भीलवाडा, १४ सेप्टेम्बरमासः (हि.स.)। राष्ट्रियस्वयंसेवकसङ्घस्य सरसङ्घ-चालकः डॉ. मोहनभागवतः सोमवासरे भीलवाडायां चातुर्मासं कुर्वता राष्ट्रसन्तेन आचार्यपुलकसागर-साधुमहाभागेन सह मिलितवान्। सूर्यमहलस्थिते चातुर्मास-स्थले प्रायः ४० निमेषपर्यन्तं जातायां चर्चायां सामाजिकसमरसता, जैनतीर्थानां संरक्षणम्, गोवंशसंवर्धनं राष्ट्रनिर्माणं च इत्यादिषु विविधेषु विषयेषु विचारविनिमयः अभवत्। चर्चायां राजनीतेः पृथक् सामाजिकैकतायाः सद्भावस्य च विषयेषु मन्थनं कृतम्।

आचार्यपुलकसागरमहाभागेन सामाजिकसमरसतायाः संरक्षणे बलं दत्त्वा उक्तं यत् समाजं वर्गेषु विभजन्तः प्रयासाः परिहर्तव्याः। कथितानां यूजीसी-नियमानां क्रियान्वयनं न करणीयम् तथा सवर्णानां पृष्ठवर्गीयाणां च मध्ये विभाजनस्य स्थितिः न उत्पद्येत इति सः उक्तवान्। जैनसमाजस्य श्रद्धायाः प्रमुखकेन्द्रे सम्मेदशिखरजी, गिरनारः इत्यादयः जैनतीर्थस्थलानि सन्ति। तेषां तथा अन्येषां जैनतीर्थस्थलानां पूर्णसंरक्षणं सुनिश्चितं करणीयम् इति सः आग्रहं कृतवान्। जैनतीर्थस्थलानां संरक्षण-सम्बद्धाः समस्याः अपि चर्चिताः। डॉ. भागवतेन उचितस्तरे चर्चा कृत्वा समस्यासमाधानस्य आश्वासनं दत्तम्।

चर्चायाः समये आचार्यपुलकसागरेण विचार: दत्तः यत् देशस्य कारागारेषु गोशालाः स्थापनीयाः, येन बन्दिनः गोवंशसंवर्धनस्य सेवाकार्यस्य च सह सम्बद्धाः कर्तुं शक्यन्ते। सामाजिक-समरसतायाः राष्ट्रियैकतायाश्च सुदृढीकरणं सर्वेषां समानं लक्ष्यं भवेत्। जातिवादात् उपरि उत्थाय शान्तेः, सद्भावस्य राष्ट्रनिर्माणस्य च कृते मिलित्वा कार्यं कर्तुं आवश्यकता अस्ति।

आचार्यपुलकसागरेण उक्तं यत् राष्ट्रियैकतां सामाजिकसमरसतां च सुदृढीकर्तुं सङ्घस्य महत्त्वपूर्णा भूमिका अस्ति। अपरतः डॉ. भागवतेन स्वस्य साम्प्रतिक-अमेरिकाब्रिटेन-यात्रायाः अनुभवान् अपि आचार्यश्रीणा सह सहभागा: कृताः।

साक्षात्कारस्य प्रारम्भे डॉ. भागवतेन आचार्यपुलकसागरस्य पादप्रक्षालनं कृत्वा वन्दनम् अभिनन्दनं च कृतम्। आचार्यश्रीः तस्मै आशीर्वादं दत्तवान्। अस्मिन् अवसरे डॉ. भागवतेन इन्दौरनिवासिनी सरोजशाह-महोदयया आचार्यपुलक-सागरमहाभागस्य प्रेरणाप्रदजीवनम् आधृत्य लिखितस्य ‘एक और मुक्तिदूत’ इति पुस्तकस्य विमोचनं कृत्वा पुस्तकं आचार्यश्रीचरणयोः समर्पितम्।

अस्मिन् अवसरे राष्ट्रियस्वयंसेवक-सङ्घस्य अखिलभारतीयसहप्रचारकप्रमुखः अरुणजैनः, क्षेत्रप्रचारकः निंबारामः, प्रान्तप्रचारकः मुरलीधरः तथा श्रीपुलकसागर-चातुर्माससमित्याः अध्यक्षः प्रवीणचौधरी च उपस्थिताः आसन्। चौधरी-महोदयेन कथितं यत् वर्षे २०११ तमे अपि आचार्यपुलकसागरमहाभागस्य भीलवाडाप्रवासस्य समये डॉ. भागवतः तेन सह मिलितुं आगतवान् आसीत्। ततः परम् अपि उभयोः मध्ये समये समये साक्षात्कारवार्ता भवति स्म।

Hindusthan Samachar / Divya Ranjan