शिमला, 11 सितंबरमासः (हि.स.)।

मुख्यमन्त्री ठाकुरसुखविन्द्रसिंहसुक्खुः उक्तवान् यत् प्रदेशसर्वकारः विद्यार्थिभ्यः गुणवत्तापूर्णशिक्षां सुनिश्चितं कर्तुं हिमाचलप्रदेशराष्ट्रीयविधिविश्वविद्यालयस्य (एनएलयू), शिमला इत्यस्य वर्तमानायाः आधारभूतसंरचनायाः विस्ताराय सुदृढीकरणाय च सहयोगं करिष्यति। मुख्यमन्त्रिणा गुरुवासरे सायंकाले विश्वविद्यालयसम्बद्धानां विभिन्नविषयाणां समीक्षां कुर्वता उक्तं यत् प्रदेशसर्वकारः विश्वविद्यालयस्य आधारभूतसंरचनां अधिकं सुदृढं कर्तुं प्रतिबद्धः अस्ति। तेन विश्वविद्यालयेन स्वसंसाधनानां स्वयमेव सृजनं कर्तुं बलमपि प्रदत्तम्।

ठाकुरसुखविन्द्रसिंहसुक्खुः उक्तवान् यत् प्रदेशसर्वकारः छात्राणां छात्राणां च कृते छात्रावासानां निर्माणे सहयोगं करिष्यति। छात्रावासस्य सुरक्षां वर्धयितुं छात्रावासस्य परिसीमायाः समीपे कण्टकिततारस्य प्राकारं निर्मातुं निर्देशाः अपि तेन प्रदत्ताः। तेन उक्तं यत् परिसरस्य न्यूनविद्युद्दाबसमस्यायाः समाधानाय नूतनः विद्युत्परिवर्तकः स्थापयिष्यते तथा छात्रावासस्य उपरि गच्छन्तीं उच्चतनावविद्युत्पङ्क्तिं स्थानान्तरयितुं निर्देशाः प्रदत्ताः।

विद्यार्थिनां अन्यकर्मचारिणां च सुरक्षां सुनिश्चितं कर्तुं परिसरस्य अन्तः स्थितान् ऊर्ध्वाधरविद्युत्तारान् भूमिगतं कर्तुं पर्याप्तां धनराशिं उपलब्धां कारयिष्यामीति मुख्यमन्त्रिणा आश्वासनं प्रदत्तम्।

मुख्यमन्त्रिणा जलशक्तिविभागाय मलजलशोधनसंयन्त्रस्य स्थापनाय उपयुक्तस्थलस्य चिह्नीकरणाय निर्देशाः प्रदत्ताः। तेन उक्तं यत् पेयजलस्य न्यूनतायाः समस्यायाः समाधानाय प्रदेशसर्वकारः पर्याप्तां धनराशिं उपलब्धां कारयिष्यति।

हिमाचलप्रदेशराष्ट्रीयविधिविश्वविद्यालयस्य, शिमला इत्यस्य कुलपतिना प्रो. प्रीतिसक्सेनया विश्वविद्यालयस्य दीर्घकालतः लम्बितानां समस्याणां समाधानाय विशेषं ध्यानं प्रदर्शितवतः मुख्यमन्त्रिणः आभारः व्यक्तः।

सभायां हिमाचलप्रदेशस्य उच्चन्यायालयस्य मुख्यन्यायाधीशः न्यायमूर्तिः गुरमीतसिंहसन्धावालिया, महाधिवक्ता अनूपरतनः, मुख्यसचिवः के.के.पन्तः, प्रधानसचिवः देवेशकुमारः, शिक्षासचिवः राकेशकँवरः तथा अन्ये वरिष्ठाधिकारिणः अपि उपस्थिताः आसन्।

---------------

Hindusthan Samachar / Dheeraj Maithani