बलरामपुरम्, १३ सेप्टेम्बरमासः (हि.स.)। उत्तरप्रदेशस्य बलरामपुर-जनपदस्य नेपालसीमाक्षेत्रे कोइलाबासस्य देवखुरीस्थले आयोजिते व्यापारिक-सम्मेलने शपथग्रहणसमारोहे च प्रदेशस्य बलरामपुर-श्रावस्ती-जनपदयोः उद्योगव्यापारमण्डलस्य पदाधिकारिणः अतिथिरूपेण सहभागी अभवन्। अस्मिन् अवसरे भारत-नेपालयोः सीमावर्तीक्षेत्रेषु व्यापारस्य प्रोत्साहनस्य तथा उभयोः देशयोः व्यापारिणां हितसम्बद्धानां विविधविषयाणां विषये चर्चा अभवत्।

देवखुरी-उद्योगवाणिज्यसङ्घस्य, लमही इत्यस्य आमन्त्रणेन उत्तरप्रदेश-उद्योग-व्यापारमण्डलस्य श्रावस्ती-जन-पदाध्यक्षः तथा बलरामपुर-प्रभारी दीना-नाथगुप्तः, जनपदमहामन्त्री राजेशरस्तोगी, युवा-प्रकोष्ठस्य जनपदाध्यक्षः प्रमोद-कुमारगुप्तः, नगरमन्त्री रविगुप्तः, माध्यमप्रभारी महेन्द्रद्विवेदी च कार्यक्रमे सम्मिलिताः अभवन्। तैः सह तुलसीपुरव्यापार-मण्डलस्य अध्यक्षः रामकुमारकसौधनः, उपाध्यक्षः घनश्याम-कसौधनः, महामन्त्री श्यामसुन्दरः तथा कोषाध्यक्षः हिमांशुजिन्दलः अपि उपस्थिताः आसन्।

कार्यक्रमे देवखुरी-उद्योगवाणिज्यसङ्घस्य त्रयोदशतमायाः कार्यकारिण्याः अध्यक्षस्य पदाधिकारिणां च शपथग्रहणसमारोहः आयोजितः। भारतीयप्रतिनिधिमण्डलस्य सदस्याः नेपालस्य स्थानीयसांस्कृतिक-परम्परानुसारं मुकुटेन स्मृतिचिह्नेन च सम्मानिताः। समारोहस्य समये देवखुरी-उद्योगवाणिज्यसङ्घस्य वर्तमानाध्यक्षः निवर्तमानाध्यक्षः च तथा उत्तरप्रदेश-उद्योगव्यापारमण्डलस्य पदाधिकारिणः उभयोः देशयोः व्यापारिणां मध्ये परस्परसौहार्दं सहयोगं च वर्धयितुं बलं दत्तवन्तः। सीमावर्तीक्षेत्रेषु व्यापारिक-क्रियाकलापानां सरलीकरणस्य तथा व्यापारिणां हितानां प्राथमिकतया संरक्षणस्य विषये अपि विचारविमर्शः अभवत्।

अद्य रविवासरे प्रातः कार्यक्रमात् प्रत्यागतः तुलसीपुरव्यापारमण्डलस्य अध्यक्षः रामकुमारकसौधनः अवदत् यत् कार्यक्रमे भारत-नेपालयोः व्यापारिणां हितसम्बद्धेषु विषयेषु सकारात्मकचर्चा अभवत्। सः अवदत् यत् नेपालस्य व्यापारिभिः भारतीयप्रतिनिधीनां सम्मानं कृत्वा भारतं ज्येष्ठभ्रातृसदृशम् इति कथितम्। उभयोः देशयोः व्यापारिकसम्बन्धानां सुदृढी-करणेन शताब्दीनां प्राचीनाः ‘रोटी-बेटी’-सम्बन्धाः अधिकं सुदृढाः भविष्यन्ति। कार्यक्रमः शनिवासरे आयोजितः आसीत्।

Hindusthan Samachar / Divya Ranjan