Enter your Email Address to subscribe to our newsletters
हरिद्वारम्, १५ सेप्टेम्बरमासः (हि.स.)। कुम्भमेलस्य सज्जताभिः सह हरिद्वारनगरस्य पेयजलव्यवस्थाम् अपि सुदृढां क्रियते। कुम्भमेलापकस्य समये वर्धमानां पेयजलयाचनां पूरयितुं मेलापकक्षेत्रे नवीनाः योजनाः विकसिताः क्रियन्ते, अपरतः नगरस्य विद्यमानं जलवितरणजालमपि भविष्यस्य आवश्यकतानुसारं सुदृढं क्रियते।
हरिद्वारनगरे जलसंस्थानस्य माध्यमेन ९.६९ कोटिरूप्यकाणां व्ययेन विविधानि कार्याणि क्रियमाणानि सन्ति। एतेषु ५.६१ कोटिरूप्यकाणां व्ययेन प्रायः सार्धनवकिलोमीटरमिताः नवीनाः पेयजलवाहिन्यः स्थापयितुं पुरातनानां वाहिनीनां प्रतिस्थापनस्य च कार्यं सम्मिलितम् अस्ति। सप्तऋषिमार्गे, दुग्धाधारीचौकात् शान्तिकुञ्जपर्यन्तं, ब्रह्मपुरी-मनसादेवीमार्गे, बिल्केश्वर-उपनिवेशे कनखले च बङ्गाली-चिकित्सालयात् कनखल-आरक्षक-स्थानकपर्यन्तं पेयजलवाहिनीषु कार्यं प्रचलति।
तदतिरिक्तं भूपतवाला-पावनधाम-पम्पिङ्ग-पेयजलापूर्तियोजनायाः पुनर्गठनं पूर्णं जातम् अस्ति, यदा प्राथमिक-विद्यालयस्य श्यामलोकस्य च पम्पिङ्गयोजनयोः कार्यं अन्तिमचरणे अस्ति। कुम्भमेलाक्षेत्रे अतिरिक्तां पेयजलमागधां पूरयितुं उत्तराखण्ड-पेयजलनिगमस्य २९.३९ कोटिरूप्यकाणां व्ययेन ३५ योजनासु कार्यं प्रचलति।
बैरागी-कैम्पस्थले १५०० किलोलीटर-क्षमतायाः उच्चस्थितजलाशयस्य द्वयोः नलकूपयोश्च निर्माणकार्यं अन्तिमचरणे अस्ति। लालजीवाला, दक्षद्वीप, गौरीशङ्कर-पन्तद्वीपेषु पञ्च आरसीसी-जलस्रवणकूपानां तथा विभिन्नेषु क्षेत्रेषु पञ्च नलकूपानां निर्माणकार्यं च प्रगतिपथे अस्ति।
मेलाक्षेत्रे पूर्वनिर्मितानां दश पेयजल-योजनानां निर्माणम् अनुरक्षणं च अपि क्रियते। अपरतः लालजीवाला-जलाग्रहणकूपात् पावनधाम-उच्चस्थित-जलाशय-पर्यन्तं शुष्कनदीपर्यन्तं च जलोन्नयन-मुख्यवाहिन्याः जलवितरण-जालस्य च प्रतिस्थापनकार्यं अन्तिमचरणे अस्ति।
मेलाधिकारिण्याः सोनिकायाः निर्देशानुसारं एतासां योजनानां नियमित-रूपेण समीक्षणं क्रियते। प्रशासनस्य लक्ष्यं कुम्भमेलस्य समये श्रद्धालुभ्यः उत्तमां पेयजलसुविधां प्रदातुं सह नगरवासिभ्यः दीर्घकालीनां विश्वसनीयां च जलापूर्ति-व्यवस्थां निर्मातुम् अस्ति।
Hindusthan Samachar / Divya Ranjan