Enter your Email Address to subscribe to our newsletters
मीरजापुरम्, १० सेप्टेम्बरमासः (हि.स.)। नगरस्य गुरुकृपामण्डपमे, धुन्धीकटरायां गुरुवासरे विश्वहिन्दुपरिषदः स्थापनादिवसः आचरितः। कार्यक्रमस्य शुभारम्भः चक्रधारिणः श्रीकृष्णस्य रामदरबारस्य च पुरतः दीपप्रज्वालनेन अभवत्। वक्तारः हिन्दूसमाजस्य सङ्घटनाय, सामाजिक-समरसतायाः वर्धनाय, नववंशस्य संस्कारसम्पन्नतायै च बलं दत्तवन्तः।
मुख्यातिथिः विहिप-सङ्घटनस्य प्रान्तो-पाध्यक्षः विद्याभूषणः अवदत् यत् विश्वहिन्दुपरिषदः स्थापना २९ अगस्तमासे १९६४ तमे वर्षे श्रीकृष्णजन्माष्टमीदिने मुम्बईनगरस्य सान्दीपनि-साधनालये अभवत्। सः स्थापनायाः पृष्ठभूमिं प्रकाशयन् अवदत् यत् अस्यां दादासाहब्-आप्टे-महोदयस्य महत्त्वपूर्णा भूमिका आसीत्। दादासाहब-आप्टे एव हिन्दुस्थान-समाचार-संस्थायाः संस्थापकः अपि आसीत्।
विशिष्टातिथिः जीडी-बिन्नानी-स्नातकोत्तर-महाविद्यालयस्य प्राचार्यः डॉ. अशोकसिंहः हिन्दूसमाजस्य सङ्घटनस्य जागरणस्य च तथा जीवनमूल्यानां संरक्षणस्य आवश्यकता प्रतिपादितवान्। विभागमन्त्री रामचन्द्रशुक्लः प्रयागराजे आयोजितस्य प्रथमविश्वहिन्दुसम्मेलनस्य तथा उडुपी-धर्मसंसदः माध्यमेन सामाजिकसमरसतायाः कृते कृतानां प्रयासानां विषये सूचनां दत्तवान्।
प्रान्तसत्सङ्गप्रमुखः महेशतिवारी विहिप-सङ्घटनस्य विविधेषु आन्दोलनेषु सेवाकार्येषु च कृतानां कार्याणां उल्लेखं कृतवान्। जनपदाध्यक्षः हरिशङ्करमिश्रः अवदत् यत् बालकेषु संस्काराणां विकासाय प्रत्येकस्मिन् गृहे साप्ताहिक-सत्सङ्गस्य आयोजनं तथा परिवारजनैः सह भोजनस्य परम्परायाः प्रोत्साहनं करणीयम्।
कार्यक्रमस्य अध्यक्षता नगराध्यक्षः राजमाहेश्वरी कृतवान् तथा सञ्चालनं नगरमन्त्री बृजेशगुप्तः कृतवान्। अस्मिन् अवसरे प्रवीणः, अभयमिश्रः, अरविन्द-सारस्वतः, अशोकदुबे, मनोजजायसवालः, अशुकान्तचुनाहे, लक्ष्मीकान्तपाण्डेयः, पङ्कजटण्डनः, चन्द्रप्रकाशः, दीपाउमरः, शिखाअग्रवालः इत्यादयः बहवः पदाधिकारिणः कार्यकर्तारश्च उपस्थिताः आसन्।
Hindusthan Samachar / Divya Ranjan