Enter your Email Address to subscribe to our newsletters
जयपुरम्, 11 सितंबरमासः(हि.स.)।
राजस्थाने नगरीयनिकायनिर्वाचनस्य द्वितीयस्य अन्तिमस्य च चरणस्य राजनीतिकं महासङ्ग्रामः अद्य प्रातः ७ वादने प्रारब्धः। प्रथमचरणे अभिलेखीयं ७६.४१ प्रतिशतं मतदानं जातम्। अधुना द्वितीयचरणे १४७ निकायानां ४,७७४ प्रभागेषु मतदातारः स्वमताधिकारस्य प्रयोगं कुर्वन्ति। प्रदेशस्य ९,७५८ मतदानकेन्द्रेषु ८७.६० लक्षाधिकाः मतदातारः १८,२६६ प्रत्याशिनां राजनीतिकं भविष्यं विद्युद्यन्त्रेषु (ईवीएम) मतानि निक्षिप्य निर्णेष्यन्ति। अस्मिन् मध्ये प्रातः १० वादनपर्यन्तं मतदानप्रतिशतस्य सूच्यां बाडमेरमण्डलस्य धोरीमन्नानगरपालिकया सर्वाधिकमतदानेन प्रथमस्थानं प्राप्तम्, यदा उदयपुरनगरनिगमे मतदानस्य गतिः सर्वाधिकं मन्दा आसीत्।
निर्वाचनविभागेन प्रकाशिते प्रातः १० वादनपर्यन्तं मतदानप्रतिशते बालोतरामण्डलस्य धोरीमन्नानगरपालिकायां ४४.३८ प्रतिशतं मतदानं अभिलिखितम्। द्वितीयचरणे सूचीकृतानां सर्वेषां निकायानां मध्ये एतत् सर्वाधिकम् अस्ति। धोरीमन्नायाः अनन्तरम् अलवरमण्डलस्य बडौदामेवनगरपालिका ४४.०२ प्रतिशतमतदानेन द्वितीयस्थाने आसीत्। गङ्गानगरमण्डलस्य गजसिंहपुरनगरपालिकायां ४२.५१ प्रतिशतं तथा झालावाडमण्डलस्य मनोहरथानानगरपालिकायां ४२.३४ प्रतिशतं मतदानम् अभवत्। फलोदीमण्डलस्य बापनगरपालिकायामपि ४१.६२ प्रतिशतमतदातारः स्वमताधिकारस्य प्रयोगम् अकुर्वन्।
अपरतः उदयपुरनगरनिगमे सर्वन्यूनं १२.०६ प्रतिशतं मतदानम् अभिलिखितम्। तदनन्तरं बांसवाडामण्डलस्य कुशलगढनगरपालिकायां १३.९५ प्रतिशतं, कोटानगरनिगमे १४.५५ प्रतिशतं तथा अजमेरनगरनिगमे १४.५८ प्रतिशतं मतदानम् अभवत्। जयपुरनगरनिगमेऽपि मतदानस्य प्रतिशतं केवलं १६.२३ पर्यन्तमेव प्राप्तम्।
द्वितीयचरणे जयपुर, जोधपुर, कोटा, बीकानेर, उदयपुर तथा अजमेर इत्येतानि षट् प्रमुखनगरनिगमानि समेत्य अनेकमहत्त्वपूर्णमण्डलानां मतदातारः मतदानं कुर्वन्ति। प्रमुखनगरनिगमेषु प्रारम्भिकमतदानप्रतिशतं दृष्ट्वा उदयपुरनगरनिगमः १२.०६ प्रतिशतैः सर्वाधिकं पश्चात् अस्ति। कोटानगरनिगमे १४.५५ प्रतिशतं, अजमेरनगरनिगमे १४.५८ प्रतिशतं तथा जयपुरनगरनिगमे १६.२३ प्रतिशतं मतदानम् अभवत्। बृहन्नगरेषु तुलनात्मकरूपेण न्यूनमतदानप्रतिशतेन निर्वाचनगतिविधीनां मध्ये मतदातॄणां सहभागितां प्रति चर्चा वर्धिता अस्ति।
राजस्थानस्य राज्यपालेन हरिभाऊ बागडे इत्यनेन प्रातः १०.४० वादने जयपुरस्य केशवनगरस्थिते सामुदायिकभवनस्य मतदानकेन्द्रे गत्वा स्वमतं प्रदत्तम्। मतदानस्य अनन्तरं राज्यपालेन मतदानं लोकतन्त्रस्य परमपावनं पर्व इति वर्णितम् तथा प्रदेशवासिभ्यः अस्मिन् पर्वणि वर्धमानरूपेण भागं ग्रहीतुं आह्वानं कृतम्।
द्वितीयचरणस्य मतदानस्य समये प्रदेशस्य अनेके प्रमुखाः राजनीतिकनेतारः अपि स्वमताधिकारस्य प्रयोगाय मतदानकेन्द्रेषु प्राप्तवन्तः। मुख्यनिर्वाचनाधिकारी नवीनमहाजनेन पत्न्या सुषमामहाजनेन पुत्र्या माहिकामहाजनेन च सह मतदानं कृतम्। मुख्यसचिवेन वी. श्रीनिवासेन पोद्दारमूकबधिरविद्यालयस्थिते मतदानकेन्द्रे मतं प्रदत्तम्। मतदानस्य अनन्तरं तेन उक्तं यत् अस्मिन् समये प्रशासनस्य पक्षतः उत्तमाः व्यवस्थाः कृताः सन्ति।
भाजपायाः प्रदेशाध्यक्षेण मदनराठौडेन पालीमण्डलस्य सुमेरुपुरे मतदानं कृतम्। लोकसभाध्यक्षः ओमबिर्ला अपि मतदानाय मतदानकेन्द्रं प्राप्तवान्। बिर्ला प्रभागक्रमाङ्कस्य ८३ मतदाता अस्ति तथा स्वनिवासस्य समीपे स्थिते स्प्रिङ्गडेल्सविद्यालयस्य मतदानकेन्द्रे मतदानं कर्तुं प्राप्तवान्। तेन पङ्क्तौ स्थित्वा मतदानं कृतं तथा तत्र उपस्थितैः जनैः सह वार्तालापोऽपि कृतः।
जोधपुरेऽपि राजनीतिकक्षेत्रस्य प्रमुखाः नेतारः मतदानकेन्द्रेषु प्राप्तवन्तः। पूर्वमुख्यमन्त्रिणा अशोकगहलोत् इत्यनेन मतदानं कृतम्, अपरतः केन्द्रीयमन्त्रिणा गजेन्द्रसिंहशेखावतेन परिवारजनैः सह मतदानकेन्द्रं गत्वा स्वमताधिकारस्य प्रयोगः कृतः। उभयोः नेतृणां मतदानस्य समये राजनीतिकगतिविधीनां विषयेऽपि चर्चा अभवत्।
कोटानगरस्य इन्द्रविहारस्थिते शिवज्योतिविद्यालये प्रभागक्रमाङ्कस्य ९४ मतदानकेन्द्रे ऊर्जामन्त्रिणा मतदानं कृतम्। मतदानस्य अनन्तरं तेन पूर्वनगरीयविकासमन्त्री शान्तिधारीवालस्य तीव्ररूपेण आलोचना कृता। ऊर्जामन्त्रिणा आरोपितं यत् धारीवालेन केवलं ‘कङ्गूरे’ स्थापिताः तथा तदेव विकासरूपेण प्रदर्शितम्, यदा तु मूलभूतकार्याणि अपूर्णानि सन्ति। तस्य वक्तव्यस्य अनन्तरं कोटानगरस्य स्थानीयराजनीतौ निर्वाचनविषयकः विवादः अधिकं तीव्रः भविष्यति इति सङ्केताः प्राप्ताः।
उल्लेखनीयं यत् राजस्थाने अस्मिन् वर्षे ‘एकं राज्यम्, एकं निर्वाचनम्’ इति दिशायां नगरीयनिकायनिर्वाचनं द्वयोः चरणयोः आयोज्यते। प्रथमचरणे अभिलेखीयमतदानस्य अनन्तरम् अधुना द्वितीयचरणे प्रदेशस्य १४७ निकायानां मतदातारः स्वस्वप्रभागेषु पार्षदानां चयनाय मतदानं कुर्वन्ति। निर्वाचनपरिणामाः १४ सितम्बरदिनाङ्के घोषिताः भविष्यन्ति, ततः प्रत्याशिनां भाग्यस्य निर्णयः भविष्यति।
---------------
Hindusthan Samachar / Dheeraj Maithani