उज्जयिनी, १५ सेप्टेम्बरमासः (हि.स.)। मध्यप्रदेशस्य उज्जयिन्यां स्थिते विश्वप्रसिद्धे श्रीमहाकालेश्वरमन्दिरे मङ्गलवासरे प्रातः भाद्रपदशुक्लपक्षस्य चतुर्थ्यां भगवत: महाकालस्य भस्मारार्तिकी विशेषशृङ्गारेण सम्पन्ना अभवत्।

प्रातः प्रायः चतुर्वादने मन्दिरस्य कपाटोद्घाटनानन्तरं गर्भगृहे प्रतिष्ठितानां देवीदेवतानां पूजनं कृतम्। ततः भगवान् महाकालस्य हरिओमजलेन अभिषेकं कृत्वा दुग्ध-दधि-घृत-शर्करा-मधु-फल-रसेभ्यः निर्मितेन पञ्चामृतेन पूजनम-भिषेकश्च कृतः।

तदनन्तरं बाबा महाकालस्य भाङ्गेन, चन्दनेन विविधाभरणैश्च दिव्यशृङ्गारः कृतः। भगवान् रजतचन्द्रं, त्रिशूलं त्रिपुण्ड्रं च धारितवान्। शुष्कफलैः कृतविशेष-शृङ्गारेण बाबा महाकालः राजस्वरूपेण अलङ्कृतः। शेषनागस्य रजतमुकुटेन, रजतमुण्डमालया, रुद्राक्षमालया सुगन्धितपुष्पमालाभिश्च भगवान् अलङ्कृतः। फलानि मिष्टान्नानि च नैवेद्यरूपेण समर्पितानि।

मन्त्रघोषस्य मध्ये भस्मसमर्पणम्

भस्मारार्तिक्या: प्रक्रियायां प्रथमं घण्टालवादनं कृत्वा भगवते महाकालाय हरिओमजलं समर्पितम्। मन्त्रघोषस्य पूजनस्य च अनन्तरं कपूरारार्तिकी कृता। ततः ज्योतिर्लिङ्गं वस्त्रेण आच्छाद्य तस्मै भस्म समर्पितम्। महा निर्वाणी-अखाडा इत्यनेन भगवते महाकालाय भस्म समर्पितम्। मान्यता अस्ति यत् भस्मसमर्पणानन्तरं भगवान् महाकालः निराकारस्वरूपात् साकारस्वरूपं धृत्वा भक्तेभ्यः दर्शनं ददाति। भस्मारतेः समये झाञ्झ-मञ्जीर-डमरूणां ध्वनिभिः मन्दिरपरिसरः गुञ्जितः अभवत्।

नन्दिदर्शनं कृत्वा आशीर्वादं प्रार्थितवन्तः श्रद्धालवः

भस्मारार्तिक्या: पूर्वं नन्दिमण्डपे नन्दि-महाराजस्य स्नानं, ध्यानं पूजनं च कृतम्। बहुसंख्यकाः श्रद्धालवः भस्मारार्तिक्यां सम्मिलिताः। श्रद्धालवः बाबा महाकालस्य दर्शनं कृत्वा आशीर्वादं प्राप्तवन्तः तथा नन्दिमहाराजस्य कर्णे स्वकीयाः मनोकामनाः निवेदितवन्तः। अस्मिन् समये मन्दिरपरिसरः बाबा महाकालस्य जयघोषैः गुञ्जितः अभवत्।

Hindusthan Samachar / Divya Ranjan