सीवानम्, 12 सितंबरमासः (हि.स.)।बालानां, गर्भवतीनां महिलानां धात्रीमातॄणां च उत्तमपोषणस्य स्वस्थजीवनशैल्याश्च विषये जनजागरूकताभियानं जनपदे गतिं प्राप्नोति। अस्यैव क्रमस्य अन्तर्गतं पोषणमासः २०२६ इत्यस्य शुभारम्भः कृतः। अस्मिन् वर्षे अभियानस्य विषयः ‘अस्माकम् आङ्गनवाडी, अस्माकं दायित्वम्’ इति निर्धारितः अस्ति। अभियानस्य अवधौ जनपदस्य विभिन्नेषु प्रखण्डेषु आङ्गनवाडीकेंद्रेषु च पोषणसम्बद्धाः विविधाः गतिविधयः आयोजयिष्यन्ते।

कार्यक्रमस्य शुभारम्भः जिलाधिकारी विजयप्रकाशमीणा, उपविकासायुक्तः अमिताभसिंहः, सिविलसर्जनः डॉ. श्रीनिवासप्रसादः, जिलाकार्यक्रमपदाधिकारी मञ्जूकुमारी इत्यादिभिः अन्यैः वरिष्ठाधिकारिभिः तथा जिलाकार्यक्रमप्रबन्धकेन पिरामल्-स्वास्थ्यस्य बलिन्द्रसिंहेन च संयुक्तरूपेण दीपप्रज्वालनं कृत्वा कृतः। ततः अधिकारिभिः पोषणरथस्य हरितध्वजं प्रदर्श्य प्रस्थानं कारितम्। अयं रथः जनपदस्य विभिन्नेषु क्षेत्रेषु गत्वा जनान् पोषणस्य, सन्तुलिताहारस्य स्वस्थजीवनशैल्याश्च विषये जागरूकान् करिष्यति।

कार्यक्रमस्य समये स्थूलधान्यैः निर्मितानां विविधपौष्टिकखाद्यपदार्थानां प्रदर्शिनी आयोजिता। अधिकारिभिः प्रदर्शिन्याः अवलोकनं कृत्वा दैनिकभोजने स्थूलधान्यानां समावेशं कर्तुं तथा स्थानीयस्तरे उपलब्धानां पौष्टिकखाद्यपदार्थानां प्रयोगे बलं दत्तम्। अवसरे अन्नप्राशनसंस्कारः इत्यादयः विविधाः समुदायाधारिताः पोषणगतिविधयः अपि आयोजिताः।

जनपदे पोषणमासस्य आयोजनं ९ सितम्बर्-तः ८ अक्तूबर् २०२६ पर्यन्तं क्रियमाणम् अस्ति। अस्य उद्देश्यं केवलं पोषणसम्बन्धिनीं सूचनां दातुम् न, अपितु परिवारं समुदायं च पोषणस्य प्रति उत्तरदायिनौ कर्तुं तथा जनानां व्यवहारे सकारात्मकं परिवर्तनम् आनेतुम् अस्ति। अस्मिन् अवधौ आङ्गनवाडीकेंद्राणि पोषणजागरूकतायाः प्रमुखकेन्द्ररूपेण विकसितुं तथा समुदायस्य सहभागितां वर्धयितुं विशेषं बलं भविष्यति।

अभियानस्य अवधौ बालानां, गर्भवतीनां महिलानां धात्रीमातॄणां च सन्तुलितस्य पौष्टिकस्य च आहारस्य, आहारे विविधतायाः पर्याप्तप्रोटीनस्य च महत्त्वस्य विषये जानकारी प्रदास्यते। आङ्गनवाडीकेंद्रेषु उपलब्धस्य ताजस्य उष्णस्य च पक्वभोजनस्य गुणवत्तायाः उपयोगितायाश्च विषये अपि समुदायं जागरूकं करिष्यते।

बालानां समुचितविकासाय पोषणेन सह प्रारम्भिकप्रेरणायाः, उचितपरिचर्यायाः, शिक्षणस्य अवसराणां च महत्त्वस्य विषये अभिभावकेभ्यः जानकारी प्रदास्यते। पोषणमासस्य अवधौ प्रधानमन्त्रिमातृवन्दनायोजनायाः मातृस्वास्थ्यसम्बद्धानां विषयाणां च विषये अपि विशेषं ध्यानं दास्यते। गर्भवतीभ्यः महिलाभ्यः सन्तुलिताहारस्य, नियमितस्वास्थ्यपरीक्षणस्य, आवश्यकपरिचर्यायाः, सर्वकारीययोजनाभ्यः प्राप्तानां सुविधानां च विषये जानकारी प्रदास्यते।

अभियानं जनसहभागितया सुदृढं कर्तुं आङ्गनवाडीसेविकानां, महिलापर्यवेक्षकाणां, प्रखण्डकर्मचारिणां सम्बन्धितविभागानां च सक्रियभूमिका निर्धारितास्ति। आयोज्यमानानां गतिविधीनां छायाचित्राणि विवरणानि च जनआन्दोलनपोर्टले उपारोपयिष्यन्ते।

कार्यक्रमे जिलासमन्वयकः पङ्कजकुमारः, सर्वे कर्मचारिणः, बालविकासपरियोजनापदाधिकारिणः, प्रखण्डसमन्वयकाः, महिलापर्यवेक्षकाः आङ्गनवाडीसेविकाश्च उपस्थिताः आसन्।

---------------

Hindusthan Samachar / Dheeraj Maithani