Enter your Email Address to subscribe to our newsletters
नवदिल्ली, १३ सेप्टेम्बरमासः (हि.स.)। प्रधानमन्त्री नरेन्द्रमोदी रविवासरे अवदत् यत् ब्रिक्से वैश्विकदक्षिणस्य देशानां विश्वासः वर्धितः अस्ति। अस्य कारणम् अस्ति यत् तेषां स्वरः अत्र श्रूयते तथा तेषाम् अनुभवस्य सम्मानं क्रियते। समाधानानि च तेषां कृते न, अपितु तान् सहभागिनः कृत्वा निर्मीयन्ते।
प्रधानमन्त्री अद्य भारत-मण्डपे आयोजितस्य ब्रिक्स-शिखरसम्मेलनस्य शिथिलता, नवाचारः, सहयोगः स्थैर्यं च इत्येतेषु विषयेषु आयोजिते सत्रे स्वागतोद्बोधने एताः उक्तीः उक्तवान्। सः अवदत् यत् ब्रिक्स इत्यस्य शक्तिः तस्य विविधतायां सहयोगे च अस्ति। अतः विविधता एव अस्माकं परिचयः भवेत्, सहयोगः एव अस्माकं प्रेरणा भवेत् तथा अस्माकं प्रगतिः सम्पूर्णमानवतायै हितकरी भवेत्।
सः अवदत्, “अद्य एतत् सभागारं विभिन्नान् महाद्वीपान्, संस्कृतीः विकासयात्राः च एकत्र संयोजयति। एतत् ब्रिक्सस्य वर्धमानस्य सामर्थ्यस्य, आकर्षणस्य अभूतपूर्वविश्वासस्य च प्रमाणम् अस्ति।”
मोदी अवदत् यत् ब्रिक्सः चतुर्णां स्तम्भानां माध्यमेन समावेशिनः वैश्विकविकासस्य प्रवर्धनाय प्रयासान् कृतवान् अस्ति। भारतस्य अध्यक्षतायां ब्रिक्स इत्तस्य सर्वे प्रयासाः शिथिलता, नवाचारः, सहयोगः सततता च इत्येतेषु केन्द्रिताः अभवन्।
सः अवदत्, “अद्य विश्वे तनावानां सङ्ख्या निरन्तरं वर्धते तथा सामान्यमानवस्य जीवने तस्य अत्यन्तं नकारात्मकः व्यापकश्च प्रभावः भवति। महामारिभिः, जलवायुसम्बद्धैः आपद्भिः आपूर्ति-शृङ्खलानां व्यवधानैश्च प्रदर्शितं यत् अद्यतनस्य परस्परसंबद्धे विश्वे किमपि सङ्कटं केवलम् एकस्मिन् क्षेत्रे सीमितं न तिष्ठति। अतः ब्रिक्स-शिखरसम्मेलने वयं शिथिलताया: वर्धनाय विशेषं बलं दत्तवन्तः।”
प्रधानमन्त्री मोदी अवदत् यत् ब्रिक्स इत्यस्य अन्तर्गतं विकसितानां समाधानानां लाभः वैश्विकदक्षिणं पर्यन्तं प्राप्नुयात्। एतानि समाधानानि स्थानीयानां आवश्यकतानाम् अनुरूपं परिवर्त्य सुलभमूल्यानि सहजतया च स्वीकरणीयानि कर्तुं आवश्यकम् अस्ति। सः अवदत् यत् अस्माकं प्रगतेः लाभः सम्पूर्णमानवतायै प्राप्नुयात्।
प्रधानमन्त्रिणा विकासस्य पर्यावरणस्य च मध्ये सन्तुलनस्य विषये अपि बलं दत्तम्। सः अवदत् यत् भारतीयसभ्यतायां प्रकृतेः मातुः स्थानं प्रदत्तम् अस्ति। विकासः पर्यावरणं च परस्परस्य विकल्पौ न, अपितु परस्परपूरकौ स्तः। अतः सन्तुलित-विकासस्य मार्गः अनुसरणीयः अस्ति।
मोदी ब्रिक्स इत्यस्य अन्तर्गतं सूक्ष्मलघु-मध्यमोद्यमानां पटलं, नगरीय-यातायात-केन्द्रम्, स्मार्ट-ग्रिड् तथा ऊर्जासञ्चयनं, ब्रिक्स-डिजिटल-उत्कृष्टताकेन्द्रम् इत्यादीनां योजनानाम् अपि उल्लेखं कृतवान्। सः अवदत् यत् एतादृश्य: योजनाः व्यापकस्तरे प्रापयित्वा वैश्विकदक्षिणस्य देशानां कृते उपयोगिन्यः कर्तव्याः।
Hindusthan Samachar / Divya Ranjan