१५ जनपदेषु ४७.९२ लक्षजनाः प्रभाविताः, सस्यानां मार्गाणां च क्षतिः

पाटलिपुत्रम्, १६ सेप्टेम्बरमासः (हि.स.)। केन्द्रीयकृषि-कृषककल्याणमन्त्री शिवराजसिंहचौहानः बुधवासरे मुख्यमन्त्री सम्राट्चौधरी इत्यनेन सह बिहारस्य जलौघपीडितक्षेत्राणां भ्रमणं कृत्वा स्थितेः निरीक्षणं कृतवान्। सः कृषकेभ्यः प्रभावितपरिवारेभ्यश्च क्षतेः विषये सूचनां गृहीतवान्। केन्द्रीयदलम् जलौघेन जातस्य क्षतेः स्थले एव आकलनं करोति। राज्यस्य १५ जनपदेषु ८७ प्रखण्डानां ५७५ ग्रामपञ्चायतेषु प्रायः ४७.९२ लक्षजनाः जलौघेन प्रभाविताः सन्ति।

मुख्यमन्त्री सम्राट्चौधरी पाटलिपुत्रस्य विमानपत्तने केन्द्रीयमन्त्री शिवराजसिंह-चौहानं केन्द्रीयदलं च स्वागतम् अकरोत्। ततः उभौ नेतारौ वैशालीजनपदस्य राघोपुरविधान-सभाक्षेत्रस्य तेरसिया-सरायपुर-सहितेषु जलौघपीडितक्षेत्रेषु गतवन्तौ। तौ तेरसियादियारा-क्षेत्रे बाढस्थितेः स्थलीयं निरीक्षणम् अकरोताम्।

निर्धारितकार्यक्रमानुसारं मुख्यमन्त्रिणः केन्द्रीयमन्त्रिणश्च वाहनसमूहः तेरसियायाः चतुर्दशतमं वार्ड इति यावत् प्राप्तवान्। तत्र प्रशासनिकाधिकारिभिः ताभ्यां जलस्तरस्य, प्रभावितजनसङ्ख्यायाः तथा सहायता-रक्षाकार्याणां च विषये सूचना प्रदत्ता। उभौ नेतारौ प्रभावितक्षेत्रेषु जलप्लावनस्य जलौघेन च जातस्य क्षतेः स्थितिं दृष्टवन्तौ।

भ्रमणसमये जलौघपीडितपरिवाराणां कृषकाणां च समस्याः, तेभ्यः प्राप्यमाणाः सर्वकारीयसहायताश्च विषये सूचना गृहीता। कृषकेभ्यः सस्येषु जातस्य क्षतेः विषयेऽपि सूचना सङ्गृहीता। केन्द्रीयदलस्य उद्देश्यम् अस्ति यत् जलौघेन जातस्य क्षतेः वास्तविकस्थितेः स्थले एव आकलनं क्रियते।

राघोपुरस्य दियारा-क्षेत्रे जलौघजलम् क्षेत्रेषु प्रसृतम् अस्ति। तेन खरीफ्-सस्यानां बृहत्प्रमाणेन क्षतिः जाता। केन्द्रीय-कृषिमन्त्रिणः भ्रमणकार्यक्रमे सस्यक्षतेः आकलनं प्रमुखतया सम्मिलितम् अस्ति। प्रशासनस्य पक्षतः प्रभावितक्षेत्राणां, जनसङ्ख्यायाः सस्यक्षतेश्च सम्बद्धानि विवरणानि केन्द्रीयदलस्य पुरतः प्रस्तुताः सन्ति।

जलौघेन बहुषु क्षेत्रेषु मार्गाः अपि क्षतिग्रस्ताः सन्ति। बहूनां परिवाराणां गृहाण्यपि प्रभावितानि सन्ति, क्षेत्रेषु जलपूरणेन कृषकाणां सस्यानि च नष्टानि सन्ति। अतः प्रभावितजनानां प्रमुखचिन्ता राहतकार्यं, आवागमनं तथा सस्यक्षतेः प्रतिपूर्तिः इत्येतान् विषयान् प्रति अस्ति।

केन्द्रीयदलस्य निरीक्षणानन्तरं जलौघेन जातस्य क्षतेः आकलनं तथा प्रभावित-कृषकाणां परिवाराणां च कृते सहायतां प्रति अग्रिमा कार्यवाही करिष्यते।

भ्रमणस्य अग्रिमचरणे शिवराजसिंहचौहानः पाटलिपुत्रे उच्चस्तरीयां सभां करिष्यति। ततः सः भागलपुरं, मुंगेरं कटिहारं च गत्वा तेषां जलौघपीडितक्षेत्राणामपि निरीक्षणं करिष्यति। केन्द्रीयदलं तत्र जलौघेन जातस्य क्षतेः, सहायता-रक्षाकार्याणां सस्यक्षतेश्च स्थितेः निरीक्षणं करिष्यति।

Hindusthan Samachar / Divya Ranjan