नव दिल्ली, 13 सितंबरमासः (हि.स.)।

प्रधानमन्त्री नरेन्द्रमोदी रविवासरे अत्र अष्टादशस्य ब्रिक्स्-शिखरसम्मेलनस्य पार्श्वे युगाण्डागणराज्यस्य उपराष्ट्रपतिना जेसिकारोज्-एपेल्-अलुपो इत्यनया सह सौहार्दपूर्णां सार्थकां च द्विपक्षीयवार्तां कृतवान्। वार्तायां द्वाभ्यां नेतृभ्यां भारत-युगाण्डयोः द्विपक्षीयसम्बन्धानां व्यापकसमीक्षा कृता तथा ‘वैश्विकदक्षिणस्य’ साझा-हितानि वैश्विकमञ्चेषु दृढतया उत्थापयितुं परस्परसंपर्कं वर्धयितुम् आह्वानं कृतम्।

प्रधानमन्त्रिकार्यालयस्य अनुसारं द्वाभ्यां नेतृभ्यां प्रौद्योगिकी-सहकारिता, क्षमतानिर्माणम्, ज्ञानस्य आदानप्रदानम्, निवेशस्य सुविधाकरणं तथा उभयोः देशयोः निजीक्षेत्रयोः मध्ये सहकारिता इत्येतेषां माध्यमेन प्रमुखप्राथमिकताक्षेत्रेषु सहकारितां अधिकं विस्तारयितुं बलं दत्तम्। उभयपक्षाभ्यां रेखाङ्कितं यत् भारत-युगाण्डयोः विकाससहकारिता उभयोः देशयोः कृते शक्तेः महत्त्वपूर्णः स्रोतः अस्ति।

वार्तायां प्रधानमन्त्री मोदी रूपान्तरितस्य समृद्धस्य च युगाण्डादेशस्य निर्माणाय देशस्य ‘दृष्टि २०४०’ इत्यस्य कृते भारतस्य निरन्तरसमर्थनस्य प्रतिबद्धतां पुनरुक्तवान्। तदनन्तरं द्वाभ्यां नेतृभ्यां एतदपि बलपूर्वकं प्रतिपादितं यत् उभयोः देशयोः जनानां मध्ये सुदृढाः पारस्परिकसम्पर्काः द्विपक्षीयसहकारितां निरन्तरं सुदृढां कुर्वन्ति।

प्रधानमन्त्री मोदी अष्टादशे ब्रिक्स्-शिखरसम्मेलने भागं ग्रहीतुं युगाण्डादेशस्य उपराष्ट्रपतये कृतज्ञतां व्यक्तवान्। द्वाभ्यां नेतृभ्यां वैश्विकमञ्चेषु विकासशीलदेशानां प्राथमिकतानां चिन्तानां च दृढतया प्रस्तुतीकरणाय द्विपक्षीयसमन्वयं अधिकं गभीरं कर्तुं सहमतिः व्यक्ता।

---------------

Hindusthan Samachar / Dheeraj Maithani