२.८८ लक्षाधिकेभ्यः जनानां प्राप्ता परिचर्यासुविधा

नवदिल्ली, १३ सितम्बरमासः (हि.स.)। केन्द्रसर्वकारेण देशव्यापिनां वरिष्ठनागरिकाणां स्वास्थ्यसुरक्षां, कल्याणं गरिमापूर्णं च जीवनं सुनिश्चितं कर्तुं १४२ नूतनवरिष्ठनागरिकगृहाणि अर्थात् वृद्धाश्रमाः अनुमोदिताः। अधुना यावत् २.८८ लक्षाधिकेभ्यः वृद्धेभ्यः आश्रयः, पौष्टिकभोजनम्, स्वास्थ्यपरीक्षणं, भौतिकचिकित्सा च इत्यादीनि आवश्यकसहायतासेवाः प्रदत्ताः।

केन्द्रीयसामाजिकन्यायाधिकारितामन्त्रालयस्य अनुसारं वरिष्ठनागरिकाणां जीवनस्तरस्य उन्नयनाय, दैनन्दिनपरिचर्यायाः सुविधां प्रदातुं, तान् स्वतन्त्रजीवनं यापयितुं समर्थान् कर्तुं च बहुआयामी उपायाः क्रियन्ते। नूतनतया अनुमोदितेभ्यः वरिष्ठनागरिकगृहेभ्यः तेभ्यः वृद्धजनेभ्यः सुरक्षितः सम्मानजनकश्च आश्रयः प्राप्स्यते, येषां पारिवारिकस्तरे सामाजिकस्तरे वा परिचर्यायाः आवश्यकता अस्ति।

सामाजिकन्यायाधिकारितामन्त्रालयस्य सचिवः सुधांशुपन्तः रविवासरे अवदत् यत् वृद्धानां गतिशीलतां स्वावलम्बनं च वर्धयितुं देशव्यापिनः २२८ विशेषशिविराणि आयोजितानि। एतेषां शिविराणां माध्यमेन ४.९१ लक्षाधिकाः लाभार्थिनः समाविष्टाः, प्रायः २३.९३ लक्षं निःशुल्कसहायकजीवनोपकरणानि च वितरितानि।

पन्तस्य अनुसारं दारिद्र्यरेखायाः अधः स्थितेभ्यः अल्पायवर्गेभ्यश्च पात्रेभ्यः वरिष्ठनागरिकेभ्यः चक्रिकासनानि, श्रवणयन्त्राणि, गमनदण्डाः चक्षुषी च प्रदत्तानि। एतेषाम् उपकरणानां प्राप्त्या वृद्धजनानां दैनन्दिनागमनाय संवादाय च महती सुविधा प्राप्ता।

सः अवदत् यत् कल्याणकारीयोजनाभिः सम्बद्धां सूचनाम् एकस्मिन् स्थाने उपलब्धां कर्तुं राष्ट्रपतिना ‘वरिष्ठनागरिककल्याणप्रवेशपटलम्’ इति पोर्टलम् आरब्धम्। एतत् पोर्टलं वरिष्ठनागरिकैः सम्बद्धानां सर्वकारीययोजनानाम्, अधिकाराणां सुविधानां च सटीकसूचनां प्रदातुं साझा-मञ्चरूपेण स्थापितम् अस्ति।

सचिवः अवदत् यत् मन्त्रालयस्य उद्देश्यम् सुलभस्वास्थ्यसेवाभिः संस्थागतपरिचर्यया च वृद्धजनान् स्वावलम्बिनः सुरक्षितपरिवेशे च स्थापयितुम् अस्ति।

Hindusthan Samachar / Dheeraj Maithani