पूर्वसिंहभूमिः, १२ सेप्टेम्बरमासः (हि.स.)। आगामीं शारदीयदुर्गापूजां शान्तिपूर्णे, सौहार्दपूर्णे भक्तिमये च वातावरणे सम्पन्नं कर्तुं पूर्वसिंहभूमि-केन्द्रीयदुर्गापूजासमित्या सज्जता प्रारब्धा।

शनिवासरे समितेः अध्यक्षस्य झारखण्ड-सर्वकारस्य पूर्वभूराजस्वमन्त्रिणः दुलाल-भुइयां इत्यस्य आवासीयकार्यालये वार्ताहरसम्मेलनम् आयोजितम्। अस्मिन् सम्मेलने पूजायाः सज्जतायाः समितीनां समस्याभिश्च विषये चर्चा कृता।

समितेः अध्यक्षः दुलालभुइयां अवदत् यत् पूर्वसिंहभूमि-केन्द्रीयदुर्गापूजासमितिः जनपदस्य उभयोः अनुमण्डलयोः एकादशसु च प्रखण्डेषु आयोज्यमानां दुर्गापूजां शान्तिपूर्णरीत्या सम्पन्नां कर्तुं प्रतिबद्धा अस्ति।

विशेषतः ग्रामीणक्षेत्रेषु पूजासमितीनां सम्मुखीभवन्तीनां समस्याः समाधातुं अस्मिन् वर्षे विशेषं ध्यानं दीयते। सः अवदत् यत् समितिः विगतानि अष्ट वर्षाणि यावत् जनपदप्रशासनेन सह समन्वयं स्थापयित्वा जनपदस्य पूजासमितीनां सहयोगेन कार्यं कुर्वती अस्ति।

दुलालभुइयां अवदत् यत् १३ सेप्टेम्बर २०२६ दिनाङ्के समितेः वार्षिक-साधारणसभा आयोजिता भविष्यति। अस्यां सभायां नगरीयग्रामीणक्षेत्रयोः सर्वासां सम्बद्धपूजासमितीनां पदाधिकारिणः आमन्त्रिताः सन्ति।

साधारणसभायां समितेः विस्तारस्य विषये तथा ग्रामीणक्षेत्राणां पूजासमितीनां समस्यासु विस्तृततया चर्चा भविष्यति। ततः सम्बद्धाः समस्याः जनपदप्रशासनस्य समक्षं स्थापयित्वा तासां समाधानाय प्रयत्न: क्रियते।

सः अवदत् यत् गतवर्षेऽपि समितेः प्रयासेन नगरीयग्रामीणक्षेत्रयोः अनेकासां पूजा-समितीनां समस्याः सम्बद्धविभागानां सहयोगेन समाधाताः आसन्।

अस्मिन् वर्षे अधिकसक्रियतया कार्यं क्रियते, येन सर्वाः पूजासमितयः विना कस्यापि समस्यया सुव्यवस्थितरीत्या निर्दोषरूपेण च पूजायाः आयोजनं कर्तुं शक्नुयुः।

वार्ताहरसम्मेलने संयुक्तसचिवः डॉ. श्यामशर्मा, वरिष्ठोपाध्यक्षः बलदेव-सिंहमेहरा, वीरेन्द्रसिंहः, हर्षयादवः, रामबाबूयादवः, कार्यालयसचिवः कमल-रामयादवः, सचिवः निमाईमण्डलः, पवनोपाध्यायः इत्यादयः समितेः अन्ये सदस्याश्च उपस्थिताः आसन्।

Hindusthan Samachar / Divya Ranjan