Enter your Email Address to subscribe to our newsletters
गणेशोत्सवस्य द्वितीयः दिवसः संस्कृताय समर्पितः आसीत्, डीआईजी-विधायकः डॉ. नीलकण्ठतिवारी च उत्सवे सम्मिलितौ
वाराणसी, १५ सितम्बर (हि.स.)। उत्तरप्रदेशस्य धार्मिकनगरे वाराणस्यां मङ्गलवासरे निरन्तरं द्वितीये दिनेऽपि पूजापण्डालेषु भगवान् गणेशस्य पूजाऽर्चना कृता। कुत्रचित् दशदिनपर्यन्तं कुत्रचित् सप्ताहपर्यन्तं पूजापण्डालेषु भगवान् गणेशस्य आराधनया सह विविधाः धार्मिकाः सांस्कृतिकाः च कार्यक्रमाः भविष्यन्ति।
अगस्तकुण्डस्थिते शारदाभवने आयोजितस्य गणेशोत्सवस्य द्वितीयः दिवसः संस्कृताय समर्पितः आसीत्। अत्र आयोजिते उत्सवे वाराणसीनगरस्य दक्षिणक्षेत्रस्य विधायकः डॉ. नीलकण्ठतिवारी तथा वाराणसीपरिक्षेत्रस्य पुलिसोपमहानिरीक्षकः डीआईजी वैभवकृष्णः च सम्मिलितौ। उत्सवे शास्त्रार्थप्रतियोगितायां सम्मिलितानां प्रतिभागिनां उत्साहवर्धनं कुर्वन् डीआईजी-महोदयः मुख्यातिथिरूपेण अवदत् यत् अद्यतनानां बालकानां संस्कृतं वदन्तः श्लोकान् च पठन्तः दृष्ट्वा मह्यं अत्यन्तं प्रसन्नता जाता। भाषायाः मुख्योद्देश्यं संवादः अस्ति। यदा वयं परस्परं संस्कृतेन वार्तालापं करिष्यामः, तदा एषा भाषा जीविता भविष्यति अग्रे च वर्धिष्यते।
सः अवदत् यत् संस्कृतं केवलं भाषा नास्ति, अपितु एषा अस्माकं संस्कृतेः, ज्ञानस्य, संस्काराणां च मूलाधारः अस्ति। एषा देववाणी अस्ति, यस्यां शरीरं मनः बुद्धिश्च स्वस्थं स्थापयितुं अद्भुतं सामर्थ्यम् अस्ति। अस्माकं प्राचीनग्रन्थाः, वेदाः उपनिषदश्च अस्यामेव भाषायां रचिताः सन्ति।
अस्यां प्रतियोगितायाम् आहत्य १०४ विद्यार्थिनः भागं गृहीतवन्तः। प्रतियोगितायाः प्रारम्भे शलाकाप्रतियोगिता व्याख्यानप्रतियोगिता च आयोजिते आस्ताम्। व्याकरणविषये अष्टाध्यायीतः, ज्योतिषविषये षट्पञ्चाशिकातः, साहित्यविषये अमरकोषात्, दर्शनविषये च श्रीमद्भगवद्गीतातः प्रश्नाः पृष्टाः।
व्याख्यानप्रतियोगितायां साहित्यविषये प्रथमस्थानं प्राप्तवते छात्राय पण्डितगौरीनाथपाठक-इन्दिराबाईपाठकयोः रजतपदकेन पुरस्कृतम्। अपरत्र व्याकरणशास्त्रे प्रथमस्थानं प्राप्तवते प्रतिभागिने शिवकुमारशिवाचार्यमहास्वामिनः रजतपदकं प्रदत्तम्।
उत्सवस्य तृतीये सत्रे विद्वद्गोष्ठ्याः आयोजनं कृतम्। अस्यां गोष्ठ्यां मुख्यवक्तृरूपेण सम्मिलितः विधायकः डॉ. नीलकण्ठतिवारी अवदत् यत् अद्यतनः अयं पावनः अवसरः अस्माकं समाजस्य मनीषिणां ज्ञानदीपं प्रज्वालयन्तः विदुषां च अभिनन्दनस्य अस्ति। प्रसिद्धेन आचार्येण याज्ञिकेन प्रवचने उक्तम् अस्ति यत् “राज्ञः सम्मानः केवलं स्वदेशे भवति, किन्तु विद्वान् सम्पूर्णे विश्वे आदरं प्राप्नोति।”
कार्यक्रमस्य सञ्चालनं डॉ. विनोदरावराठकः कृतवान् तथा धन्यवादज्ञापनं यादवराेपाठकेन कृतम्। अन्येषु उपस्थितेषु विद्वत्सु पूर्वकुलपतिः प्रो. राजारामशुक्लः, प्रो. नागेन्द्रपाण्डेयः, डॉ. गणेशदत्तशास्त्री, प्रो. रमाकान्तपाण्डेयः, डॉ. दिव्यचेतनब्रह्मचारी, ज्योतिषाचार्यः अमोददत्तशास्त्री, डॉ. पवनशुक्लः, डॉ. उमाशङ्करत्रिपाठी, अभिषेकउपाध्यायः, आचार्यः सञ्जयउपाध्यायः इत्यादयः उपस्थिताः आसन्। स्वागतं कपिलपाठकेन तथा संयोजनं वरदः स्वप्निलपाठकश्च कृतवन्तौ।
एवमेव उत्सवस्य द्वितीये दिने रामघाटस्थिते सांगवेदविद्यालये ऋग्वेदस्य परीक्षा आयोजिता। अस्यां परीक्षायां उमङ्गपन्तपुणवाम्बेकरः उत्तमः तथा रोहितकुमारमिश्रः उत्साहनीयः अभवताम्। तथैव न्यायशास्त्रस्य परीक्षायां अभिषेकत्रिपाठी राजराजेश्वरद्राविडश्च उत्तीर्णौ अभवताम्।
अत्र आयोजितस्य गणेशोत्सवस्य तृतीये दिने बुधवासरे शुक्लयजुर्वेदस्य माध्यन्दिनसंहितायां प्रतियोगिता भविष्यति। एतां सूचनां विद्यालयस्य गणेश्वरशास्त्रीद्राविडः दत्तवान्।
हिन्दुस्थान समाचार / Dheeraj Maithani