कोलकाता, १२ सेप्टेम्बरमासः (हि.स.)। पश्चिमबङ्गस्य मुख्यमन्त्री शुभेन्दु-अधिकारी शनिवासरे केष्टोपुरे गणेशपूजायाः उद्घाटनं कुर्वन् बाङ्ग्लभाषिभिः अबाङ्ग्लभाषिभिः च मध्ये विभाजनस्य राजनीतिं लक्ष्यीकृतवान्। सः अवदत् यत् राज्ये दीर्घकालं यावत् सनातनसंस्कृतेः परम्पराणां च मिथ्याव्याख्या कृता। मुख्यमन्त्री अवदत् यत् अधुना सर्वविधान् भेदान् समाप्य ‘सनातनबङ्गालस्य’ निर्माणाय कार्यं करिष्यते।

गणेशपूजायाः उद्घाटनानन्तरं स्वसम्बोधने शुभेन्दुः अवदत् यत् पूर्ववर्तिसर्वकाराणां काले भाषायाः, जात्याः उत्सवानां च नाम्ना बङ्गालिनः सनातनिनश्च विभक्तुं प्रयासः कृतः। सः अवदत् यत् गणेशपूजा केवलं महाराष्ट्रस्य परम्परा इति धारणा निर्मिता आसीत्, यद्यपि गणपतिबप्पा सम्पूर्णदेशस्य सनातनिनां आराध्यदेवः अस्ति। तथैव दूर्गापूजा केवलं कोलकातानगरपर्यन्तं सीमिता इति कथनमपि अनुचितम्। छठपूजा केवलं बिहारराज्यस्य जनानां पर्व इति धारणायामपि सः प्रश्नं उत्थापितवान्।

मुख्यमन्त्री अवदत् यत् बङ्गाले निवसतां सर्वेषां समुदायानां स्वकीयाः धार्मिकाः सांस्कृतिकाश्च परम्पराः सन्ति, ताश्च कस्यापि प्रदेशस्य भाषायाश्च सीमाभिः बद्धुं न उचितम्। सः अवदत् यत् अधुना बाङ्ग्लभाषायाः, गुजरातिभाषायाः अथवा अन्यपरिचयस्य नाम्ना निर्मिताः भित्तयः भग्नाः सन्ति तथा सर्वे सनातनिनः हिन्दुस्तानिनश्च सन्ति।

‘धर्मम् अफीम इति कथयन्ति स्म वामपन्थिनः’

वामपन्थिशासनं लक्ष्यीकृत्य शुभेन्दुः अवदत् यत् चतुस्त्रिंशत् वर्षाणि यावत् साम्यवादिभिः धर्मः ‘अफीम’ इति प्रतिपादयन्त्या विचारधारया शासनं कृतम्। सः आरोपितवान् यत् अस्मिन् काले पूजापाठः, पञ्चाङ्गम्, शास्त्राणि, पुरोहिताः, मन्त्रपाठश्च इत्यादयः सनातनपरम्परायाः अङ्गानि दुर्बलानि कृतानि। सः अवदत् यत् दुर्गापूजायाः महालयायाश्च परम्पराभ्यः जनान् दूरं कर्तुमपि प्रयासः कृतः।

मुख्यमन्त्री अवदत् यत् सः श्यामाप्रसादमुखर्जी-स्वामिप्रणबानन्दयोः परम्परां, संस्कृतिं विरासतं च पुनः प्रतिष्ठापयितुम् इच्छति। सः विभाजनस्य त्रासदीम् उल्लिख्य अवदत् यत् अविभक्तबङ्गालस्य जनाः देशविभाजनेन महतीं क्षतिम् अनुभूतवन्तः। सः बाङ्ग्लादेशे हिन्दुसमुदायसम्बद्धानां घटनाक्रमानामपि उल्लेखं कृत्वा अवदत् यत् तत्रत्याभिः परिस्थितिभिः सनातनिनां चिन्ता वर्धिता अस्ति।

शुभेन्दुः तृणमूलकाङ्ग्रेसम् अपि तीव्रतया लक्ष्यीकृतवान्। सः आरोपितवान् यत् गतपञ्चदशवर्षीयशासनस्य प्रारम्भिककाले यद्यपि एतादृशं न अभवत्, तथापि परवर्तिषु वर्षेषु बङ्गालस्य सांस्कृतिकधार्मिकपरम्पराणां परिवर्तनस्य प्रयासः कृतः। सः आरोपितवान् यत् एकस्मिन् वर्षे मुहर्रमस्य कारणेन विजयादशम्यां प्रतिमाविसर्जनस्य तिथौ परिवर्तनं कृतम् आसीत्।

सः अवदत् यत् धार्मिकानुष्ठानानां तिथयः पञ्चाङ्गस्य परम्परायाश्च अनुसारमेव निर्धारयितव्याः। मुख्यमन्त्री इदमपि अवदत् यत् अधुना पितृपक्षे पूजायाः उद्घाटनं कर्तुं प्रवृत्तिरपि स्वीकृता न भविष्यति।

मुख्यमन्त्री जनान् स्वकीयपरिचयस्य, धर्मस्य, संस्कारस्य परम्पराणां च रक्षणाय एकतां कर्तुम् आहूतवान्। सः अवदत् यत् सर्वैः मिलित्वा एतत् सुनिश्चितं कर्तव्यं यत् कश्चिदपि तेषां धार्मिकीं सांस्कृतिकीं च परिचय-परम्परां परिवर्तयितुं न शक्नुयात्।

Hindusthan Samachar / Divya Ranjan