नवदिल्ली, १० सेप्टेम्बरमासः (हि.स.)। शियाइसमाइली-यवनानां पञ्चाशत्तमः इमामः तथा आगा-खान-विकास-निकायस्य अध्यक्षः राजकुमारः रहीम-आगा-खान-पञ्चमः गुरुवासरे प्रधान-मन्त्रिणा नरेन्द्रमोदिना सह मिलितवान्। प्रधानमन्त्री अस्यां साक्षात्कारवार्तायां तस्य दिवङ्गतस्य पितुः, ४९ तमस्य इमामस्य आगा-खान-चतुर्थस्य च विकासकार्येषु योगदानं सस्नेहं स्मृतवान्। राजकुमारस्य रहीम-आगा-खान-पञ्चमस्य एष: भारतस्य प्रथमः आधिकारिकः यात्रावसरः अस्ति।

प्रधानमन्त्रिणा सामाजिकमाध्यमे ‘एक्स’ इत्यत्र मिलनस्य चित्रं संस्थाप्य उक्तं यत् राजकुमारं रहीम-आगा-खान-पञ्चमेन सह मिलित्वा प्रसन्नता जाता। सः उक्तवान् यत् साक्षात्कारवार्तायां दिवङ्गतस्य आगा-खान-चतुर्थस्य विकासप्रयासेषु स्थायिनः योगदानस्य स्मरणं कृतम्। प्रधानमन्त्री उक्तवान् यत् भारतस्य आगा-खान-विकासनिकायस्य च मध्ये स्वास्थ्यसेवा, कृषिः, ग्रामीणविकासः, युवशक्ति-सशक्तीकरणं महिलासशक्तीकरणं च इत्येतेषु क्षेत्रेषु सहभागिताम् अधिकं सुदृढां कर्तुं उपायानां विषये चर्चा अभवत्।

अस्याः पूर्वं विदेशमन्त्री एस. जयशङ्करः राजकुमारं रहीम-आगा-खान-पञ्चमं मिलितवान्। जयशङ्करेण ‘एक्स’ इत्यत्र साक्षात्कारस्य चित्राणि संस्थाप्य सूचितं यत् तेन आगा-खान-विकासनिकायेन सामाजिकविकासस्य विरासत्संरक्षणस्य च क्षेत्रयोः क्रियमाणानां प्रभावशालिनां कार्याणां विषये चर्चा कृता। भारतस्य विदेशेषु च एतेषु क्षेत्रेषु सहयोगस्य भाविसम्भावनानां विषये अपि विचारविमर्शः कृतः।

उल्लेखनीयं यत् आगा-खान-विकास-निकायः भारतस्य स्वास्थ्य, शिक्षा, ग्रामीणविकास, कृषि, संस्कृतिः तथा अन्येषु सामाजिकविकासक्षेत्रेषु दीर्घ-कालात् कार्यं कुर्वन् अस्ति।

Hindusthan Samachar / Divya Ranjan