकसङ्घटनानां विभिन्नसंस्थानां च रक्तदानशिबिरे सक्रियसहभागितायै आह्वानं कृतवान्।
सभायां सहायकसमाहर्त्री ईरा जोरवाल्, सिविलसर्जनः, सर्वे प्रभारीचिकित्साधिकारिणः, चिकित्साधिकारिणः तथा क्षेत्रीयस्वास्थ्यकार्यकर्तारः दृश्यश्रव्यमाध्यमेन सहभागितवन्तः।
---------------
Hindusthan Samachar / अंशु गुप्ता