पाटलिपुत्रम्, १३ सेप्टेम्बरमासः (हि.स.)। मुख्यमन्त्रिणा सम्राट् चौधरीवर्येण रविवासरे अत्र पाटलिपुत्रे सहायक-प्राध्यापकानां कार्यक्रमं सम्बोधयता उक्तं यत् ब्रिक्स-शिखरसम्मेलनस्य माध्यमेन प्रधानमन्त्रिणः नेतृत्वे अद्य विश्वं भारतस्य उदयं पश्यति। भारतम् अधुना वैश्विक-विषयेषु केवलं स्वमतं प्रस्तुतं कुर्वन् देशः न, अपितु विश्वाय दिशां प्रदातुं सामूहिकसमाधानानि च प्रस्तोतुं समर्था महत्त्वपूर्णा शक्तिः इव उदेति।

मुख्यमन्त्रिणा उक्तं यत् ब्रिक्स-शिखरसम्मेलने भारतस्य अध्यक्षतया अस्याः वर्धमानायाः वैश्विकभूमिकायाः अधिकं सुदृढीकरणं जातम्। तेन उक्तं यत् वर्तमानवैश्विकपरिस्थितिषु शान्तेः, सहयोगस्य संवादस्य च आवश्यकता पूर्वस्मादपि अधिका अस्ति। ब्रिक्स-देशैः बहुपक्षवादस्य, अन्ताराष्ट्रियसहयोगस्य, अधिकन्यायपूर्णायाः सन्तुलितायाश्च वैश्विकव्यवस्थां प्रति प्रतिबद्धता व्यक्ता इति सम्पूर्णविश्वाय महत्त्वपूर्णः सन्देशः अस्ति।

मुख्यमन्त्रिणा उक्तं यत् भारतस्य अध्यक्षतायाम् आयोजितं अष्टादशतमं ब्रिक्स-शिखरसम्मेलनं प्रधानमन्त्रिणः मोदिनः सशक्तस्य, समावेशिनः दूरदर्शिनश्च नेतृत्वस्य ऐतिहासिकम् उदाहरणम् इव उद्भूतम् अस्ति। वैश्विकभूराजनीतिक-तनावानाम् आर्थिकानिश्चिततानां च मध्ये प्रधानमन्त्रिणा नरेन्द्रमोदिना कुशल-कूटनीत्या सर्वान् सदस्यदेशान् एकस्मिन् मञ्चे आनीय सर्वसम्मत्या ‘नवदिल्ली-निर्णयपत्रं’ पारितं कारितम्, यत् भारतस्य वर्धमानस्य वैश्विकप्रभावस्य प्रतीकम् अस्ति।

तेन संयुक्तराष्ट्रसंघे वैश्विकसंस्थासु च सुधाराणां समर्थनं कृत्वा ‘ग्लोबल साउथ’-देशानां स्वरं दृढतया उत्थापितम्। तस्य नेतृत्वे ब्रिक्स्-मञ्चेन वैश्विक-आर्थिकस्थैर्याय सुरक्षितां निरन्तरां च ऊर्जापूर्तिं सुनिश्चितुं विशेषं बलं दत्तम्। तथैव प्राचीनधरोहराणां मूलदेशेभ्यः प्रत्या-वर्तनस्य संकल्पं समावेश्य सांस्कृतिक-सार्वभौमत्वस्य सम्मानं सुनिश्चितं कृतम्।

मुख्यमन्त्रिणा उक्तं यत् संयुक्तराष्ट्र-सुरक्षापरिषदि भारतस्य ब्राजीलस्य च स्थायी-सदस्यतायाः समर्थनात् वैश्विकशासनव्यवस्थायां विकासशील-देशानां वर्धमानभूमिकायै बलं प्राप्तम् अस्ति। भारतं दीर्घकालात् अन्ताराष्ट्रिय-संस्थानि अधिकप्रतिनिधित्व-पूर्णानि, लोकतान्त्रिकानि वर्तमानवैश्विक-वास्तविकतानुरूपाणि च कर्तुं आवश्यकतायै बलं ददाति।

मुख्यमन्त्रिणा आतङ्कवादस्य विरुद्धं ब्रिक्स-देशानां स्पष्टस्य दृढस्य च पगस्य अपि स्वागतं कृतम्। तेन उक्तं यत् २२ एप्रिल २०२५ दिनाङ्के जम्मू-कश्मीरस्य पहलगामे जाते आतङ्कवादी-आक्रमणे कठोरनिन्दा तथा च आतङ्कवादस्य सर्वेषां रूपाणां पद्धतिनां च विरुद्धं कार्यवाहीकर्तुं प्रतिबद्धता आतङ्कवादस्य विरुद्धं वैश्विकैकतायाः महत्त्वपूर्णः सन्देशः अस्ति। आतङ्कवादस्य वित्तपोषणस्य, आतङ्क-वादिनां सीमापारगमनस्य, तेभ्यः सुरक्षिताश्रयस्थानप्रदानस्य च विरुद्धं निर्णायककार्यवाही आवश्यकाऽस्ति।

मुख्यमन्त्रिणा उक्तं यत् वैश्विक-अर्थव्यवस्थायां वर्धमानायाम् अनिश्चित-तायां नियमाधारितायाः, मुक्तायाः निष्पक्षायाश्च व्यापारव्यवस्थायाः आवश्य-कता कालस्य अपेक्षा अस्ति। तेन उक्तं यत् कृत्रिमबुद्धिमत्ता, डिजिटल लोकसंरचना, क्वाण्टम्-प्रौद्योगिकी, नवाचारः च इत्येतेषु क्षेत्रेषु ब्रिक्स-देशानां मध्ये सहयोगः भविष्यस्य अर्थव्यवस्थायै नूतनां दिशां प्रदास्यति। भारतस्य प्रौद्योगिकीयक्षमतायाः डिजिटल लोकसंरचनायाः च अनुभवेन विकास-शीलदेशेभ्यः व्यापकः लाभः प्राप्तुं शक्नोति। मुख्यमन्त्रिणा उक्तं यत् प्रधानमन्त्रिणः श्रीनरेन्द्रमोदिनः नेतृत्वे भारतस्य वर्धमानः प्रभावः प्रत्येकं भारतीयस्य कृते गौरवस्य विषयः अस्ति।

Hindusthan Samachar / Divya Ranjan