नवदिल्ली, १२ सेप्टेम्बरमासः (हि.स.)। राजधानीनगरे गणपतिमहोत्सवस्य सज्जता उत्साहेन प्रचलति। गणपति-महोत्सवस्य आयोजनाय आयोजकैः अनेकाः नवीनाः आकर्षकाः व्यवस्थाः क्रियन्ते। लक्ष्मीनगरे स्थितं श्रीगणेश-सेवामण्डलं, दिल्ली, अस्मिन् विषये भव्यस्य आयोजनस्य माध्यमेन द्वादशज्योतिर्लिङ्गानां दर्शनस्य अवसरं प्रदास्यति। १४ सेप्टेम्बरमासात् २५ सेप्टेम्बरमासपर्यन्तं लक्ष्मीनगरस्य प्रियदर्शिनीविहारे स्थिते डीडीए-मिनी-क्रिकेट-क्रीडाङ्गणे, बैंक-एन्क्लेव इत्यत्र आयोजितस्य गणपतिमहोत्सवस्य विषयः “विघ्नहर्ता से विकासकर्ता—२५ वर्षाणाम् आस्था, २०४७ विकसितस्य आधुनिक-भारतस्य संकल्पः” इति निर्धारितः अस्ति।

संस्थायाः संस्थापकाध्यक्षः महेन्द्रलड्डा पत्रकारसम्मेलने अवदत् यत् संस्था विगतेभ्यः २५ वर्षेभ्यः लक्ष्मीनगरे ‘दिल्ली का महाराजा’ इति नाम्ना गणेशमहोत्सवम् आयोजयति। अस्मिन् वर्षे ‘गणपतिबप्पा दिल्ली का महाराजा’ इत्यस्य २५तमः गणेशमहोत्सवः अस्ति, यं ते विशेषं स्मरणीयं च कर्तुम् इच्छन्ति। रजत-जयन्तीवर्षं विशेषं कर्तुं अस्मिन् वर्षे भारतस्य प्राचीनसांस्कृतिकवैभवात् आरभ्य आधुनिकस्य आत्मनिर्भरभारतस्य पर्यन्तं विकासयात्रा गणेशमहोत्सवस्य विषयेण सह सम्बद्धा कृता अस्ति।

तेन उक्तं यत् अस्मिन् वर्षे ‘विघ्नहर्ता त: विकासकर्ता’ इति विशेषसंकल्पनायाः अन्तर्गतं दिल्ली-महाराजस्य गणपतिमूर्तेः हस्तयोः मेड-इन-इण्डिया-ड्रोनयानं, ब्रह्मोसमिसाइल् तथा सेमीकण्डक्टर च प्रदर्शयिष्यन्ते। एषा प्रस्तुति आध्यात्मिक-श्रद्धया सह भारतस्य वैज्ञानिक-प्राविधिक-रक्षाक्षेत्रेषु वर्धमानस्य आत्म-निर्भरतायाः प्रतीका भविष्यति।

महोत्सवस्थले गणपतिबप्पा-दिल्ली-महाराजस्य भव्यायाः मङ्गलमूर्तेः सह अस्मिन् वर्षे मञ्चे विठ्ठलभगवतः षड्फिटपरिमिता मूर्तिः, रुक्मिणीमातुः पञ्चफुटपरिमिता मूर्तिः तथा सन्त-ज्ञानेश्वरस्य, सन्ततुकारामस्य, खाटूश्याम-महाराजस्य च मूर्तयः विशेषाकर्षणं भविष्यन्ति। महोत्सवस्थलस्य मण्डपः द्वादशज्योतिर्लिङ्गानां भव्यविषयेण सज्जीकृतः अस्ति। तस्य मुख्यद्वारस्य केन्द्रे भगवत: केदारनाथस्य मन्दिरस्य तथा तस्योभयतः देशस्य सर्वेषां द्वादश-ज्योतिर्लिङ्गमन्दिराणां कलात्मकं प्रस्तुतिकरणं भविष्यति। एतद् भव्यं प्रवेशद्वारं श्रद्धालूनां प्रमुखम् आकर्षणं भविष्यति।

महेन्द्रलड्डा अवदत् यत् अस्मिन् वर्षे दिल्ली-महाराजस्य मङ्गलमूर्तेः स्थापना-वसरे भव्यकलशशोभायात्रा ‘अनेकतायाम् एकता’ इति विषयेण आधारितां भविष्यति। अस्यां शोभायात्रायां इन्द्रधनुषः सप्तवर्णानाम् इव भारतस्य विभिन्न-प्रदेशानां सांस्कृतिकवैविध्यं सप्तवर्णैः, सप्तप्रदेशैः, सप्तप्रमुख-परम्पराभिश्च प्रस्तुतं करिष्यते। महिलासशक्तीकरणकेन्द्रितायां अस्यां शोभायात्रायां ५२ महिलाः सहभागं करिष्यन्ति। ताभिः ५२ आराध्यशक्ति-पीठानां प्रतीकात्मकं प्रस्तुतिकरणं भविष्यति।

शोभायात्रायां राजस्थानस्य गङ्गौरयात्रा, बिहारस्य छठपर्व, गुजरातस्य महारास-गरबा-डाण्डियानृत्यं, पंजाबस्य देशभक्ति-पूर्णा प्रस्तुति, दुर्गापूजा, महाराष्ट्रस्य वारीपरम्परा तथा दक्षिण-भारतस्य रामायणाधारिताः प्रदर्शिन्य: समाविष्टाः भविष्यन्ति। पारम्परिकैः ढोल-नगाडैः लोक-कलाकाराणां प्रस्तुतिभिश्च सह एषा शोभायात्रा भारतस्य विविधतायाम् एकतायाः सन्देशं प्रदास्यति।

महेन्द्रलड्डा अवदत् यत् २५तमस्य गणेशमहोत्सवस्य शुभारम्भः १४ सेप्टेम्बरमासे सायं चतुर्वादने भव्यशोभायात्रया भविष्यति तथा सायं षड्वादने मङ्गलमूर्तेः स्थापना भविष्यति। २५ सेप्टेम्बरमासे षट्पञ्चाशद्भोगस्य, महाआरार्तिक्याः तथा गणपतिबप्पा-विसर्जनस्य च आयोजनेन रजतजयन्ती-गणेशमहोत्सवस्य समापनं भविष्यति।

Hindusthan Samachar / Divya Ranjan