नवदिल्ली, १४ सेप्टेम्बरमासः (हि.स.)। लोकसभाध्यक्षः ओमबिरला तथा केन्द्रीयगृहमन्त्री सहकारितामन्त्री च अमितशाहः सोमवासरे सिखधर्मस्य चतुर्थं गुरुम् गुरु रामदासं तस्य ज्योति-ज्योत-दिवसस्य अवसरे श्रद्धया नतवन्तौ।

ओमबिरला सामाजिक-माध्यमे ‘एक्स’-मध्ये लिखितवान्, “सिखधर्मस्य चतुर्थगुरवे गुरु रामदासाय तस्य ‘ज्योति-ज्योत’-दिवसस्य अवसरे वयं कोटिशः प्रणामान् समर्पयामः। सः स्वजीवनेन सेवायाः, सिमरणस्य मानवतायाश्च मार्गं प्रकाशितवान्। गुरु रामदासस्य जीवनं त्यागस्य, तपस्यायाः, सेवायाः भक्तेश्च अद्भुतम् उदाहरणम् अस्ति। सः सङ्गतं प्रति प्रेम्णः, समानतायाः निःस्वार्थसेवायाश्च सन्देशं दत्त्वा ताम् आध्यात्मिकपरम्परां सुदृढां कृतवान्, यस्यां सम्पूर्णमानवजात्याः कल्याणं सर्वोपरि अस्ति। गुरुसाहिबस्य शिक्षाः अद्यापि अस्मान् मानवसेवायै तथा समाजे प्रेम्णः सौहार्दस्य च सुदृढीकरणाय प्रेरयन्ति।”

अमितशाहः अवदत् यत् सेवायाः, भक्तेः सामाजिकसौहार्दस्य च पवित्रां ज्योतिं प्रज्वाल्य गुरु रामदासः सर्वेभ्यः प्रेम्णः, एकतायाः निःस्वार्थसेवायाश्च सन्देशं दत्तवान्। अमृतसरस्य स्थापनां कृत्वा श्रीहरिमन्दिरसाहिबस्य आधारशिलां संस्थाप्य च तेन आध्यात्मिकपरम्परा समृद्धीकृता। तस्य आदर्शाः सर्वान् सेवायाः, सौहार्दस्य जनकल्याणस्य च मार्गे अग्रे गन्तुं प्रेरयन्तः भविष्यन्ति।

उल्लेखनीयं यत् २४ सेप्टेम्बरमासे १५३४ तमे वर्षे लाहौरे जन्म प्राप्तवान् गुरु रामदासः १५७४ तमवर्षात् १५८१ तमवर्षपर्यन्तं सिखधर्मस्य गुरुः आसीत्। ततः तेन ‘रामदासपुर’-नगरस्य आधारः स्थापितः, यत् पश्चात् अमृतसर-नाम्ना प्रसिद्धम् अभवत् तथा च सिखधर्मस्य प्रमुखम् आध्यात्मिककेन्द्रम् अभवत्। तेन श्रीगुरुग्रन्थसाहिबाय अनेकानि भजनानि शब्दांश्च, प्रायः ६३८ तः ६८८ शब्दपर्यन्तम्, विरचितानि। सिखधर्मस्य प्रचारं सङ्घटनं च सुदृढं कर्तुं तेन ‘मसन्द-प्रणाली’ अपि प्रारब्धा।

Hindusthan Samachar / Divya Ranjan